މެންޗެސްޓާ (މެއި 24) - މުސްތަގުބަލުގައި އިޓަލީ ޓީމަކާ ހަވާލުވުމުގެ ޝައުގުވެރިކަން އެބަހުރި ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ފަހުގެ ޖީލުގެ އެންމެ ކާމިޔާބު ކޯޗު ކަމަށްވާ ގާޑިއޯލާ ވަނީ މިހާތަނަށް ސްޕެއިނުގެ ބާސެލޯނާ އާއި ޖަރުމަނުގެ ބަޔާން މިއުނިކްގައި ކޯޗުކަށް ކޮށްފަ އެވެ. އޭނާ މިހާރު ކޯޗުކަން ކޮށްދޭ ސިޓީއާ ހަވާލުވީ 2016 ވަނަ އަހަރު އެވެ. މިދިޔަ އަހަރުގެ ނޮވެމްބަރުގައި ގާޑިއޯލާ ވަނީ ސިޓީއާ އެކު ހަދާފައިވާ އެއްބަސްވުން 2023 ވަނަ އަހަރުގެ ޖޫންގެ ނިޔަލަށް އާ ކޮށްފަ އެވެ.
ސިޓީއާ އެކު އިނގިރޭސި ޕްރިމިއާ ލީގުގެ ތަށި ހޯދުމަށް ފަހު ރޭ އިޓަލީގެ މީޑިއާ އަކަށް ދިން އިންޓަވިއުއެއްގައި ގާޑިއޯލާ ބުނީ ބަޔާންއާ 2013 ވަނަަ އަހަރު ހަވާލުވިއިރާއި އޭގެ ތިން އަހަރު ފަހުން ސިޓީއާ އެކު ފުރަތަމަ މެޗުތަކުގައި އުނދަގޫ ކަންތައްތަކެއް ކުރިމަތިވި ކަމަށެވެ.
"ބާސެލޯނާގައި ވަރަށް ފަސޭހަ. ފޯވާޑުން ބޭނުން ކުރުމުގައި އަހަންނަށް އުނދަގޫވި ބަޔާން އާއި ސިޓީގައި. އެ އުނދަގޫވާނެ އަހަރެން އިޓަލީގައި މަސައްކަތްކުރާ ދުވަހެއްގައި ވެސް. އިޓަލީގައި އޮތީ އަހަރެން ޝައުގުވެރިވާ ލީގެއް. (ކޮންމެ ވެސް ދުވަހެއްގައި) އެ ތަނުގައި ވެސް މަސައްކަތް ކުރުމުގެ ވިސްނުން އެބަހުރި،" ފުޓްބޯޅަ ކެރިއަރުގައި ބްރެޝިއާ އަށް ކުޅުނު ގާޑިއޯލާ ބުންޏެވެ.
ކުރީގެ މިޑްފީލްޑަރު ގާޑިއޯލާ ކޯޗިން ކެރިއަރު ފެށީ 2007 ވަނަ އަހަރު ބާސެލޯނާގެ ބީ ޓީމުންނެވެ. އޭގެ އެއް އަހަރު ފަހުން ބާސެލޯނާގެ ސީނިއާ ޓީމުން ގާޑިއޯލާ އަށް ފުރުސަތު ލިބުނުއިރު، އެ ޓީމުގައި ހޭދަކުރި ހަތަރު އަހަރު ތެރޭގައި ޔޫރަޕްގެ ފުޓްބޯޅައިގައި އެ ޓީމުން ރަސްކަން ކުރި އެވެ. އެ ޓީމާ އެކު ގާޑިއޯލާ ޖުމްލަ 14 ޓްރޮފީ ހާސިލްކުރި އެވެ.
ޕާސިން ފުޓްބޯޅަ ކުޅުވާ ކޯޗެއްގެ ގޮތުގައި މަޝްހޫރުކަން ހޯދާފައިވާ ގާޑިއޯލާ ވަނީ އޭނާގެ ފިލޯސަފީގައި ބާސެލޯނާގެ އިތުރުން ބަޔާން އަދި ސިޓީގައި ވެސް ކާމިޔާބީ ތަކުރާރުކޮށްފަ އެވެ. ބަޔާންގައި ހަތް ތަށި އުފުލާލިިއިރު، ސިޓީގައި މިހާތަނަށް އަށް ޓްރޮފީ ވަނީ ހާސިލްކޮށްފަ އެވެ.
