މެންޗެސްޓާ (މެއި 23) - އިނގިރޭސި ޕްރިމިއާ ލީގުގައި މިރޭ 5-0 އިން އެވަޓަން ބަލިކުރި މެޗަށް ފަހު މެންޗެސްޓާ ސިޓީން ލީގު ތަށި އުފުލާލިއިރު، އެ ޓީމުގެ ތަރި ސާޖިއޯ އަގުއޭރޯ ލީގުގައި އެ ޓީމަށް ކުޅުނު ފަހު މެޗުގައި ލީގުގައި ލަނޑު ޖެހުމުގެ ހާއްސަ ރެކޯޑެއް ހަދައިފި އެވެ.
ސިޓީން ލީގު ކަށަވަރުކުރީ ބާކީ ތިން މެޗު އޮއްވަ އެވެ. މިއީ ހަތަރު އަަހަރު ތެރޭ ސިޓީން ލީގު ޗެމްޕިއަންކަން ހޯދި ތިން ވަނަ ފަހަރެވެ. އަދި ފާއިތުވި 10 އަހަރު ތެރޭ ލީގުގެ ޗެމްޕިއަންކަން ހޯދި ފަސް ވަނަ ފަހަރެވެ. ސިޓީން ވަނީ އިންގްލެންޑްގެ ޗެމްޕިއަންކަން ޖުމްލަ ހަތް ފަހަރު ހޯދައިފަ އެވެ. ސިޓީ އަކީ ޕްރިމިއާ ލީގުގެ ތާރީހުގައި ޑިސެމްބަރު މަހު އަށް ވަނައިގައި އޮތުމަށް ފަހު ލީގު ޗެމްޕިއަންކަން ހޯދި ފުރަތަމަ ޓީމެވެ.
މިރޭގެ މެޗުގެ 11 ވަނަ މިނިޓްގައި ރިޔާދު މާރޭޒް ދިން ބޯޅައަކުން ސިޓީ އަށް ލީޑުނަގައިދިނީ ކެވިން ޑިބްރޭނާ އެެވެ. އޭގެ ތިން މިނިޓް ފަހުން ޑިބްރޭނާ ދިން ބޯޅައަކުން ގަބްރިއެލް ޖީސޫސް ސިޓީގެ ދެ ވަނަ ގޯލު ޖެހި އެވެ. މެޗުގެ 53 ވަނަ މިނިޓްގައި ރަހީމް ސްޓާލިން ތަނަވަސް ކޮށްދިން ފުރުސަތެއްގައި ފިލް ފޯޑެން ވަނީ ސިޓީގެ ތިން ވަނަ ގޯލު ޖަހައިފަ އެވެ.
މި ސީޒަނަށް ފަހު ސިޓީ ދޫކޮށްލަން ނިންމާފައިވާ އަގުއޭރޯ ކުޅެން އެރީ 65 ވަނަ މިނިޓްގައި މާރޭޒްގެ ބަދަލުގަ އެވެ. އަގުއޭރޯ ދެ ގޯލު ޖެހިއިރު، އެ ދެ ގޯލަށް ވެސް ފުރުސަތު ތަނަވަސްކޮށްދިނީ ފެނާންޑީނިއޯ އެވެ.
އަގުއޭރޯ އޭނާގެ ކެރިއަރުގައި ސިޓީ އަށް ކުޅުނު ފުރަތަމަ މެޗުގައި 2011 ވަނަ އަހަރު ސްވަންސީ ސިޓީ ކޮޅަށް ދެ ގޯލު ޖެހީ ވެސް ބަދަލު ކުޅުންތެރިއެއްގެ ގޮތުގައި ކުޅެން އަރަ އެވެ. އޭނާ ލީގުގައި ސިޓީ އަށް ކުޅެދިން ފަހު މެޗުގައި މިރޭ މި ވަނީ ބަދަލު ކުޅުންތެރިއެއްގެ ގޮތުގައި އަރައި ދެ ގޯލު ޖަހައިފަ އެވެ.
