އެމްއެމްޕީއާރްސީގެ ހިޔާނާތުގައި އެއްވެސް މިންވަރަކަށް ބައިވެރިވެފައިނުވާނެ ކަމަށާއި، ކުރީގެ ނައިބު ރައީސް އަހުމަދު އަދީބަށް ފޯރުކޮށްދިނީ ގާނޫނީ އެހީތެރިކަން އެކަނި ކަމަށް ކެންދޫ ދާއިރާގެ މެންބަރު އަލީ ހުސެއިން ވިދާޅުވެއްޖެ އެވެ.
ހިޔާނާތް ބަލައި އެކަން ދިރާސާ ކުރަމުންދާ ސަލާމަތީ ހިދުމަތްތަކުގެ ކޮމިޓީ އާއި ޖުޑިޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީން ވަނީ ރިޕޯޓާއެކު މުޅި ލިސްޓް މިއަދު އާއްމުކޮށްފަ އެވެ. މިއީ، މި ލިސްޓް ރަސްމީ ފަރާތަކުން އާންމުކުރި ފުރަތަމަ ފަހަރެވެ.
ލިސްޓްގައި ކެންދޫ ދާއިރާގެ މެންބަރުގެ ނަން ވެސް ހިމަނާފައިވާއިރު އެމްއެމްޕީއާރްސީގެ ފައިސާއިން ބައި ލައްކަ ރުފިޔާ އޭނާއަށް ލިބުނު ކަމަށް ތުހުމަތު ކުރެވެ އެވެ.
ނަމަވެސް، އެއީ އެމްއެމްޕީއާރްސީގެ ހިޔާނާތުގެ ފައިސާކަން އަލީ ހުސެއިން ދޮގު ކުރައްވަ އެވެ. އޭނާ މީގެކުރިން ވެސް އެ ވާހަކަތައް ވަރަށް ތަފްސީލުކޮށް ކިޔައިދެއްވާފައިވެ އެވެ. އެކަމަކު، އޭނާގެ ނަން އަދިވެސް ލިސްޓްގައި އޮތުމުން މިރޭ ވަނީ ކަންބޮޑުވުން ފާޅުކުރައްވާފަ އެވެ.
"އަޅުގަނޑަށް އެމްއެމްޕީއާރްސީގެ އެއްވެސް ފައިސާއެއް ލިބިފައެއް ނޯންނާނެ، އަޅުގަނޑަކީ އެ ބޮޑު ހިޔާނާތުގެ ބައިވެރިއެއް ނޫން، މަޖިލީހަށް ހޮވުމުގެ ކުރިން އަދީބުގެ ގާނޫނީ ވަކީލަކަށްވުމަކީ އަޅުގަނޑުގެ ނަން ހިޔާނާތުގެ ބައިވެރިއެއްގެ ގޮތުގައި އޮންނަންޖެހޭ ސަބަބެއް ނޫން." އަލީ ހުސެއިން ވިދާޅުވި އެވެ.
އަލީ ހުސެއިން ވިދާޅުވި ގޮތުގައި، 2011 ވަނަ އަހަރުން ފެށިގެން މެއި 2014 ވަނަ އަހަރު ރައްޔިތުންގެ މަޖިލީހުގެ މެންބަރު ކަމުގެ ހުވާކުރުމާ ހަމައަށް އަދީބުގެ އެދުމުގެ މަތިން ތަފާތު އެކި މައްސަލަތަކުގަ އާއި އަދި ވިޔަފާރިވެރިންގެ ޖަމިއްޔާގެ ގާނޫނީ ވަކީލުގެ ހައިސިއްޔަތުން ތަފާތު އެކި މައްސަލަތަކުގައި ގާނޫނީ ގޮތުން ކުރަން ޖެހޭ މަސައްކަތްތައް ކޮށްދީފައިވާނެ ކަމެވެ.
އެކަން ސާބިތުކޮށްދެވޭނެ ކިތާބީ އަދި ޝަފަހީ ހެކި އެބަހުރި،" އަލީ ހުސެއިން ވިދާޅުވި އެވެ.
ޖުމްހޫރީ ޕާޓީއަށް ނިސްބަތްވާ އަލީ ވިދާޅުވީ، އެއްވެސް ޒިންމާދާރު ކަމެއް ނެތި ހަމަ ހޭވެސް އަހާލުމެއް ނެތި އަދި ދިފާއުވުމުގެ ފުރުސަތު ވެސް ނުދީ ރައްޔިތުންގެ މަޖިލީހުން އެމްއެމްޕީއާރްސީގެ ހިޔާނާތުގެ ލިސްޓް ކަމަށް ބުނެ ލިސްޓެއް އާންމުކޮށް މީހުންގެ އަބުރު ކަތިލުމަކީ ވަރަށް ޒިންމާދާރުކަން ކުޑަ ދަށު ދަރަޖައިގެ އަމަލެއް ކަމަށެވެ.
