ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ސަލާމަތީ ކަންކަން ސިފައިން ވަރުގަދަކޮށް ހާއްސަ އޮޕަރޭޝަނެއް ހިންގަން ފަށައިފި އެވެ.
ސިފައިންގެ ތަރުޖަމާން، ކެޕްޓަން އިބްރާހިމް އާޒިމް، "އަދަދު"އަށް މިއަދު ވިދާޅުވީ ރެއިން ފެށިގެން ވީއައިއޭގައި ހާއްސަ އޮޕަރޭޝަނެއް ހިންގަން ފެށީ ލިބުނު މައުލޫމާތަކާ ގުޅިގެން ކަމަށެވެ.
އިތުރު ތަފްސީލެއް އޭނާ ނުދެއްވި އެވެ.
ހަތިޔާރާއެކު އެއާޕޯޓްގެ އެކި ހިސާބުތަކުގައި ގިނަ އަދަދެއްގެ ސިފައިން އަންނަނީ ހަރަކާތްތެރިވަމުންނެވެ. ކުރިއާ ހިލާފަށް އެެއާޕޯޓަށް ވަދެ ނުކުންނަ ހުރިހާ ވެހިކަލެއް ވެސް ސިފައިން ދަނީ ބަލައި ފާސް ކުރަމުންނެވެ.
އެގޮތުން، ކާރުތަކުގެ ޑިކީތަކާއި ސައިކަލްތަކުގެ މަޑިތައް ވެސް ބަލައި ފާސްކުރެ އެވެ. އަދި އެއާޕޯޓަށް މީހުން ގެންދާ އެއްޗެހި ވެސް ސިފައިން ގާތުން ބަލަ އެވެ.
އެނގިފައިވާ ގޮތުގައި، އެއާޕޯޓް ސެކިއުރިޓީ މިހާ ވަރުގަދަކޮށްފައިމިވަނީ އެއާޕޯޓުގައި ހަމަލާއެއް ދޭނެ ކަމަށް ބުނެ ސިފައިންނަށް ލިބިފައިވާ މައުލޫމާތާ ގުޅިގެންނެވެ. ނަމަވެސް، އެކަމާ ގުޅޭ ގޮތުން މިހާތަނަށް އެއްވެސް އެއްޗެއް ސިފައިން ނުބުނެ އެވެ.
ހަތިޔާރާއެކު ސިފައިން ހަރަކާތްތެރިވަނީ: އެއާޕޯޓްގެ ސެކިއުރިޓީވެސް ވަނީ ވަރުގަދަ ކޮށްފައި-- ފޮޓޯ: ހުސައިން ވަހީދު/ އަދަދު
ސަލާމަތީ ކަންކަން ސިފައިން ވަރުގަދަ ކޮށްފައި މިވަނީ މިދިޔަ ހަފްތާގެ ބުރާސްފަތި ދުވަހުގެ ރޭ ރައްޔިތުންގެ މަޖިލީހުގެ ރައީސް، މުހައްމަދު ނަޝީދު އަވަހާރަ ކޮށްލުމަށް ދިން ހަމަލާއަށް ފަހުގަ އެވެ. ސައިކަލެއްގައި ހަރުކޮށްފައިވާ އައިއީޑީއެއް ގޮއްވާލައި ދިން ހަމަލާގައި ނަޝީދުގެ ފުރާނަ ސަލާމަތްވީ ކިރިޔާ އެވެ.
އެ ހަމަލާއަށް ފަހު ސިފައިންނާއި ފުލުހުން ވަނީ މާލޭގެ އިތުރުން ރާއްޖޭގެ އެކި ހިސާބުތަަކުގެ ސަލާމަތީ ކަންކަން ވަރުގަދަ ކޮށްފަ އެވެ. ހަތިޔާރާއެކު ރާއްޖޭގެ އެކި ހިސާބުތަކުގައި ސިފައިން އަންނަނީ ހަރަކާތްތެރިވަމުންނެވެ.
