މިއުނިކް (މެއި 14) - ޖަރުމަނު ކަޕް ފައިނަލުގައި މިރޭ 4-1 އިން އާރްބީ ލައިޕްޒިގު ބަލިކޮށް ބޮރޫޝިއާ ޑޯޓްމަންޑުން މުބާރާތުގެ ޗެމްޕިއަންކަން ހޯދައިފި އެވެ.
މިއީ ޑޯޓްމަންޑުން މި މުބާރާތުގެ ޗެމްޕިއަންކަން ހޯދި ފަސް ވަނަ ފަހަރެވެ. އެ ޓީމުން އެންމެ ފަހުން މި މުބާރާތުގެ ތަށި އުފުލާލީ 2017 ވަނަ އަހަރު އެވެ.
ފުރަތަމަ މިނިޓުން ފަށައިގެން މޮޅު ކުޅުމެއް ދައްކަމުން ދިޔަ ޑޯޓްމަންޑުން ވަނީ ފުރަތަމަ ހާފުގައި ތިން ގޯލު ޖަހައިފަ އެވެ. މެޗުގެ ފަސް ވަނަ މިނިޓްގައި ޖޭޑަން ސަންޗޯ ވަނީ ޑޯޓްމަންޑަށް ލީޑުނަގައިދީފަ އެވެ. މާކޯ ރެއުސް ދިން ބޯޅައަކުން މެޗުގެ 28 ވަނަ މިނިޓްގައި އާލިން ބްރައުޓް ހާލަންޑް ވަނީ ޑޯޓްމަންޑްގެ ލީޑު ފުޅާކޮށްދީފަ އެވެ. އަދި ފުރަތަމަ ހާފުގެ އިތުރު ވަގުތުގައި ރެއުސް މި ފަހަރު ތަނަވަސްކޮށްދިން ފުރުސަތަކުން ގޯލު ޖެހީ ސަންޗޯ އެވެ.
ލަނޑު ޖެހުމަށް ފަހު ރެއުސް (ކ) އާއި ސަންޗޯ ބައްދާލައިގެން.-- ފޮޓޯ: ޑޯޓްމަންޑް
މެޗުގެ 71 ވަނަ މިނިޓްގައި ކްރިސްޓޮފާ އެންކުންކޫ ދިން ބޯޅައަކުން ސްޕެއިނުގެ މިޑްފީލްޑަރު ޑެނީ އޮލްމޯ ވަނީ ލައިޕްޒިގަށް ލަނޑެއް ޖަހައިދީ އުއްމީދެއް ހޯދައިދީފަ އެވެ. އެކަމަކު މެޗު ނިމެން ތިން މިނިޓަށް ވެފައި ވަނިކޮށް ހާލަންޑް ވަނީ ޑޯޓްމަންޑަށް ހަތަރު ވަނަ ގޯލެއް ޖަހައިދީފަ އެވެ. މިއީ ސަންޗޯ ދިން ބޯޅައަކުން ހާލަންޑް ޖެހި ގޯލެކެވެ.
ލައިޕްޒިގުގެ ކޯޗު ހޫލިއަން ނާގަލްސްމަން މި ސީޒަނަށް ފަހު ބަޔާން މިއުނިކާ ހަވާލުވާން ނިންމާފައިވާއިރު، ތަށްޓަކާ އެކު ލައިޕްޒިގުގެ ޗެޕްޓަރު ނިންމާލަން ލިބުނު ފުރުސަތު މިރޭގެ ފައިނަލުން ބަލިވުމުން ގެއްލުނީ އެވެ.
އަނެއްކޮޅުން މި ސީޒަނުގެ ނިޔަލަށް ވަގުތީ ކޯޗެއްގެ ގޮތުގައި ޑޯޓްމަންޑާ ހަވާލުވެ ހުރި އެޑިން ޓާޒިޗަށް މިއީ ކޯޗިން ކެރިއަރުގައި ލިބުނު ފުރަތަމަ ތަށްޓެވެ. އޭނާ އަކީ 1999 ވަނަ އަހަރަށް ފަހު ޖަރުމަނު ކަޕް ކާމިޔާބުކުރި އެންމެ ޒުވާން ކޯޗެވެ. ޓާޒިޗްގެ އުމުރަކީ 38 އަހަރެވެ.
