ރައީސް އަބްދުﷲ ޔާމީނާ ބައްދަލު ކުރެއްވުމުން ގައުމުގެ ހާލަތާމެދު ކަންބޮޑުވުން ފާޅު ކުރެއްވި ކަމަށް އިދިކޮޅު ކޯލިޝަނުން ބުނެފި އެވެ.
ޔާމީން ގޭ ބަންދަށް ބަދަލުކުރި ފަހުން ފުރަތަމަ ފަހަރަށް މިދިޔަ ހޮނިހިރު ދުވަހު ވަނީ އިދިކޮޅު ކޯލިޝަންގެ ލީޑާޝިޕާ ބައްދަލު ކުރައްވައިފަ އެވެ.
އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ ޑެޕިޔުޓީ ލީޑަރު އަދި ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ އެ ދުވަހު ދެ ގަޑިއިރަށް ކުރިއަށް ގެންދިޔަ ބައްދަލުވުމުގައި ގައުމުއޮތް ހާލަތާ މެދު ކަންބޮޑުވާ ކަމަށް ޔާމީން ވިދާޅުވި ކަމަށެވެ.
"ހާއްސަގޮތެއްގައި ކޮވިޑުގެ މި ހާލަތުގައި ގައުމުގެ ކަންތައްތައް ހުރި ގޮތާއި ކަންތައްތައް މެނޭޖް ކުރަމުންދާ ގޮތާ ދޭތެރޭގައި ވެސް އެމަނިކުފާނުގެ ކަންބޮޑުވުންތައް ހުރި،" ލީޑާޝިޕްގެ އެހެން ބޭފުޅުންނާއެކު ބޭއްވި ނޫސްވެރިންގެ ބައްދަލުވުމުގައި ޝިޔާމް ވިދާޅުވި އެވެ.
ނޫސްވެރިންގެ ބައްދަލުވުމުގައި ޝިޔާމް ވާހަކަ ދައްކަވަނީ: ތަފްސީލް ދެއްވީ ޔާމީނާއެކު ބޭއްވި ބައްދަލުވުމަކާ ގުޅޭ ގޮތުން-- ފޮޓޯ: ހުސައިން ވަހީދު/ އަދަދު
ޝިޔާމް ވިދާޅުވީ ކޮވިޑުގެ މިހާލަތުގައި ވެސް ރައްޔިތުންގެ ފައިސާ ނުރަނގަޅު ގޮތުގައި ބޭނުން ކުރަމުން ދާ ކަމަށެވެ. އަދި ހިޔާނާތްތައް ހިނގާ ކަމަށް ވެސް އޭނާ ތުހުމަތު ކުރެއްވި އެވެ.
ކޮވިޑުގެ ސަބަބުން ރާއްޖެއަށް އިގްތިސާދީ ގޮތުންނާއި އެހެން ގޮތްގޮތުން ވެސް ކުރިމަތިވާ ގޮންޖެހުންތައް ހައްލު ކުރެވޭނެ ލީޑަރަކީ ޔާމީން ކަމަށް ޝިޔާމް ވިދާޅުވި އެވެ. އެހެން ކަމުން ޔާމީން މިނިވަން ކުރުމުގެ މަސައްކަތް ހުއްޓާ ނުލާނެ ކަމަށް އޭނާ ވިދާޅުވި އެވެ.
އޭގެ އިތުރުން ގައުމުގެ މިނިވަންކަމާއި އިސްތިގުލާލަށް ބުރޫއަރާފަދަ ކަންތައްތައް ވަމުންދާއިރު އިދިކޮޅު ކޯލިޝަނުން އެކަންކަން ރައްޔިތުންނަށް ބޮޑަށް ހާމަ ކުރަން ޔާމީން އިރުޝާދު ދެއްވި ކަމަށް ޝިޔާމް ވިދާޅުވި އެވެ.
ސިޔާސީ ގޮތުން ހުރި ގޮންޖެހުންތަކާއި އެ ކޯލިޝަން އިތުރަށް ކުރިއެރުވޭނެ ގޮތްތަކާ ގުޅޭގޮތުން ވެސް ޔާމީން ލަފާ ދެއްވި ކަމަށް ޝިޔާމް ވިދާޅުވި އެވެ.
"ވިދާޅުވި ސާބިތުކަމާއެކީގައި މަސައްކަތް ކޮށްދެއްވާށޭ. ތިމަން މަނިކުފާން މި ހުންނެވީ ވަރަށް ސާބިތުކަމާއެކީގައޭ. ގައުމަށް ހިދުމަތް ކުރުމުގެ ވިސްނުންފުޅުގައި އަބަދުވެސް އޭރުވެސް، މިހާރު ވެސް އަދި މާދަން ވެސް އެމަނިކުފާން އެ ހުންނެވީ،" ޝިޔާމް ވިދާޅުވި އެވެ.
ޝިޔާމް ވިދާޅުވީ އެ ބައްދަލުވުމުގެ ސަބަބުން އިތުރު ސިޔާސީ މަސައްކަތްތަކަށް ހިތްވަރު ލިބިގެން ގޮސްފައިވާ ކަމަށެވެ.