އަގުއޭރޯ ލަނޑު ޖެހުމަށް ފަހު އުފާފާޅުކުރަނީ.-- ފޮޓޯ: މެންޗެސްޓާ ސިޓީ
އެވަޓަން ކޮޅަށް އަގުއޭރޯ ޖެހި ދެ ގޯލާ އެކު އޭނާ ވެފައިވަނީ ޕްރިމިއާ ލީގުގެ ތާރީހުގައި އެއް ކްލަބަކަށް އެންމެ ގިނަ ގޯލު ޖެހުމުގެ ރެކޯޑް ގާއިމްކޮށްފަ އެވެ. އަގުއޭރޯ ލިސްޓުގެ ކުރިއަށް ޖެހިލީ 184 ގޯލު ހަމަަކޮށްގެންނެވެ. ކުރިން މި ރެކޯޑް އޮތީ މެންޗެސްޓާ ޔުނައިޓެޑަށް 183 ގޯލު ޖަހައިދިން ވޭން ރޫނީ އަތުގަ އެވެ.
ސިޓީގެ ކުޅުންތެރިން ވަނީ މި މެޗުގެ ކުރިން އަގުއޭރޯ އަށް ގާޑް އޮފް އޮނާ އެއް ދީފަ އެވެ.
"އަހަރެން މި ކްލަބަށް އައިއިރު އެންމެ ފުރަތަމަ އަމާޒަކަަށްވީ ތަށްޓެއް ހޯދަން. އެކަން ހާސިލްވީ އަހަރެން ޖެހި ގޯލަކުން. މިހާރު ސިޓީ އަކީ ތަށި ހޯދަން އާދަވެފައި އޮތް ޓީމެއް. އެއް ކްލަބެއްގައި މި ގޮތަށް 10 އަހަރެއްގައި ހުރުމަކީ ވެސް ޝަރަފެއް. ފަހު މެޗުގައި ދެ ގޯލު ޖަހައި ރެކޯޑެއް ހެދުމަކީ ވަރަށް ބޮޑު އުފަލެއް،" ސްކައި ސްޕޯޓްސް އަށް ދިން އިންޓަވިއުއެއްގައި އަގުއޭރޯ ބުންޏެވެ.
މިއީ ޕެޕް ގާޑިއޯލާގެ ކޯޗުކަމުގައި ކުޅޭ ސިޓީން މި ސީޒަނުގައި ކާމިޔާބުކުރި ދެ ވަނަ ޓްރޮފީ އެވެ.
"މިއީ ހުރިހާ ގޮތަކުން ވެސް ހާއްސަ ޓްރޮފީއެއް. އަހަރެމެން ލީގު މި ހޯދީ ވަރަށް އުނދަގޫ ތަޖުރިބާތަކެއް ކޮށްފައި،" ގާޑިއޯލާ ބުންޏެވެ.
ސިޓީން ވަނީ ޓޮޓެންހަމް ބަލިކޮށް މި ފަހަރު ލީގު ކަޕް ވެސް ކާމިޔާބުކޮށްފަ އެވެ. އެކަމަކު އެފްއޭ ކަޕްގެ ސެމީ ފައިނަލުން ޗެލްސީ އަތުން ކަޓައި ހަތަރު ތަށި ހޯދުމުގެ އުއްމީދަށް ނިމުން އައީ އެވެ. ސިޓީން މި ސީޒަނުގައި ތިން ތަށި ހޯދައިގެން ނިންމާލުމުގެ ފުރުސަތު އެބައޮތެވެ. އެއީ މި މަހުގެ 29 ވަނަ ދުވަހު ޗެމްޕިއަންސް ލީގުގެ ފައިނަލުގައި ޗެލްސީ ބަލިކޮށްގެންނެވެ.
އަގުއޭރޯ ވަނީ ޗެމްޕިއަންސް ލީގުގެ ފައިނަލުން ސިޓީ މޮޅުވެއްޖެނަމަ އޭނާ ކްލަބް ދޫކޮށްލާނީ ވަރަށް އުފަލުން ހުރެ ކަމަށް ބުނެފަ އެވެ. ސިޓީއާ އެކު މި ސީޒަނުގެ ނިޔަަލަށް ކޮންޓްރެކްޓްގައި ހުރި އަގުއޭރޯ ދެން ގުޅޭނީ ހިލޭ ޓްރާންސްފާއެއްގައި ބާސެލޯނާ އަށެވެ.
