ޒިއުރިކް (މެއި 14) - ފްރާންސް ގައުމީ ޓީމަށް ކުޅުމުގެ ފުރުސަތު ނުލިބުމުން މެންޗެސްޓާ ސިޓީގެ ޑިފެންޑަރު އައިމެރިކް ލަޕޯޓް ސްޕެއިނަށް ރަށްވެހިކަން ބަދަލުކުރުމާ އެކު އޭނާ ސްޕެއިން ޓީމަށް ކުޅުމުގެ ހުއްދަ ދޭން ފީފާ އިން ނިންމައިފި އެވެ.
ފްރާންސްގެ 17، 18، 19 އަދި 21 އަހަރުން ދަށުގެ ގައުމީ ޓީމަށް ކުޅުނު ލަޕޯޓަށް ފްރާންސްގެ ސީނިއާ ޓީމަށް ކުޅުމުގެ ފުރުސަތެއް ނުދެ އެވެ.
ލަޕޯޓް ލައްވައި ސްޕެއިނުގެ ކުރީގެ ކޯޗު ހުލެން ލޮޕެޓެގީ އެ ގައުމަށް ކުޅުވަން މަސައްކަތްކުރާތީ 2016 ވަނަ އަހަރުގެ ފަހުކޮޅުގައި 2018 ވަނަ އަހަރުގެ ވޯލްޑް ކަޕް ކޮލިފައިން މެޗުތަކަކަށް ނެގި ފްރާންސް ސްކޮޑުން ލަޕޯޓަށް ފްރާންސްގެ ކޯޗު ޑިޑިއޭ ޑެޝޯމްޕްސް ޖާގަ ދިނެވެ. އެއީ ބަލްގޭރިއާ އާއި ނެދަލެންޑްސްއާ ދެކޮޅަށް ކުޅެން އޮތް މެޗުތަކަށެވެ. އެހެން ނަމަވެސް އެ ފަހަރު ދެ މެޗުގައި ވެސް ކުޅުމުގެ ފުރުސަތު ނުލިބި ލަޕޯޓް ހުރީ ބެންޗުގަ އެވެ.
ފްރާންސްގެ ޓީމު ފޮޓޯ ޝޫޓެއްގެ ތެރެއިން ލަޕޯޓް: ކުރިން ސްޕެއިނަށް ރަށްވެހިކަން ބަދަލުނުކުރާނެ ކަމަށް ބުނި ނަމަވެސް އެ ނިންމުން ފަހު މި ވަނީ ބަދަލުކޮށްފައި.
މީގެ ދެ އަހަރު ކުރިން 2019 ވަނަ އަހަރުގެ އޮގަސްޓް މަހު ޔޫރޯ 2020 ކޮލިފައިންގައި އެންޑޯރާ އާއި އަލްބޭނިއާއާ ދެކޮޅަށް ފްރާންސުން ނެގި ސްކޮޑުގައި ލަޕޯޓް ހިމެނިފައިވަނިކޮށް އޭނާ އިންޖަރީވުމުން ޓީމުން ބާކީކުރީ އެވެ. ފަހުން އަނިޔާއިން ރަނގަޅުވެގެން އައިސް ލަޕޯޓް ރަނގަޅަށް ކުޅުމުން ވެސް ފްރާންސުން ފުރުސަތެއް ނުލިބި އޭނާ އެންމެ ފަހުން ސްޕެއިނަށް ކުޅެން ނިންމީ އެވެ.
ލަޕޯޓަށް ފްރާންސް ޓީމުން ފުރުސަތު ނުދޭ މައްސަލައިގައި ފްރާންސްގެ މީޑިއާ އާއި ސިޓީގެ ކޯޗު ޕެޕް ގާޑިއޯލާ ވަނީ މީގެ ކުރިން ހިތްހަމަނުޖެހުން ފާޅުކޮށްފަ އެވެ.
އުމުރުން 26 އަހަރުގެ ލަޕޯޓް ލައްވައި ސްޕެއިނަށް ކުޅުވަން އެންމެ ބޮޑަށް މަސައްކަތް ކުރީ ސްޕެއިނުގެ ކޯޗު ލުއިސް އެންރީކޭ އެވެ. ސްޕެއިންގެ ފުޓްބޯޅަ ފެޑެރޭޝަނުން އިސްވެ ކުރި މަސައްކަތުން މިހާރު ލަޕޯޓަށް މިވަނީ ސްޕެއިނަށް ކުޅެން ފީފާގެ ހުއްދަވެސް ލިބިފަ އެވެ. މިއާ އެކު ކުރިއަށް އޮތް ޔޫރޯ ފުޓްބޯޅަ މުބާރާތުގައި ލަޕޯޓަށް ސްޕެއިން ޓީމަށް ކުޅެވޭނެ އެވެ. އަދި ރަނގަޅު ޑިފެންޑަރުން މަދުވުމުން އެންރީކޭ އަށް ކުރިމަތިވެފައިވާ ބޮލުގެ ރިހުމަށް ލުޔެއް ލިބޭނެ އެވެ.
މިދިޔަ އަހަރު ފީފާގެ ގަވާއިދަށް ގެނެވުނު ބަދަލާ އެކު 21 އަހަރު ފުުރުމުގެ ކުރިން ގައުމީ ޓީމަށް ތިން މެޗު ނުކުޅޭ ކުޅުންތެރިންނަށް އެހެން ގައުމީ ޓީމަކަށް ބަދަލުވެވޭނެ އެވެ. އެއީ ރަސްމީ ބޮޑު މުބާރާތެއްގައި އެހެން ގައުމަކަށް ނުކުޅޭނަމަ އެވެ.
ސިޓީން 2018 ވަނަ އަހަރު ޖެނުއަރީ މަހު ލަޕޯޓް ގަތީ އެތުލެޓިކް ބިލްބާއޯ އަށް އޭރު ސިޓީގެ ކްލަބް ރެކޯޑް އަގެއް ކަމަށްވާ 57 މިލިއަން ޕައުންޑް (73 މިލިއަން ޑޮލަރު) ގެ ޓްރާންސްފާ ފީއެއް ދެއްކުމަށް ފަހު އެވެ. ސިޓީގައި އަނިޔާގެ ސަބަބުން ލަޕޯޓަށް ގިނަ މެޗުތަކެއް ގެއްލުނު ނަމަވެސް ކޮންމެ ފަހަރަކު ރަނގަޅަށް ރިކަވާވެގެން އައިސް އޭނާ މޮޅަށް ކުޅެ އެވެ.
