މާލޭ ސަރަހައްދުގެ ހުރިހާ މިސްކިތްތަކުގައި ޖަމާއަތުގައި ނަމާދުކުރުން މަނާކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ނިންމައިފި އެވެ.
އެޗްޕީއޭއިން ބުނި ގޮތުގައި ޖަމާއަތުގައި ނަމާދު ކުރުން މަނާ ވާނީ މާދަމާއިން ފެށިގެންނެވެ. މިއީ ކޮވިޑް މާލޭގައި ފެތުރެން ފެށި ފަހުން ޖަމާއަތުގައި ނަމާދު ކުރުން މެދުކަނޑާލި ދެވަނަ ފަހަރެވެ.
މާލޭގައި ކޮވިޑްގެ ކޭސްތައް ފެންނަ މިންވަރު އިންތިހާއަށް މައްޗަށް ގޮސްފައިވާއިރު، މިއަދު އެޗްޕީއޭއިން ވަނީ މާދަމާއިން ފެށިގެން އަޅަން ނިންމާފައިވާ އިތުރު ފިޔަވަޅުތައް ވެސް އާންމުކޮށްފަ އެވެ.
އެގޮތުން، މާދަމާއިން ފެށިގެން ހަފުތާއެއްގެ މުއްދަތަށް ހަވީރު ހަތަރަކުން ފަތިހު ހަތަރަކާ ހަމައަށް މާލޭގައި ބޭރަށް ނުކުމެ އުޅުން މަނާވާނެ އެވެ. އޭގެއިތުރުން ރެސްޓޯރެންޓްތަކުގައި ތިބެގެން ކެއިންބުއިން ހުއްޓާލަން އެންގި އެވެ. އެ ތަންތަނުން ދެވޭނީ ޑެލިވަރީ އަދި ޓޭކްއަވޭ ހިދުމަތް އެކަންޏެވެ.
އެޗްޕީއޭއިން ބުނި ގޮތުގައި، ޕޮލިސް ޕާމިޓާއެކު މެންދަަމު 12އާ ހަމަޔަށް ޑެލިވަރީ ހިދުމަތަށް ފުރުސަތު ދޭނެ އެވެ. ގައިޑްލައިންއާ ހިލާފުވާ ވިޔަފާރިތައް 24 ގަޑި އިރަށް ބަންދު ކުރާނެ ކަމަށް ވެސް އެޗްޕީއޭއިން ބުންޏެވެ.
ކޮވިޑުގެ އާ ވެރިއަންޓަކާ އެކު ރާއްޖޭގެ ހާލަތު އޮތީ ވަަރަށް ބޮޑަށް ގޯސްވެފަ އެވެ. އެޗްޕީއޭ އިން ރޭ އާއްމުކުރި ހިސާބުތަކުން ދައްކާ ގޮތުގައި 1،204 މީހުން ޕޮޒިޓިވްވެފައިވެ އެވެ. މީގެތެރެއިން މާލެ ސަރަހައްދުން އެކަނި 961 މީހަކަށް ބަލި ޖެހިފައިވެ އެވެ.
މި ބަލީގައި ޒުވާނުން ވެސް ދަނީ ބޮޑުވަރުވަމުން ކަމަށެވެ. ހާއްސަކޮށް ވެކްސިންގެ ދެ ޑޯޒު ނުޖަހާ ތިބި މީހުންގެ ހާލަތު ދަށްވާ ކަން ފާހަގަވެފައިވާ ކަމަށް ޑޮކްޓަރުން ވިދާޅުވެ އެވެ.
