ދުނިޔޭގެ ގިނަ ގައުމުތަކެއްގައި މަގުބޫލް ކުޅިވަރެއް ކަމަށްވާ ބެޑްމިންޓަންގެ ސްކޯރިން ގަވައިދަށް ބަދަލު ގެންނަން ރާއްޖެ އާއި އިންޑޮނީޝިއާ އިން ހުށަހެޅި ޕްރޮޕޯސަލް މިއަދު ބެޑްމިންޓަން ދުނިޔޭގެ ޖަމިއްޔާ ބީޑަބްލިއުއެފްގެ އާންމު ޖަލްސާގައި ކުޑަ ފަރަގަކުން ފާހެއްނުވި އެވެ.
ޖަލްސާގައި ބައިވެރިވާ ތިން ބައިކުޅަ ދެބައިގެ ތާއީދާ އެކު ފާސްކުރެވޭ މި ގަވާއިދަށް ލިބުނީ 66.31 ޕަސެންޓް ވޯޓެވެ. ފާސްކުރަން ބޭނުންވަނީ 67 ޕަސެންޓް ވޯޓެވެ. އިތުރަށް އެންމެ ގައުމެއްގެ ވޯޓު ލިބުނަސް މިއަދު އާ ގަވާއިދު އޮތީ ފާސްވާ ގޮތަށެވެ.
ހުށަހެޅުނު އާ ސްކޯރިން ގަވާއިދުގައިވާ ގޮތުން ބެޑްމިންޓަން މެޗުތައް ކުޅޭނީ ބެސްޓް އޮފް ފައިވްގެ އުސޫލުންނެވެ. އެއީ 11 ޕޮއިންޓުން ސެޓެއް ނިމޭ ގޮތަށެވެ. އެކަމަކު މިއަދުގެ ވޯޓާ އެކު ދެން ވެސް ބެޑްމިންޓަން ކުޅޭނީ ކުރިން ކުޅެމުން އައި ގަވާއިދަށް ބެސްޓް އޮފް ތުރީ އަށެވެ. އެ ގަވާއިދުގެ ދަށުން ސެޓެއް ނިމޭނީ 21 ޕޮއިންޓުންނެވެ.
ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ރައީސް މޫސާ ނާޝިދު (މޫސަ) މިއަދު "އަދަދު" އަށް ވިދާޅުވީ މިއީ ވަރަށް ކައިރި ކައިރިން ދިޔަ ވޯޓެއް ކަމަށެވެ. އަދި އެންމެ ވޯޓެއްގެ ފަރަގުން ގަވާއިދު ފާސްނުވެ ދިއުމަކީ ބެޑްމިންޓަން އިން ބޭނުންވާ ކުރިމަގު ހާސިލްކުރަން ބަލާއިރު ދެރައެއްގެ ގޮތުގައި ދެކޭ ކަމަށް މޫސަ ސިފަކުރެއްވި އެވެ.
"ބީޑަބްލިއުއެފް އިން ރުހުންދީފައި ބެޑްމިންޓަން އޭޝިއާ އިން ވެސް އަދި ޔޫރަޕުން ވެސް ތާއީދުކޮށްފައި އޮތް ސްކޯރިން ގަވާއިދެއް މި ފާސްނުވެ މިދިޔައީ. މީގެ އައި ވާޗުއަލްކޮށް މި ކޮންގްރެސް ކުރިއަށް ގޮސް ވޯޓިން ވެސް އެ ގޮތަށް އޮތީމަ އައި ކަންކަން ވެސް. ސިއްރު ވޯޓެއް ނެގުނީ އެކަމަކު ވާޗުއަލްކޮށް ވީމަ މީގެ ކޮންޓްރޯލް މި އަންނަނީ އެކަނި އެކަކަން. ދެން މި ގެއްލުނީ އަނެއްކާ ވެސް މި ވަގުތަށް ފުރުސަތުތަކެއް ބެޑްމިންޓަން ގްރޯވާން (ކުރިއަރާން)،" މޫސަ ވިދާޅުވި އެވެ.
