މާލޭ ސިޓީ ކައުންސިލަށް އިންތިހާބުވި ކައުންސިލަރުން ހުވާ ކުރުން ސަލްޓަން ޕާކްގައި ބޭއްވުމަށް ނިންމައިފި އެވެ.
ސިޓީ ކައުންސިލުން އިއްޔެ ކުރި އިއުލާނެއްގައި ބުނީ ކައުންސިލަރުން ހުވާ ކުރުން އޮންނާނީ މާދަމާ ހެނދުނު ނުވައެއް ޖަހާއިރު ކަމަށެވެ. ސަލްޓަން ޕާކްގައި އެ ރަސްމިއްޔާތު ބޭއްވި ނަމަވެސް ކޮވިޑުގެ ސަބަބުން އާއްމުންނަށް ނުވަދެވޭނެ ކަމަށް އިއުލާންގައިވެ އެވެ.
ކައުންސިލަރުން ހުވާ ކުރުމުގެ އިތުރުން މާލޭ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީއަށް ހޮވުނު މެމްބަރުން އިގުރާރުގައި ސޮއިކުރުން ވެސް މާދަމާގެ ރަސްމިއްޔާތުގައި އޮވެ އެވެ.
އެ ރަސްމިއްޔާތު ޓީވީއެމްއިން ލައިވް ކުރަން ވަނީ ނިންމައިފަ އެވެ.
ކޮވިޑްގެ ހާލަތު ގޯސްވުމުން ގިނަ ރަށްރަށުގައި ހުވާ ކުރުމުގެ ރަސްމިއްޔާތު އޮންލައިންކޮށް ބޭއްވުމަށް، ލޯކަލް ގަވާމެންޓް އޮތޯރިޓީ (އެލްޖީއޭ) އިން ވަނީ އަންގައިފަ އެވެ.
ރާއްޖޭގައި ފުރަތަމަ ފަހަރަށް ދެ އިންތިހާބެއް އެކުގައި ބޭއްވިއިރު ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 3،814 ކެންޑިޑޭޓުން ވާދަކުރި އެވެ. މީގެ ތެރެއިން ކައުންސިލްތަކަށް 982 މީހަކު އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް 930 މީހުންނާ އެކު ޖުމްލަ 1912 މީހުން އިންތިހާބު ކުރަން ޖެހުނެވެ.
އެ އިންތިހާބުގައި ވެރިކަންކުރާ އެމްޑީޕީން ވަނީ 400 ގޮނޑިއާ އެކު ކައުންސިލުތަކުގެ އަގުލަބިއްޔަތު ނަގައިފަ އެވެ. އިދިކޮޅު ޕީޕީއެމް/ޕީއެންސީ ކޯލިޝަނަށް ކާމިޔާބުވީ 325 ގޮނޑި އެވެ.
ނަމަވެސް، މާލެ ސިޓީ ކައުންސިލްގެ އަގުލަބިއްޔަތާއި ކުރިން އެމްޑީޕީގެ ތާއީދު ބޮޑު ބައެއް ރަށްތަކުން ވެސް މުހިއްމު ގޮނޑިތަކެއް އިދިކޮޅުން ވަނީ ކާމިޔާބުކޮށްފަ އެވެ. މާލޭ ސިޓީގެ މޭޔަރުކަން ކާމިޔާބު ކުރީ އެމްޑީޕީއާ ވާދަކޮށް ޕީޕީއެމްގެ ޑރ. މުހައްމަދު މުއިއްޒު އެވެ.
