ކޮވިޑްގެ ހާލަތު ގޯސްވަމުންދާއިރު ރާއްޖޭގައި އިންސާނީ ވަސީލަތްތައް އެވަރަށް ނެތް ކަމަށާއި، އެހެންކަމުން އެންމެ މުހިންމު ކަމަކީ ފަރުދީ ޒިންމާ އަދާކޮށް ފިޔަވަޅުތަކަށް ކަމޭހިތުން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރާއްޖޭގައި ކޮވިޑްގެ ހާލަތު މީގެކުރިން ގޯސްނުވާ މިންވަރަށް ގޮސްފައިވާއިރު، ސަރުކާރުން ވަނީ ފިޔަވަޅުތައް ވެސް ހަރުކަށިކޮށްފަ އެވެ. އެގޮތުން މާލޭގައި ހަވީރުން ފެށިގެން ކާފިއު ހިންގުމުންދާއިރު މިސްކިތްތަކާއި ރެސްޓޯރެންޓްތައް ވެސް ވަނީ ބަންދުކޮށްފަ އެވެ.
ފިތުރު އީދު ދުވަހުގެ މުނާސަބަތުގައި ރައީސް ގައުމާ މުހާތަބު ކުރައްވަމުން ވިދާޅުވީ، މިހާރުގެ ހާލަތަށް ބަލާއިރު، މި ބައްޔާ ދެކޮޅަށް އެންމެންނަށް އެކުގައި މަސައްކަތް ނުކުރެވިއްޖެނަމަ، ސިއްހީ ނިޒާމަށް އޮބިނޯންނަ މިންވަރަށް ހާލަތު ގޯސްވެދާނެ ކަމަށެވެ.
"މިއަދު އަޅަން ފަށާފައިވާ ފިޔަވަޅުތައް ފުރިހަމައަށް ތަންފީޒުކުރުމުގައި، ރައްޔިތުންގެ އެއްބާރުލުން އިންތިހާއަށް ބޭނުންވާނެ. ތިމާގެ އަމިއްލަ ސިއްހަތަށް އެކަންޏެއް ނޫން. މުޅި މުޖްތަމައުގެ ރައްކަލަށްޓަކައި މިފިޔަވަޅުތައް ތަންފީޒުކުރަންޖެހޭ. އަދިވެސް ވަގުތު ފާއިތެއް ނުވޭ. އަޅުގަނޑުމެންގެ ފަރުދީ ޒިންމާއަށް ވުރެ، މިބަލި ކޮންޓްރޯލް ކުރުމުގައި މުހިންމު ދައުރެއް އަދާކުރާ، އެހެން އެއްވެސް ކަމެއް ނެތް." ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވި ގޮތުގައި، މިއަދު އަޅަން ފެށި ފިޔަވަޅުތަކަށް ރަނގަޅަށް އަމަލުނުކޮށްފިނަމަ، އިތުރު ފިޔަވަޅުތައް އަޅަންޖެހުމަކީ އެކަށީގެންވާ ކަމެއް ކަަމަށެވެ. އެފަދަ ފިޔަވަޅުތަކެއް އަޅަން ފަށައިފިނަމަ، މިހާރަށް ވުރެ މާ ގިނަ ދަތިތައް ކުރިމަތިވާނެ ކަމަށް ވެސް ވިދާޅުވި އެވެ.
"ކުރިއަށް އޮތް މަސްދުވަހު، ހިތްވަރާއެކު އެންމެން އެކުގައި މަސައްކަތް ކޮށްފިއްޔާ، މިބަލިމަޑުކަމުން އަރައިގަތުމުގެ އަލިމަގު، މާތް ﷲގެ ވާގިފުޅާއެކު އަޅުގަނޑުމެންނަށް ފެންނާނެ. ރާއްޖެއަށް ބޭނުންވާ މިންވަރަށް، ބޭސްފަރުވާގެ ވަސީލަތްތަކާއި ސިއްހީ ދުމަތްތަކަށް ބޭނުންވާ އާލާތްތައް ހުރި ނަމަވެސް، އިންސާނީ ވަސީލަތްތައް އެވަރަކަށް ނެތް." ރައީސް ވިދާޅުވި އެވެ.
ގައުމީ ހިދުމަތެއްގެ ގޮތުގައި، އާއިލާތަކާ ވަކިން، ވަރަށް ބުރަކޮށް މަސައްކަތް ކުރައްވަމުން ގެންދަވާ، ސިއްހީ ހިދުމަތްތެރިންނާއި ސަލާމަތީ ބާރުތަކުން، އަދި ހިލޭ ސާބަހަށް މަސައްކަތް ކުރާ ހުރިހާ ބޭފުޅުންވެސް، ކޯވިޑް ކޮންޓްރޯލް ކުރުމުގައި، ވެވަޑައިގަންނަވަނީ ވަރަށް މަތިވެރި ގުރްބާނީއެއް ކަމަށާއި، ރެޔާއި ދުވާލުގެ ގިނަ ވަގުތުތައް އެބޭފުޅުން އެހޭދަކުރެއްވީ، ކޯވިޑް ކޮންޓްރޯލް ކުރުމުގެ މަސައްކަތުގައި ކަމަށް ރައީސް ވިދާޅުވި އެވެ.
"އެހެންކަމުން، މިއުފާވެރި ފިތުރު އީދުގައިވެސް، އެބޭފުޅުން އެކުރައްވާ ދީނީ އަދި ގައުމީ ޖިހާދުގެ އަގު ވަޒަންކޮށް، އެހުރިހާ ބޭފުޅުންނަށް ނުހަނު އިހްލާސްތެރިކަމާއެކު ޝުކުރު ދަންނަވަމުން،" ރައީސް ވިދާޅުވި އެވެ.
އިއްޔެ މުޅި ރާއްޖޭން ޖުމްލަ 1،501 މީހުން ޕޮޒިޓިވް ވެފައިވާއިރު އޭގެ ތެރެއިން އިއްޔެ ހަވީރު 6:00 އާ ހަމައަށް 24 ގަޑިއިރުގެ ތެރޭގައި ޕޮޒިޓިވް ވެފައިވަނީ 662 މީހުންނެވެ.
ދެން ޕޮޒިޓިވްވި މީހުންގެ ތެރޭގައި މިމަހު ތިން ވަނަ ދުވަހުން ފެށިގެން އާދިއްތަ ދުވަހާ ހަމައަށް ނަގާފައިވާ ސާމްޕަލްތައް ވެސް ހިމެނެ އެވެ. ބެކްލޮގް ސާމްޕަލްތައް 53 ސާމްޕަލަށް މިހާރު ވަނީ މަދުކޮށްފަ އެވެ.
އިއްޔެ ޕޮޒިޓިވްވި މީހުންނާއެކު މިވަގުތު ރާއްޖޭގައި ކޮވިޑް ޖެހިފައިވާ 11،629 މީހުން އެބަތިއްބެވެ. އޭގެ ތެރެއިން 247 މީހުން ތިބީ ހޮސްޕިޓަލްގައި އެޑްމިޓް ކޮށްފަ އެވެ. އަތޮޅުތެރޭގެ 40 ރަށެއް މޮނީޓަރިންއަށް ލައިފައިވާއިރު އެކްޓިވް ކޭސްގެ ގޮތުގައި 3،103 މީހުން އެބަތިއްބެވެ.
