ރާއްޖޭގެ ތާރީހުގައި މިހާތަނަށް ހިންގި އެންމެ ބޮޑު ހިޔާނާތުގެ މަންފާ ލިބުނުކަމަށް އެ ހިޔާނާތް ބަލަމުންދާ ރިޔާސީ ކޮމިޝަނުން ތުހުމަތުކުރާ ފަރާތްތަކުގެ ތެރެއިން މިހާރު ވެސް ދައުލަތުގެ އެކި މަގާމުތަކުގައި ތިބި މީހުން މަގާމުން ދުރުކުރަން ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ މިރޭ ހުށަހަޅުއްވައިފި އެވެ.
އެ ހިޔާނާތާ ގުޅިގެން ތަހުގީގު ނުނިމި ދައުވާކުރުން ދިގުލާތީ، މަޖިލީހުން އިސްވެ ކަމާބެހޭ އިދާރާތަކުގައި އެދުނީ އެމްއެމްޕީއާރުސީގެ ހިޔާނާތުން މަންފާވި ކަަމަށް ތުހުމަތު ކުރެވޭ ސަރުކާރުގެ އިސް މަގާމްތަކުގައި މިހާރާއި އަދި ކުރީގައި ތިއްބެވި ވަޒީރުންނާއި ސްޓޭޓް މިނިސްޓަރުންނާއި ޝަރުއީ ދާއިރާ އާއި ސަލާމަތީ ހިދުމަތްތަކާއި މިނިވަން މުއައްސަސާތަކާއި އަދި މަޖިލީހުގައި މިހާރު ތިއްބެވި މެމްބަރުންނާއި ކުރީގެ މެމްބަރުންގެ ލިސްޓާއި ތަހުގީގު ގޮސްފައިވާ ހިސާބު ހިއްސާކޮށް ދިނުމަށެވެ.
ފުލުހުންނާއި އެންޓި ކޮރަޕްޝަން ކޮމިޝަން އަދި އެސެޓް ރިކަވަރީ ކޮމިޝަނުން ކުރިން އާއްމުކޮށްފައިވާ ގޮތުގައި ލިސްޓުގައި 267 ނަން އޮތް ނަމަވެސް، މަޖިލީހާ މިހާރު ހިއްސާކޮށްފައިވާ ލިސްޓުގައި އަދަދު ވަނީ 281 އަށް އަރައިފަ އެވެ.
އެ މައުލޫމާތު ދިރާސާ ކުރަމުންދާ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ އާއީ ޖުޑީޝިއަރީ ކޮމިޓީގެ ޖޮއިންޓް ކޮމިޓީގެ ސަބް ކޮމިޓީން މިރޭ ބޭއްވި ބައްދަލުވުމުގައި އީވާ ވިދާޅުވީ، އެ ލިސްޓުގައި ހިމެނޭ ފަރާތްތަކުގެ ތެރެއިން ކޮމިޓީން ވެސް އެންމެ އިސްކަމެއް ދޭން ޖެހޭނީ މިހާރު ދައުލަތުގެ އެކި މަގާމުތަކުގައި ތިބި ފަރާތްތަކަށް ކަމަށެވެ.
އެއީ އީވާ ވިދާޅުވި ގޮތުގައި، އެ ފަރާތްތަކަށް އެ މަގާމުތަކުގައި ތިބެގެން ހިޔާނާތުގެ ތަހުގީގަށް ނުފޫޒު ފޯރުވުމުގެ އިތުރުން ދައުލަތުގެ މިސްރާބަށް ވެސް އެކި ކަހަލަ ނުފޫޒުތައް ފޯރުވުމުގެ ފުރުސަތު އޮންނާނެތީ ކަމަށެވެ.
އެހެންކަމުން، އެސެޓް ރިކަވަރީ ކޮމިޝަނުން ދައުވާ ކުރެވޭނެ މިންވަރަށް ހެކި ނުލިބުނު ނަމަވެސް، ނުވަތަ ޝަރީއަތުގައި ދައުވާ ސާބިތުނުވި ނަމަވެސް، އެފަދަ ފަރާތްތައް މަގާމުން ދުރުކުރުމަށް އީވާ ހުށަހެޅުއްވި އެވެ.
