އަންހެނުން ބާރުވެރިކުރަން މޮމްސް އޮފަރިން މޮމްސް ސަޕޯޓް (މޮމްސް)އިން ކުރާ މަސައްކަތުގައި ބައިވެރިވާން އެ ޖަމިއްޔާއާ އެކު އެފްއޭއެމުން އެއްބަސްވުމެއްގައި ސޮއިކޮށްފި އެވެ.
މިއީ މިދިޔަ އަހަރުގެ ނޮވެމްބަރު 27 ވަނަ ދުވަހު ލޯންޗްކުރި އެފްއޭއެމްގެ ފައުންޑޭޝަންގެ ދަށުން ވެވިގެންދިޔަ އެއްބަސްވުމެކެވެ. އެފްއޭއެމް ފައުންޑޭޝަނަކީ ފުޓްބޯޅައިގެ ތެރެއިން އިޖުތިމާއީ ކަންކަމުގައި ވީހާވެސް ބޮޑަށް މަސައްކަތްކުރުމުގެ ވިސްނުމުގައި އެފްއޭއެމުން އޭއެފްސީއާ ވެސް ގުޅިގެން ފެށި ޕްރޮގްރާމެކެެވެ.
މި އެއްބަސްވުމުގެ ދަށުން އެފްއޭއެމާއި މޮމްސް އިން ގުޅިގެން އަންހެނުންނާއި ކުޑަކުދިންގެ ސިއްހީ ރައްކާތެރިކަން ކަށަވަރުކުރުމުގެ ކަންކަން ޕްރޮމޯޓްކުރުމާއި ޖެންޑާ އީކުއަލިޓީ ޕްރޮގްރާމްތަކުގައި ގުޅިގެން މަސައްކަތްކުރުމުގެ އިތުރުން އަންހެނުން ބާރުވެރިކުރަން ކުރާ ކަންކަމުގައި އެފްއޭއެމުން ބައިވެރިވާނެ އެވެ.
މޮމްސް އަކީ އަންހެނުންނާއި ކުޑަކުދިންގެ ނަފްސާނީ ގޮތުން ދުޅަހެޔޮކަން އިތުރު ކުރުމާއި އަންހެނުންނާއި ކުޑަކުދިންނަށް ކުރާ އަނިޔާއާ ދެކޮޅަށް 2016 ވަނަ އަހަރު ފެށުނު މަސައްކަތެކެވެ. އެ ކަމުގައި ރަސްމީ ސިފަ ޖެހި ޖަމިއްޔާއެއްގެ ގޮތުގައި ހިނގައިގަތީ 2019 ވަނަ އަހަރު އެވެ. އޭގެ ފަހުން އެ ޖަމިއްޔާ އިން އިސްވެ ގިނަ މަސައްކަތްތަކެއް ވަނީ ކޮށްފަ އެވެ.
އެފްއޭއެމް ފައުންޑޭޝަން ޕާޓްނަރުންގެ ގޮތުގައި އެންމެ ފުރަތަމަ ހަމަޖައްސާފައިވަނީ ސްޕެޝިއަލް އޮލިމްޕިކްސް މޯލްޑިވްސް އާއި އެޑްވަކޭޓިން ރައިޓްސް އޮފް ޗިލްޑްރެން (އާކް) އެވެ. ފައުންޑޭޝަނުން ވަނީ މީގެ ކުރިން އެ ޖަމިއްޔާއާ ގުޅިގެން އެކި ހަރާކާތްތައް ކުރިއަށްގެންގޮސްފަ އެވެ. ކުރިއަށް އޮތްތަނުގައި މޮމްސްއާ ގުޅިގެން ވެސް އެފްއޭއެމުން އެކި ޕްރޮގްރާމްތައް ހިންގާނެ އެވެ.