ބެޑްމިންޓަނުގެ ދުނިޔޭގެ ފެޑެރޭޝަން ބީޑަބްލިއުއެފްގެ ކައުންސިލް މެމްބަރުކަމާއި ބެޑްމިންޓަން އޭޝިއާ އާއި ދެކުނު އޭޝިއާގެ ބެޑްމިންޓަން އެސޯސިއޭޝަންގެ ޖެނެރަލް ސެކްރެޓަރީގެ މަގާމު ފުރުއްވަމުން އަންނަ މޫސަ ވިދާޅުވީ ރާއްޖޭންނާއި ބެޑްމިންޓަން އޭޝިއާ އިން ބޭނުންވި ގޮތަށް ނުދިޔަ ހަަމައެކަނި ކަމަކީ އާ ސްކޯރިން ގަވާއިދު ފާސްވުން ކަމަށާއި އެހެން ކަންކަން ދިޔައީ ރަނގަޅަށް ކަމަށެވެ.
ބެޑްމިންޓަން ދުނިޔޭގެ ފެޑެރޭޝަންގެ ރައީސް ޕޯލް-އެރިކް ހޯޔާ ލާސެން ވިދާޅުވީ މީގެ ހަތަރު ވަރަކަށް އަހަރު ކުރިން ވެސް ބެޑްމިންޓަން ސްކޯރިން ގަވާއިދަށް ބަދަލު ގެންނަން ހުށަހެޅި ޕްރޮޕޯސަލް ފާސްނުވި ގޮތަށް މި ފަހަރު ވެސް އެ ނާކާމިޔާބީއާ ކުރިމަތިލާން ޖެހުނީ ކަމަށެވެ. އެކަމަކު މި ފަހަރު ކުރިއަށް ވުރެ އާ ގަވާއިދު ފާސްކުރަން ލިބުނު ވޯޓުތައް ގިނަވުމަކީ ހޯޔާ އަށް ހިތްހަމަޖެހުމެކެވެ.
"ހުށަހެޅިފައި އޮތް ސްކޯރިން ގަވާއިދަކީ އަހަރެންގެ ވިޝަންގައި ވެސް ހިމެނޭ ކަމެއް. އެ ގޮތަށް ބެޑްމިންޓަން ބަދަލު ކުރެވިއްޖެނަމަ ވަރަށް ގިނަ ބަޔަކަށް މި ކުޅިވަރު އިތުރަށް ޝައުގުވެރިވެ ކުރިއަރާނެ. މިއަދު މިހެންވިޔަސް އަހަރެމެން 2023-2024 ގެ ސްޓްރެޓީޖިކް ޕްލޭނަށް ދާއިރު ޝައުގުވެރި ބަދަލުތައް ގެނައުމުގެ މަސައްކަތްތައް ކުރިއަށްދާނެ،" 1996 ވަނަ އަހަރު އޮލިމްޕިކުން ރަން މެޑަލް ހޯދި ހޯޔާ ވިދާޅުވި އެވެ.
އާ ސްކޯރިން ގަވާއިދު ފާސްކުރަން ބެޑްމިންޓަން ދުނިޔޭގެ ޖަމިއްޔާ، ބީޑަލްބިއުއެފާއި ބެޑްމިންޓަން އޭޝިއާ އަދި ޔޫރަޕުން އެއްބަސްވެގެން ބުރަ މަސައްކަތްތަކެއް ކޮށް މި ފަހަރު މިކަން ހާސިލްކުރެވޭނެ ކަމަށް ވަރަށް ގިނަ ބަޔަކު ޔަގީންކުރި އެވެ. އެކަމަކު އާ ސްކޯރިން ގަވާއިދު ފާސްނުވެދިޔައީ އަދިވެސް ބައެއް ވަރުގަދަ ގައުމުތަކުން މި ބަދަލުކުރަން ބޭނުންނުވުމުންނެވެ. ބަދަލަކަށް ވޯޓު ނުދޭ ގައުމުތައް ގިނައީ އެފްރިކާ އާއި ދެކުނު އެމެރިކާގަ އެވެ.