ކޮންމެހެން ހުކުމް އަންނަންދެން މަޑުކުރާކަށް ނުޖެހޭނެއޭ. ތަހުގީގު ހިނގަމުން ދިޔަ ނަމަވެސް މިސާލަކަށް ދައުލަތުގެ ބޮޑު މަގާމެއްގައި ހުރި މީހެއް މިވަރުގެ ބޮޑު ހިޔާނަތެއްގައި ބައިވެރިވެފަ އޮތިއްޔާ އަޅުގަނޑުމެންގެ ރިޕޯޓުގެ ރެކަމަންޑޭޝަނަކަށް ވާންޖެހޭނެއޭ މިހާރު މިހާރަށް ވެސް މަސައްކަތުން ދުރުކުރަން،" އީވާ ވިދާޅުވި އެވެ.
އަދި ރާއްޖޭގައި ފައިނޭންޝަލް ކްރައިމްސް ހުއްޓުވަން ހަރުދަނާ ކުރެވޭނެ ކަމަށް އެސެޓް ރިކަވަރީ ކޮމިޝަނުން ފާހަގަކޮށްފައިވާކަންކަން ވެސް ކޮމިޓީ ރިޕޯޓުގައި ރެކަމެންޑޭޝަނެއްގެ ގޮތުގައި ހިމަނަން ވެސް އީވާ ހުށަހެއްޅުވި އެވެ.
ކުރިން އެ ކޮމިޓީގައި އިންނެވި އީވާގެ ބަދަލުގައި ތުޅާދޫ ދާއިރާގެ މެމްބަރު ހިސާން ހުސެއިން ހަމަޖައްސާފައިވީ ނަމަވެސް، ވޯޓުގައި ބައިވެރިވެވަޑައިނުގެންނެވޭ ގޮތަށް ކޮމިޓީގެ ބައްދަލުވުންތަކުގައި އީވާއަށް ބައިވެރިވެވޭ ގޮތަށް ކޮމިޓީން މިދިޔަ ހޮނިހިރު ދުވަހުގެ ރޭ ވަނީ ނިންމައިފަ އެވެ.
އީވާގެ ހުށަހެޅުމަށް ތާއީދުކުރައްވަމުން ހިސާން ވެސް ވިދާޅުވީ ދައުލަތުގެ މަގާމުތަކުގައި ތިބި މީހުންގެ މިފަދަ މައްސަލަތައް ލަސްވުމުން ނުކުންނަ އެހެން ނުރަނގަޅު ނަތީޖާތައް ވެސް ހުންނަ ކަމަށެވެ.
"އެ މީހުންނަކީ މަގާމުގެ ހައިސިއްޔަތުން އެތައް މައުލޫމާތެއް ލިބޭ ބަޔެއް. އަދި އެތައް ނުފޫޒެއް ދައުލަތުގެ އޮނިގަނޑުގެ ތެރެއަށް ފޯރުވުމުގެ ފުރުސަތު އޮންނަ ބަޔެއް،" އެފަދަ ބަޔަކު މަގާމުގައި ދެމިތިބެވުމަކީ ބަލައިގަނެވޭނެކަމެއް ނޫން ކަން ފާހަގަކުރައްވަމުން ހިސާން ވިދާޅުވި އެވެ.
އަދި އެކަންކަން އިސްލާހުކުރަން މަޖިލީހުން އަޅަންޖެހޭ ފިޔަވަޅުތައް އަވަސްކުރަންޖެހޭ ކަމަށެވެ.
ހިސާން ވިދާޅުވި ގޮތުގައި، އެ ލިސްޓުގައި ހިމެނޭ ބައެއް ފަރާތްތަކަށް ހިޔާނާތުގައި ބައިވެރިވިކަމަށް ޖިނާއީ ދައުވާ ސާބިތުވާ މިންވަރަށް ހެކި ނެތް ނަމަވެސް، ދައުލަތަށް ގެއްލުނު ފައިސާ އަނބުރާ ހޯދަން އެ މީހުންގެ މައްޗަށް ދައުވާކުރެވޭނެ ކަމަށް އެސެޓް ރިކަވަރީ ކޮމިޝަނުން ބުނެފައިވާ ކަމަށެވެ.
