ބެޑްމިންޓަން އެސޯސިއޭޝަން އިން މި އަހަރުގެ ކަލަންޑަރު އެކުލަވާލިއިރު ދުނިޔޭގެ ފެޑެރޭޝަން ބީޑަބްލިއުއެފް އިން ރުހުންދީފައިވާ ދެ ބައިނަލްއަގުވާމީ މުބާރާތެއް ބާއްވަން ހިމެނި ނަމަވެސް މިހާރު ރާއްޖޭގެ ހާލަތު މި ބަދަލުވާ ގޮތުން އެ މުބާރާތްތައް ބޭއްވުމާ މެދު އިތުރަށް ވިސްނަން ޖެހިފައިވާ ކަމަށް ބެޑްމިންޓަން އެސޯސިއޭޝަންގެ ރައީސް މޫސާ ނާޝީދު (މޫސަ) ވިދާޅުވެއްޖެ އެވެ.
ބެޑްމިންޓަން އެސޯސިއޭޝަންގެ ކަލަންޑަރުގައި ގައުމީ އަދި ބައިނަލްއަގުވާމީ މުބާރާތްތަކުގެ ގޮތުގައި މި އަހަރަށް 18 މުބާރާތް ހިމަނާފައިވެ އެވެ. އޭގެ ތެރެއިން ތާރީހެއް ފައިނަލް ކޮށްފައި އޮތީ ހަމައެކަނި ދެ އިންޓަނޭޝަނަލް މުބާރާތައް އެކަންޏެވެ. އެއީ އޮކްޓޫބަރު 4-10 އަށް ކުރިއަށް ގެންދާ މޯލްޑިވްސް އިންޓަނޭޝަނަލް ފިއުޗާ ސީރީސް އާއި 11-17 އޮކްޓޫބަރުގައި ބާއްވަން ނިންމި މޯލްޑިވްސް އިންޓަނޭޝަނަލް ސީރީސް އެވެ.
މި މުބާރާތް ބާއްވާނެ ތާރީހެއް ހިމަނާފައިވާ އެންމެ ބޮޑު ސަބަބަކީ ބައިނަލްއަގުވާމީ މުބާރާތަކަށް ވެފައި ދުނިޔޭގެ ފެޑެރޭޝަންގެ އެކްރެޑިޓޭޝަން ހޯދުމުގެ ގޮތުންނެވެ.
ބެޑްމިންޓަނުގެ ދުނިޔޭގެ ފެޑެރޭޝަން ބީޑަބްލިއުއެފްގެ ކައުންސިލް މެމްބަރުކަމާއި ބެޑްމިންޓަން އޭޝިއާ އާއި ދެކުނު އޭޝިއާގެ ބެޑްމިންޓަން އެސޯސިއޭޝަންގެ ޖެނެރަލް ސެކްރެޓަރީގެ މަގާމު ފުރުއްވަމުން އަންނަ މޫސަ "އަދަދު" އަށް ވިދާޅުވީ ހާލަތު ބަދަލުވަމުން އަންނަ ގޮތަށް ބަލާއިރު އެ ދެ މުބާރާތް ބޭއްވުން ވަރަށް ބޮޑަށް އުނދަގޫވެފައިވާ ކަމަށެވެ.
މޯލްޑިވްސް އޮލިމްޕިކް ކޮމިޓީގެ ބައްދަލުވުމެއްގެ ތެރެއިން މޫސަ.-- ފޮޓޯ: މޯލްޑިވްސް އޮލިމްޕިކް ކޮމިޓީ
"އިންޓަނޭޝަނަލް މުބާރާތް ހޯސްޓް ކުރަން ވަރަށް ގިނަ ފަރާތްތަކުން ޝާމިލުވާތީ ޖެހޭ ހުއްދަތައް ހޯދަން. އެކަންކަން ފުރިހަަމަ ކޮށްފައި މުބާރާތްތައް ކަލަންޑަރު ކުރީ. އެކަމަކު މިހާރު ރާއްޖޭގެ ހާލަތު (ކޮވިޑް-19ގެ ސަބަބުން) މި ބަދަލުވަމުން އަންނަ ގޮތަށް ބަލާއިރު ވަރަށް އަންލައިކްލީ (ހިއެއްނުވޭ). އިތުރަށް ވިސްނަން ޖެހިފައި މި އޮތީ މުބާރާތް ހޯސްޓް ކުރުމާ މެދު. އުއްމީދު ދޫކޮށެއް ނުލަން،" ބީއޭއެމްގެ ރައީސްކަމުގެ ތިން ވަނަ ދައުރަކަށް ހޮވިވަޑައިގެން މުހިއްމު މަސައްކަތްތަކެއް ކުރެއްވުމުގެ އަމާޒުގައި ހުންނެވި މޫސަ ވިދާޅުވި އެވެ.
