ރައްޔިތުންގެ މަޖިލިސް ކޮންޓްރޯލް ކުރާ އެމްޑީޕީގެ ޕާލިމަންޓްރީ ގުރޫޕުގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމްގެ ބަދަލުގައި މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އަލުން މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީއަށް ހަމަޖައްސައިފި އެވެ.
މިދިޔަ ހޮނިހިރު ދުވަހު އެ ކޮމިޓީން އީވާ ވަކިވެވަޑައިގެންނެވީ، މިދިޔަ ބުރާސްފަތި ދުވަހު މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން ލިބުނު ޒަހަމްތަކަށް އޭޑީކޭގައި ފަރުވާދެވެމުންދާތީ، މަޖިލީހުގެ ރައީސްގެ ޒިންމާތައް ނައިބު ރައީސްގެ ހައިސިއްޔަތުން އުފުއްލަވަން ޖެހިވަޑައިގަންނަވާތީ ކަމަށް ވިދާޅުވެ އެވެ.
ނަމަވެސް، ކޮމިޓީގެ ނިންމުންތަކުގައި ވޯޓު ނުލެވޭ ގޮތަށް ވީ ވަރަކުން ބައްދަލުވުންތަކުގައި ބައިވެރިވުމުގެ ފުރުސަތު ދެއްވުމަށް އީވާ އެދިވަޑައިގެންނެވި ގޮތަށް ކޮމިޓީން އެރޭ ނިންމި އެވެ.
އަދި އީވާގެ ބަދަލުގައި ތުޅާދޫ ދާއިރާގެ މެމްބަރު ހިސާން ހުސެއިން 241 ކޮމިޓީގެ އިތުރުން، އެމްއެމްޕީއާރުސީ މެދުވެރިކޮށް ހިންގި ހިޔާނާތުގެ މަންފާ ލިބުނު މީހުންކަމަށް ތުހުމަތުކޮށް އެ ހިޔާނާތް ބަލަމުންދާ ރިޔާސީ ކޮމިޝަނުން އެކުލަވާލާފައިވާ ލިސްޓު ދިރާސާކުރަމުންދާ 241 ކޮމިޓީއާއި ޖުޑީޝަރީ ކޮމިޓީގެ ޖޮއިންޓު ކޮމިޓީ އަދި ސަބް ކޮމިޓީގައި ވެސް ހިސާން ހިމެނި އެވެ.
ނަމަވެސް، ރައީސް ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތުގެ އިންކުއަރީއެއް ހެދުމާ ގުޅޭގޮތުން 241 ކޮމިޓީން މިރޭ ބޭއްވި ބައްދަލުވުމުގައި ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ އާޒިމްގެ ބަދަލުގައި އީވާ ކޮމިޓީގައި ހިމެނުމަށް ކޮމިޓީއަށް އަންގާފައިވާ ކަމަށެވެ.
އަދި ކޮމިޓީގެ ނައިބު މުގައްރިރުކަން ކުރައްވައި އާޒިމް ކޮމިޓީން ވަކިވެފައިވާތީ، އެ މަގާމަށް ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ހަމަޖައްސަން ވެސް ކޮމިޓީން ވަނީ މިރޭ ފާސްކޮށްފަ އެވެ.
އާޒިމް ކޮމިޓީން ވަކިވި ސީދާ ސަބަބެއް އޭނާ ފޯނަށް ޖަވާބު ނުދެއްވާތީ އަދި ސާފުވާގޮތް ވަނީ ނުވެފަ އެވެ.
އާޒިމް ކޮމިޓީން ވަކިވެފައިވަނީ ހިޔާނާތުގެ ލިސްޓު ދިރާސާކުރަމުންދާއިރު، މަސްލަހަތު ފުށުއަރާ އެއްވެސް މެމްބަރެއް ފާހަގަކުރެވިއްޖެ ނަމަ އެ މެމްބަރަކަށް ކޮމިޓީގެ އެ މަސައްކަތުގައި އިތުރަށް ބައިވެރިނުވެވޭގޮތް ހެދުމަށް ހޮނިހިރު ދުވަހުގެ ބައްދަލުވުމުގައި ފާސްކޮށްފައިވަނިކޮށެވެ.
