ލަންޑަން (މެއި 10) - ޔުއެފާ ޗެމްޕިއަންސް ލީގުގެ ފައިނަލް މެޗު ކުޅެން ހަމަޖެހިފައި އޮތް ތުރުކީގެ އިސްތަންބޫލްގައި ކޮވިޑްގެ ހާލަތު ގޯސްވެފައިވާތީ އެ މެޗު އިންގްލެންޑްގެ ރަސްމީ ސްޓޭޑިއަމް ވެމްބްލީގައި ކުޅެން ޔުއެފާ އާއި އިނގިރޭސި ސަރުކާރު އަދި އިނގިރޭސި ފުޓްބޯޅަ އެސޯސިއޭޝަނުން މަޝްވަރާ ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
މި މަހު 29 ވަނަ ދުވަހު އިންގްލެންޑްގެ ޗެލްސީ އާއި މެންޗެސްޓާ ސިޓީ ކުޅޭ ފައިނަލް މެޗު އިންގްލެންޑްގެ އެސްޓަން ވިލާ ދަނޑު، ވިލާ ޕާކުގައި ބާއްވަން އެ ކްލަބުން ހުށަހެޅި ނަމަވެސް އެ ދަނޑުގެ ހާލަތު އެންމެ ރަނގަޅު ލެވަލެއްގައި ނެތުމުން ޔުއެފާ އިން އެ ޕްރޮޕޯސަލް ބަލައެއް ނުގަތެވެ.
ކޮވިޑްގެ ނުރައްކާ ބޮޑުވެ ތުރުކީ މި ވަގުތު ލޮކްޑައުންއެއްގައި އޮތުމުންނާއި ދާދި ފަހުން އިންގްލެންޑް ސަރުކާރުން އެ ގައުމުގެ މީހުން ދަތުރުފަތުރު ކުރުމުގައި ސަމާލުވާން ނެރުނު ރެޑް ލިސްޓުގައި ތުރުކީ ހިމެނި އެވެ. އެއާ އެކު ޗެމްޕިއަންސް ލީގުގެ ފައިނަލަށް އިންގްލެންޑްގެ ސަޕޯޓަރުންނަށް ތުރުކީ އަށް ދިއުމުގެ ފުރުސަތު ގެއްލުނީ އެވެ.
ދިމާވެފައިވާ ކަންބޮޑުވުންތައް ހައްލެއް ހޯދުމުގެ ގޮތުން ޔުއެފާ އިން ނިންމީ އިނގިރޭސި ރަސްމީ ސްޓޭޑިއަމް ވެމްބްލީގައި ފައިނަލް ކުޅޭ ގޮތަށް މަޝްވަރާ ކުރުމަށެވެ. އިންގްލެންޑްގެ މަޝްހޫރު ނޫސްތަކުން ރިޕޯޓްކުރާ ގޮތުގައި ވެމްބްލީގައި ފައިނަލް ކުޅޭ ގޮތަށް މިހާރު އޮތީ ހަމަޖެހިފަ އެވެ. އިންގްލެންޑްގެ އޮފިޝަލަކު އެ ގައުމުގެ މީޑިއާ އަށް ބުނީ އެ ގައުމަށް ނިސްބަތްވާ ދެ ކްލަބް ފައިނަލުގައި އޮތުމުން މި މެޗު އިންްގްލެންޑްގައި ކުޅުމުގެ ހުރަހެއް އޮންނާނެ ކަމަށް ނުދެކޭ ކަމަށެވެ.
މިދިޔަ އަހަރުގެ ޗެމްޕިއަންސް ލީގުގެ ފައިނަލް ވެސް އެންމެ ފުރަތަމަ ކުޅެން ހަމަޖެއްސީ އިސްތަންބޫލްގަ އެވެ. އެކަމަކު އޭރު ކޮވިޑްގެ ހާލަތު މުޅި ދުނިޔޭގައި ވެސް ވަރަށް ބޮޑަށް ގޯސްކޮށް އޮތުމުން ޔުއެފާ އިން ޗެމްޕިއަންސް ލީގުގެ ކުއާޓާ ފައިނަލާ ހަމައިން ސެންޓްރަލައިޒްކޮށް ހުރިހާ މެޗެއް ކުޅުނީ ޕޯޗުގަލްގެ ލިޒްބަންގަ އެވެ. މި ފަހަރުގެ ފައިނަލް ވެސް އިސްތަންބޫލްގައި ނުކުޅެން ނިންމާނަމަ ތުރުކީން ފައިނަލް ހޯސްޓް ކުރަން ކުރި މަސައްކަތްތަކުގެ ބަދަލެއް ދޭން ޔުއެފާ އިން ޖެހޭނެ އެވެ.
ޗެމްޕިއަންސް ލީގުގެ ފައިނަލް އެންމެ ފަހުން ވެމްބްލީގައި ކުޅުނީ 2013 ވަނަ އަހަރު އެވެ. އެ ފަހަރު ޑޯޓްމަންޑް ބަލިކޮށް ޗެމްޕިއަންކަން ހޯދީ ބަޔާން މިއުނިކުންނެވެ. އޭގެ ދެ އަހަރު ކުރިން 2011 ވަނަ އަހަރު ޕެޕް ގާޑިއޯލާގެ ކޯޗުކަމުގައި ކުޅުނު ބާސެލޯނާ އިން ވަނީ ވެމްބްލީގައި ކުޅުނު ފައިނަލެއްގައި މެންޗެސްޓާ ޔުނައިޓެޑް ބަލިކޮށް ތަށި އުފުލާލައިފަ އެވެ. އެއީ ގާޑިއޯލާ އެންމެ ފަހުން ޓީމެއް ގޮވައިގެން ޗެމްޕިއަންސް ލީގުގެ ފައިނަލަށް ނުކުތް ފަހަރެވެ. މިއީ ގާޑިއޯލާ މިހާރު ކޯޗުކޮށްދެމުން އަންނަ ސިޓީން ޗެމްޕިއަންސް ލީގުގެ ފައިނަލުގައި ކުޅޭ ފުރަތަމަ ފަހަރެވެ.
ސިޓީން މި ފަހަރުގެ އިނގިރޭސި ލީގު ކަޕް ކާމިޔާބުކުރީ ވެމްބްލީގައި ކުޅުނު ފައިނަލުގައި ޓޮޓެންހަމް ބަލިކޮށްފަ އެވެ. އެކަމަކު ވެމްބްލީގައި ކުޅުނު އެފްއޭ ކަޕްގެ ސެމީ ފައިނަލުގައި ސިޓީ ވަނީ ޗެމްޕިއަންސް ލީގުގެ ފައިނަލުގައި އެ ޓީމާ ދެކޮޅަށް ނުކުންނަ ޗެލްސީ އަތުން ބަލިވެފަ އެވެ. ޗެލްސީން ވަނީ ޕްރިމިއާ ލީގުގައި މިދިޔަ ހޮނިހިރު ދުވަހު ސިޓީ އަތުން ފަހަތުން އަރައި މޮޅުވެފަ އެވެ.
