މާލޭ ސިޓީ ކައުންސިލަށް އިންތިހާބުވި މެމްބަރުން ހުވާކުރުން އޮންލައިންކޮށް ބާއްވަން ނިންމައިފި އެވެ.
ކުރިން އޮންލައިންކޮށް ހުވާ ކުރުން ބޭއްވުމަށް ނިންމުމަށް ފަހު އިއްޔެ ސިޓީ ކައުންސިލުން އިއުލާން ކޮށްފައިވަނީ ހުވާ ކުރުން ބާއްވާނީ ސަލްޓަން ޕާކުގައި ކަމަށެވެ.
ނަމަވެސް މާލޭ ސިޓީ އިންތިހާބީ މޭޔަރު ޑރ. މުހައްމަދު މުއިއްޒު، "އަދަދު" އަށް ވިދާޅުވީ ހުވާ ކުރުން އޮންނާނީ އޮންލައިންކޮށް މާދަމާ ހެނދުނު 9:00 ގައި ކަމަށެވެ. އޮންލައިންކޮށް ބާއްވަން ބަދަލުކުރި ސަބަބެއް ވިދާޅެއްނުވެ އެވެ.
އެނގިފައިވާ ގޮތުގައި ސަލްޓަންޕާކުގައި ނުބާއްވަން ނިންމީ، އެޗްޕީއޭގެ ޑިރެކްޓަރު ޖެނެރަލް މައިމޫނާ އަބޫބަކުރުގެ އެންގެވުމަކަށެވެ.
ކޮވިޑްގެ ހާލަތު ގޯސްވުމުން ގިނަ ރަށްރަށުގައި ހުވާ ކުރުމުގެ ރަސްމިއްޔާތު އޮންލައިންކޮށް ބޭއްވުމަށް، ލޯކަލް ގަވާމެންޓް އޮތޯރިޓީ (އެލްޖީއޭ) އިން ވެސް ވަނީ އަންގައިފަ އެވެ.
ލޯކަލް ކައުންސިލްތަކުގެ އިންތިހާބުގައި ވެރިކަންކުރާ އެމްޑީޕީން ވަނީ 400 ގޮނޑިއާ އެކު ކައުންސިލުތަކުގެ އަގުލަބިއްޔަތު ނަގައިފަ އެވެ. އިދިކޮޅު ޕީޕީއެމް/ޕީއެންސީ ކޯލިޝަނަށް ކާމިޔާބުވީ 325 ގޮނޑި އެވެ.
ނަމަވެސް، މާލެ ސިޓީ ކައުންސިލްގެ އަގުލަބިއްޔަތާއި ކުރިން އެމްޑީޕީގެ ތާއީދު ބޮޑު ބައެއް ރަށްތަކުން ވެސް މުހިއްމު ގޮނޑިތަކެއް އިދިކޮޅުން ވަނީ ކާމިޔާބުކޮށްފަ އެވެ.