ގާތްގަނޑަކަށް ހަޔެއްކަ އަހަރުގެ މެދުކެނޑުމަކަށް ފަހު ރާއްޖޭން ބޭއްވި ފުރަތަމަ ބައިނަލްއަގުވާމީ ބެޑްމިންޓަން މުބާރާތަކީ 2019 ވަނަ އަހަރުގެ ސެޕްޓެމްބަރުގައި މޯލްޑިވްސް ބޭއްވި ފިއުޗާ ސީރީސް އެވެ. އޭގެ ފަހުން އެ އަހަރު ބެޑްމިންޓަން ޗެލެންޖްގެ ނަމުގައި އިތުރު ބައިނަލްއަގުވާމީ މުބާރާތެއް ބޭއްވުމަށް ފަހު އައްޑޫގައި ދެކުުނު އޭޝިއާގެ 21 އަހަރުން ދަށުގެ މުބާރާތް ވެސް ހޯސްޓްކުރި އެވެ. މިއީ މާލެ އިން ބޭރުގައި ބައިނަލްއަގުވާމީ މުބާރާތެއް ހޯސްޓްކުރި ފުރަތަމަ ފަހަރެވެ.
މިދިޔަ އަހަރު ކޮވިޑާ ހެދި ބެޑްމިންޓަން އެސޯސިއޭޝަނުން ރޭވި ގިނަ ހަރަކާތްތައް ކުރިއަށް ނުގެންދެވުނެވެ. އެކަމަކު ޑިސެމްބަރު މަހުގެ ތެރޭގައި ގައިޑްލައިންތަކެއްގެ ތެރެއިން ލިބުނު ފުރުސަތެއްގެ ބޭނުން ހިފައި ޓީމު އިވެންޓް މުބާރާތެއް ބޭއްވި އެވެ.
ރާއްޖޭގައި 2010 އިން 2013 އަށް އިންޓަނޭޝަނަލް ބެޑްމިންޓަން މުބާރާތެއް ގަވާއިދުން ކުރިއަށްގެންދިޔަ އެވެ. ދުނިޔޭގެ ރޭންކިން ރަނގަޅު ލެވަލެއްގެ ކުޅުންތެރިން އެ މުބާރާތްތަކުގައި ކުޅުނެވެ. އެ މުބާރާތް 2013 ވަނަ އަހަރު ބޭއްވުމަށް ފަހު ހުއްޓުނީ އެވެ. އެއީ 2014 ވަނަ އަހަރު ކުޅިވަރު އެކުވެނި އިމާރާތަށް ލިބުނު ގެއްލުމެއްގެ ސަބަބުންނެވެ. ފަހުން އެ އިމާރާތް އަލުން ހެދިއިރު، ދާދި ފަހުން މި ސަރުކާރުން ވަނީ މާލޭ އެކުވެނި ބެޑްމިންޓަން ހޯލުގައި އިތުުރު ކޯޓުތަކެއް ތަރައްގީ ކޮށްފަ އެވެ.
ރާއްޖޭގައި ކޮވިޑްގެ ނުރައްކާ މި ދުވަސްވަރު ބޮޑުވެފައިވާތީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެންގުމާ އެއްގޮތަށް އަމަލުކުރުމުގެ ގޮތުން ބެޑްމިންޓަން އެސޯސިއޭޝަނުން ވަނީ އެކުވެނި ކޯޓު ބަންދުކޮށްފަ އެވެ.