"މައުސޫމް ކިތަންމެ މީހުންނެއްގެ ފޮޓޯ އާއި ނަން އެ ލިސްޓްގައި އެބަ އޮތްކަން ހަމަ ޔަގީން، ހަމަ ގައިމު ވެސް އަޅުގަނޑު އެމްއެމްޕީއާރްސީގެ ހިޔާނާތުގައި އެއްވެސް ގޮތަކަށް ބައިވެރިވެފައެއް ނޯންނާނެ،" އަލީ ވިދާޅުވި އެވެ.
ލިސްޓްގައި ހިމެނޭ ގިނަ ބަޔަކަށް މިހާތަނަށް އެއްވެސް ސުވާލެއް ވެސް ނުކޮށް، ލިސްޓް އާންމުކުރުމުން އޮތް ކަންބޮޑުވުން ބޮޑެވެ.
އެކަމަށް އިޝާރާތް ކުރައްވައި އެސެޓް ރިކަވަރީ ކޮމިޝަންގެ ރައީސް އަހުމަދު އައްސަދު ވިދާޅުވީ މިހާރު އޮތް ލިސްޓުގައި ހިމެނޭ ފަރާތްތަކަކީ "ޕާސަންސް އޮފް އިންޓްރެސްޓް" ލިސްޓެއް ކަމަށެވެ. އެހެން ގޮތަކުން ބުނާ ނަމަ ސުވާލުކޮށް ކަންތައްތަކެއް ސާފުކުރަން ބޭނުންވާ ބަޔެއްގެ ލިސްޓު ކަމަށާއި އެ މީހުންނަކީ ކުށްވެރިން ކަމުގައި ނުނިންމާ ކަމަށެވެ.
"އަޅުގަނޑުމެންގެ ލިސްޓަކީ ޕާސަންސް އޮފް އިންޓްރެސްޓް ލިސްޓެއް. އެއީ ކުށްވެރިން ކަމުގައި ނިންމުމަކީ އަޅުގަނޑުމެންގެ އިހުތިޔާރުގައި އޮތް ކަމެއް ނޫން،" އައްސަދު ވިދާޅުވި އެވެ.
ވަރަށް ގިނަ މީހުން މިހާތަނަށް ސުވާލެއް ވެސް ކޮށް ނުލާ ކަމަށް ބުނަމުންދާއިރު، އޭގެ ތެރޭގައި އޮޑިޓާ ޖެނަރަލްގެ މަގާމުގައި ހުންނެވި ހަސަން ޒިޔާތު ވެސް ހިމެނެ އެވެ. ޒިޔާތު ވަނީ ލިސްޓްގައި ނަން އޮތްކަން ވެސް އެނގިވަޑައިނުގަންނަވާ ކަމާއި، އެއްވެސް ސުވާލެއް ވެސް މިހާތަނަށް ކޮށްފައިނުވާ ކަމަށް ވިދާޅުވެފަ އެވެ.
އެ ފައިސާއަކީ ކެމްޕެއިނަށް ޕާޓީން ލިބުނު ފައިސާ ކަމަށް ވެސް ޒިޔާތު ވިދާޅުވެފަ އެވެ. ނަމަވެސް، ލިސްޓްގައި ނަން ހިމެނުމުން ޒިޔާތު ވަނީ އަމިއްލައަށް އިސްތިއުފާ ދެއްވާފަ އެވެ. އޭނާ ގަބޫލު ކުރައްވާ ގޮތުގައި، އެއީ ތަހުޒީބީ މުޖުތަމައުތަކުގައި މީހުން އަމަލު ކުރާ ގޮތެވެ.
ލިސްޓް އާންމުކުރުމުގެ އިތުރުން މަޖިލީހުގެ ކޮމިޓީން ވަނީ އައްޔަންކޮށްފައިވާ މަގާމުތަކުގައި ތިބި މީހުން މަގާމުތަކުން ވަކިކުރަން މަސައްކަތް ފެށުމަށް ނިންމާފަ އެވެ. އަދި، އިންތިހާބީ މަގާމުތަކުގައި ތިބި މީހުންނަކީ އަމިއްލައަށް އިސްތިއުފާ ދިނުމުން ނޫނީ ހުކުމެއް ސާބިތުވެގެން ނޫން ގޮތަކަށް ވަކިވާނެ ބަޔަކަށް ނުވާތީ، އެފަދަ މީހުންގެ މައްސަލަތައް އަވަސް ކުރުމަށް ކަމާބެހޭ އިދާރާތަކަށް ދެންނެވުމަށް ވެސް ކޮމިޓީން ނިންމާފައިވެ އެވެ.
