މެންޗެސްޓާ (މެއި 12) - އިނގިރޭސި ޕްރިމިއާ ލީގުގެ ދެ ވަނައިގައި އޮތް މެންޗެސްޓާ ޔުނައިޓެޑް މިރޭ އަމިއްލަ ދަނޑުގައި 2-1 އިން ލެސްޓާ ސިޓީ އަތުން ބަލިވުމުން، ބާކީ ތިން މެޗު އޮއްވައި ލީގުގެ ޗެމްޕިއަންކަން މެންޗެސްޓާ ސިޓީ އަށް ލިބިއްޖެ އެވެ.
މިއީ ފާއިތުވި ހަތަރު އަހަރު ތެރޭ ސިޓީން ލީގުގެ ތަށި އުފުލާލި ތިން ވަނަ ފަހަރެވެ. އަދި ފާއިތުވި 10 އަހަރު ތެރޭ ލީގުގެ ޗެމްޕިއަންކަން ހޯދި ފަސް ވަނަ ފަހަރެވެ. ސިޓީން ވަނީ އިންގްލެންޑްގެ ޗެމްޕިއަންކަން ޖުމްލަ ހަތް ފަހަރު ހޯދައިފަ އެވެ. ސިޓީ އަކީ ޕްރިމިއާ ލީގުގެ ތާރީހުގައި ޑިސެމްބަރު މަހު އަށް ވަނައިގައި އޮތުމަށް ފަހު ލީގު ޗެމްޕިއަންކަން ހޯދި ފުރަތަމަ ޓީމެވެ.
ސިޓީ އަށް ޗެމްޕިއަންކަން ލިބުނީ 35 މެޗުން 80 ޕޮއިންޓް ހޯދައިގެންނެވެ. ޔުނައިޓެޑަށް 35 މެޗުން ލިބުނީ 70 ޕޮއިންޓެވެ. އަދި ބާކީ ތިން މެޗުން ޔުނައިޓެޑް މޮޅުވި ނަމަވެސް އެ ޓީމަށް ސިޓީއާ ހަމަނުކުރެވޭނެ އެވެ. މި މޮޅާ އެކު ލެސްޓާ ވެސް ވަނީ ތިން ވަނަ އަށް ޖެހިލައިފަ އެވެ. އެއީ 36 މެޗުން 66 ޕޮއިންޓް ހަމަކޮށްގެންނެވެ. ކުރިން ތިން ވަނައިގައި އޮތް ޗެލްސީ އަށް 35 މެޗުން ލިބިފައިވަނީ 64 ޕޮއިންޓެވެ. މާދަމާރޭ އާސެނަލް ބަލިކޮށްގެން ޗެލްސީ އަށް އަލުން ތިން ވަނަ އަށް އެރޭނެ އެވެ.
މިއީ ޕެޕް ގާޑިއޯލާގެ ކޯޗުކަމުގައި ކުޅޭ ސިޓީން މި ސީޒަނުގައި ކާމިޔާބުކުރި ދެ ވަނަ ޓްރޮފީ އެވެ. ސިޓީން ވަނީ ޓޮޓެންހަމް ބަލިކޮށް ލީގު ކަޕް ވެސް އުފުލާލައިފަ އެވެ. އެކަމަކު އެފްއޭ ކަޕްގެ ސެމީ ފައިނަލުން ޗެލްސީ އަތުން ކަޓައި ހަތަރު ތަށި ހޯދުމުގެ އުއްމީދަށް ނިމުން އަ އެވެ. ސިޓީން މި ސީޒަނުގައި ތިން ތަށި ހޯދައިގެން ނިންމާލުމުގެ ފުރުސަތު އެބައޮތެވެ. މި މަހުގެ 29 ވަނަ ދުވަހު ޗެމްޕިއަންސް ލީގުގެ ފައިނަލުގައި ސިޓީ ބައްދަލުކުރާނީ ޗެލްސީއާ އެވެ.
ލަނޑު ޖެހުމަށް ފަހު ލެސްޓާ ކުޅުންތެރިން އުފާފާޅުކުރަނީ.-- ފޮޓޯ: އޭއެފްޕީ
އާދިއްތަ ދުވަހު އެސްޓަން ވިލާ އަތުން ފަހަތުން އަރައި ޔުނައިޓެޑުން މޮޅުވި މެޗުގައި އެ ޓީމުން ބޭނުންކުރި ފުރަތަމަ އެގާރަ އަށް މި މެޗަށް ނުކުތްއިރު ވަނީ ގިނަ ބަދަލުތަކެއް ގެނެސްފަ އެވެ. ލެސްޓާ އިން މެޗުގެ 10 ވަނަ މިނިޓްގައި ލީޑުނެގީ ލޫކް ތޯމަސް ޖެހި މޮޅު ގޯލުންނެވެ. ޔޫރީ ޓިއެލެމަންސް ނެގި ހުރަހަކުން ތޯމަސް ފޮނުވާލި ބޯޅަ އަމާޒުވީ ގޯލުގެ މަތީ ކަަނަށެވެ. ފުރަތަމަ ހާފުގައި ޔުނައިޓެޑަށް އެއްވަރުކޮށްދިނީ މޭސަން ގްރީންވުޑް ޖެހި ގޯލުންނެވެ.
މެޗުގެ 66 ވަނަ މިނިޓްގައި ލެސްޓާ މި މެޗުން މޮޅުކޮށްދިން ގޯލު ޖެހީ ތުރުކީގެ ޑިފެންޑަރު ޝަލްގާ ސޮޔުންޗޫ އެވެ. އޭނާ މި ގޯލު ޖެހީ ކޯނަރަކުން ހުރަސްވި ބޯޅަ ބޮލުން ގޯލުގެ ތެރެއަށް ފޮނުވާލައިގެންނެވެ. ޔުނައިޓެޑުން އިތުރު ގޯލެއް ޖަހަން ބަދަލު ކުޅުންތެރިންގެ ގޮތުގައި މާކަސް ރެޝްފޯޑާއި އެޑިންސަން ކަވާނީ އަދި ބްރޫނޯ ފެނާންޑޭސް ކުޅެން އެރުވި ނަމަވެސް ގޯލެއް ޖެހޭގޮތެއްނުވި އެވެ.
މިއީ އިނގިރޭސި ޕްރިމިއާ ލީގުގައި ލެސްޓާ އިން ޔުނައިޓެޑް ދަނޑުގައި ހޯދި ފުރަތަމަ މޮޅެވެ. މިއީ ލެސްޓާ އިން އަންނަ ސީޒަނުގެ ޗެމްޕިއަންސް ލީގުން ފުރުސަތު ހޯދަން ކުރާ މަސައްކަތަށް ލިބިގެންދިޔަ ބޮޑު މޮޅެކެވެ. އެ ޓީމަށް ބާކީ އޮތް ދެ މެޗުން ހަތަރު ޕޮއިންޓް ލިބިއްޖެނަމަ އެހެން ޓީމުތަކުގެ ނަތީޖާ އަށް ބެލުމެއް ނެތި އަންނަ ސީޒަނުގެ ޗެމްޕިއަންސް ލީގުން ފުރުސަތު ލިބޭނެ އެވެ.