އެ ލިސްޓުގައި ހިމެނޭ ނަންތަކާ ގުޅިގެން ތަހުގީގުތައް ކުރިއަށްދާއިރު، ތަހުގީގުތަކަށް ހުރަސްއެޅިދާނެތީ އެ މައުލޫމާތުތަކުގެ ސިއްރު ހިފަހައްޓައި ދިނުމަށް ކޮމިޝަނުން ވަނީ އެދިފަ އެވެ.
ކޮމިޝަނުން އެހެން އެދުނު ނަމަވެސް، ކޮމިޓީން އެ މައުލޫމާތުތައް ދިރާސާކޮށް ނިމޭއިރު، ތަހުގީގަށް ހުރަސްއެޅޭނެ ފުރުސަތެއް ނެތްކަމަށް ފެނިއްޖެނަމަ އެ ނަންތައް ހާމަކުރަން ކޮމިޓީން ދަނީ މަޝްވަރާ ކުރަމުންނެވެ.
ކޮމިޝަނުގެ އެ އެދުމަށް އިޝާރާތް ކުރައްވައި، ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވީ ކޮމިޓީ ރިޕޯޓު ފައިނަލްކުރެވޭއިރު، އެ ލިސްޓުގައި ހުރި ބައެއް ނަންތައް ހާމަކުރެވޭ ހިސާބަށް ދާނެ ކަމަށެވެ.
އޭގެ ކުރިން ތަހުގީގަށް ހުރަސްއެޅޭނެ ފަދަ ނަމެއް އޮތްތޯ ކޮމިޝަނުގެ ކިބައިން ސާފުކޮށްލުން ކިހިނެއްވާނެތޯ އޭނާ އެއްސެވި އެވެ.
އެސެޓް ރިކަވަރީ ކޮމިޝަނާ ބައްދަލުކުރަން ސަބް ކޮމިޓީން ރޭ ބޭއްވި ބައްދަލުވުމުގައި މެމްބަރުން ބައިވެރިވެވަޑައިގަންނަވަނީ. -ފޮޓޯ: މަޖިލިސް
އެއަށް ޖަވާބު ދެއްވަމުން އީވާ ވިދާޅުވީ ރޭ ކޮމިޝަނުގެ މެމްބަރުން ކޮމިޓީއަށް ހާޒިރުވެ ދެއްވި މައުލޫމާތުން، އެ ލިސްޓުގައި އެ ނަންތައް ހިމަނާފައިވަނީ އެކި މަރުހަލާތަކުން، ގިނަ ކަންތައްތަކެއް ފުރިހަމަވެގެންކަން އެނގޭ ކަމަށެވެ.
"ވަރަށް ރީޒަނަބަލް ގްރައުންޑްސް ލާފައޭ ލިސްޓަށް ލާފަ މިހިރީ. ދެން އިނަސަންޓުތޯ ނޫންތޯ އެންމެ ފަހު މަރުހަލާގަ ކޯޓުން ނިންމާނީ. އެކަމަކު ރީޒަނަބަލް ގްރައުންޑްސް ލާފައޭ ލިސްޓަށް ލާފަ އެއޮތީ،" ކޮމިޓީގެ ރިޕޯޓުގައި ވެސް އެކަން ސާފުކޮށް ހިމަނަން ހުށަހަޅުއްވަމުން އީވާ ވިދާޅުވި އެވެ.
މަޖިލީހުގެ މިއަހަރުގެ ދެވަނަ ދައުރު އަންނަ ހޯމަ ދުވަހު ފެށޭއިރު، މިރޭ ހުށަހެޅުނު ހުށަހެޅުންތަކާއެކު ސަބް ކޮމިޓީގެ ރިޕޯޓު މާދަމާ ރޭ ފައިނަލް ކުރުމަށްފަހު މައި ކޮމިޓީއަށް ފޮނުވަން މެމްބަރުން ނިންމި އެވެ.
