ވިލާ ފައުންޑޭޝަނާއި އެތަނުގެ ވެރިޔާ ގާސިމް އިބްރާހިމްގެ އެހީގެ ދަށުން މަތީ ތައުލީމް ހާސިލް ކޮށްފައިވާ މީހުންގެ ނުދެއްކި ހުރި ލޯނުތައް މާފުކޮށްދެއްވައިފި އެވެ.
ގާސިމް އިބްރާހިމްގެ ވިލާ ފައުންޑޭޝަންގެ "ސްކޮލަޝިޕް ސްކީމް"ގެ ދަށުންނާއި ލޯނު އެހީގެ ދަށުން އަދި އެނޫން ވެސް ގޮތަކުން ގިނަ އަދަދެއްގެ މީހުން ރާއްޖޭން ބޭރުން މަތީ ހާސިލްކޮށްފައިވެ އެވެ. އަދި މިހާރު ވެސް ބައެއް މީހުން އަންނަނީ ކިޔަވަމުންނެވެ.
އޭގެތެރޭގައި ސިއްހީ ދައިރާއިން ޑޮކްޓަރުކަމާއި ނަރުސްކަމާއި ފާމަސިސްޓުންނާއި ލެބޯޓްރީ ޓެކްނީޝިއަނުން، އަދި މެޑިކަލް ސައިންސްގެ ރޮގުން ކިޔަވައިގެން ތިބި މީހުން ގިނަ އެވެ. މީގެ ތެރޭގައި ރާއްޖެ އާއި ރާއްޖޭން ބޭރުގައި މިހާރު މަސައްކަތް ކުރަމުންދާ މީހުން ހިމެނެ އެވެ.
ގާސިމް އިބްރާހިމް މިއަދު ނެރުއްވި ބަޔާނެއްގައި ވިދާޅުވީ ވިލާ ފައުންޑޭޝަނަށް އަދި އެ ނޫން ގޮތަކުން ދޫކުރި ލޯނަކަށް ވެސް ނުދެއްކި ފައިސާއެއް ވާނަމަ، އެ ފައިސާއެއް މާފުކޮށްދެއްވާ ކަމަށެވެ. އެއީ ކިތަންމެ ބޮޑު އަދަދެއްގެ ފައިސާއެއް ކަމަށްވީ ނަމަވެސް، މާފުކޮށްދެއްވީ ކަމަށް ވިދާޅުވި އެވެ.
"ކޮރޯނާ ބަލިމަޑުކަމުގެ ސަބަބުން މިފައުންޑޭޝަނަށާއި ވިލާ ކުންފުންޏަށް ފޫނުބެއްދޭވަރުގެ ބޮޑެތި ގެއްލުންތަކެއް ވަމުންދިޔަކަމުގައި ވިޔަސް، މި ދަނޑިވަޅަކީ މުޅި ދުނިޔެއަށާއި މި ދިވެހި ގައުމަށް ދިމާވެފައިވާ މިނުރައްކާތެރި ބަލިމަޑުކަމުގެ ސަބަބުން ޑޮކްޓަރުންނާއި ނަރުހުންނާއި އަދި މެޑިކަލް ދާއިރާގެ ސްޓާފުން ވަރައް ބުރަކޮށް އަދި އެހައިމެ އަވަދިނެތި ވަރަށްގިނަ ވަގުތު މަސަތްކަތްތަކެއް ދަނީ ކުރަމުން،" ގާސިމް ވިދާޅުވި އެވެ.
އެހެންވެ، އެކަމުގެ އަގުވަޒަންކުރުމުގެ ލޯނުތައް މާފުކޮށްދެއްވުމަށް ވިލާ ފައުންޑޭޝަނުން ނިންމީ ކަމަށް ގާސިމް ވިދާޅުވި އެވެ.
ގާސިމް ވިދާޅުވީ މިދިޔަ ދޮޅު އަހަރެއްހާ ދުވަހު ވަރުބަލިކަމެއް ނެތި ކުރައްވަމުންގެންދާ ބުރަ މަސައްކަތްތައް އުފަލާ އެކު ބަލައިގަންނަ ކަމަށާއި ސިއްހީ ހިދުމަތްތެރިންނަށް އިލާސްތެރިކަމާއިއެކު ޝުކުރު ދަންނަވާ ކަމަށެވެ.
"ތިޔަ ހުރިހާ ބޭފުޅުން މި ނާޒުކު ދަނޑިވަޅުގައި ދިވެހި ގައުމަށް ހިދްމަތްކޮށްދެއްވުމުގައި އިހުނަށް ވުރެ ބޮޑަށް ސާބިތުވެ ތިއްބަވާނެކަން އެއްވެސް ޝައްކެއްނެތި އަޅުގަނޑު ހިތުގެއަޑިން ޔަގީން ކުރަން،" ގާސިމް ވިދާޅުވި އެވެ.
ގާސިމް ވިދާޅުވި ގޮތުގައި މިއަދަކީ އެންމެން އެކަކު އަނެކަކަށް މަދަދުވެރިވެ ކެތްތެރިކަމާ އެއްބައިވަންތަކަމާއެކު މަސައްކަތްކުރަންވީ ދުވަސް ކަމަށާއި، އެގޮތުން ސަރުކާރާ ރައްޔިތުން އެކުގައި ކުރަމުންގެންދާ މިންނެތް މަސައްކަތްތަކުގައި ރަހުމަތް ލައްވަވައި، ކޮރޯނާގެ ވަބާއިން ގައުމުގެ އެންމެހައި ރައްޔިތުން ސަލާމަތްކުރުމަށް ދައުވާ ދަންނަވާ ކަމަށެވެ.