ނަމަވެސް، އެއީ އާޒިމް ކޮމިޓީން މަސައްކަތުން ދުރަށްޖެހިވަޑައިގެންނެވި ސަބަބުކަމެއް ވެސް ސާފެއް ނުވެ އެވެ.
މަޖިލީހަށް އެ ލިސްޓު ލިބުމާއެކު، އޭގައި ހުރި ނަންތައް ހާމަކުރަން މަޖިލީހުގެ ބައެއް މެމްބަރުންގެ އިތުރުން އާއްމުންގެ ތެރެއިން ގިނަ ބަޔަކު ވެސް ދަނީ ގޮވާލަމުންނެވެ.
ހިޔާނާތުގެ ތަހުގީގަށް ހުރަސްއެޅިދާނެތީ، އެ ލިސްޓުގެ ސިއްރު ހިފަހައްޓަދޭން ރިޔާސީ ކޮމިޝަނުން އެދިފައިވާތީ، އެ މައުލޫމާތު ދިރާސާކުރެވެންދެން އެ އެދުމަށް އަދި އިހުތިރާމް ކުރަން ކޮމިޓީން ވަނީ ނިންމައިފަ އެވެ.
ނަމަވެސް، އެ ލިސްޓުގައި ހިމެނޭ ނަންތައް ދިރާސާކުރުމަށްފަހު ތަހުގީގަށް ސީދާ ހުރަސްނޭޅޭނެކަމަށް ކޮމިޓީއަށް ފެންނަ ނަންތައް ހާމަކުރާނެކަމުގެ އިޝާރާތެއް ކޮމިޓީން ވަނީ ދީފަ އެވެ.
އަދި އެ ލިސްޓުގައިވާ ފަރާތްތަކުގެ ތެރެއިން މިހާރު ވެސް ދައުލަތުގެ އެކި މަގާމުތަކުގައި ތިބި މީހުން މަގާމުން ދުރުކުރަން އީވާ މިރޭ ވަނީ ސަބް ކޮމިޓީއަށް ހުށަހަޅުއްވައިފަ އެވެ.
މަޖިލީހުގެ މިއަހަރުގެ ދެވަނަ ދައުރު އަންނަ ހޯމަ ދުވަހު ފެށޭއިރު، މިރޭ ހުށަހެޅުނު ހުށަހެޅުންތަކާއެކު ސަބް ކޮމިޓީގެ ރިޕޯޓު މާދަމާ ރޭ ފައިނަލް ކުރުމަށްފަހު މައި ކޮމިޓީއަށް ފޮނުވަން މެމްބަރުން ނިންމި އެވެ.
އެ ހިޔާނާތާ ގުޅިގެން ތަހުގީގު ނުނިމި ދައުވާކުރުން ދިގުލާތީ، މަޖިލީހުން އިސްވެ ކަމާބެހޭ އިދާރާތަކުގައި އެދުނީ އެމްއެމްޕީއާރުސީގެ ހިޔާނާތުން މަންފާވި ކަަމަށް ތުހުމަތު ކުރެވޭ ސަރުކާރުގެ އިސް މަގާމްތަކުގައި މިހާރާއި އަދި ކުރީގައި ތިއްބެވި ވަޒީރުންނާއި ސްޓޭޓް މިނިސްޓަރުންނާއި ޝަރުއީ ދާއިރާ އާއި ސަލާމަތީ ހިދުމަތްތަކާއި މިނިވަން މުއައްސަސާތަކާއި އަދި މަޖިލީހުގައި މިހާރު ތިއްބެވި މެމްބަރުންނާއި ކުރީގެ މެމްބަރުންގެ ލިސްޓާއި ތަހުގީގު ގޮސްފައިވާ ހިސާބު ހިއްސާކޮށް ދިނުމަށެވެ.
ފުލުހުންނާއި އެންޓި ކޮރަޕްޝަން ކޮމިޝަން އަދި އެސެޓް ރިކަވަރީ ކޮމިޝަނުން ކުރިން އާއްމުކޮށްފައިވާ ގޮތުގައި ލިސްޓުގައި 267 ނަން އޮތް ނަމަވެސް، މަޖިލީހާ މިހާރު ހިއްސާކޮށްފައިވާ ލިސްޓުގައި އަދަދު ވަނީ 280 އަށް އަރައިފަ އެވެ.
