ސްރީލަންކާގައި ފޯރުކޮށްދޭ ހުރިހާ ޒަރޫރީ ހިދުމަތްތަކެއް އެލާޓަށް ގެނެސް، އޮކްސިޖަނާއި ވެންޓިލޭޓަރުގެ އެހީތެރިކަމަށް ޗައިނާގައި އެދިއްޖެ އެވެ.
ވީހާވެސް މަދު މުވައްޒަފުންނާ އެކު ޒަރޫރީ ހިދުމަތްތައް ތައްޔާރީ ހާލަތުގައި ތިބުމަށް އެންގީ ކޮވިޑުގެ ނަންބަރުތައް ހިފެހެއްޓުމެއް ނެތި އިތުރުވަމުން ދާތީ އެވެ.
ބަލިމަޑުކަން ފެށުނު ފަހުން އިއްޔެ ރިކޯޑު އަދަދަކަށް 2000 އަށް ވުރެ ގިނަ މީހުން ޕޮޒިޓިވްވެ، 22 މީހުން މަރުވި އެވެ. އެ ގައުމުގެ ޖުމްލަ ކޭސްތައް ވަނީ 123،000 އަށް އަރާފަ އެވެ. މަރުތައް އުޅެނީ 786 ގަ އެވެ.
ސިއްހީ އިދާރާތަކުން ބުނީ ހުރިހާ ޑިސްޓްރިކްޓަކަށް ވެސް ބަލި މިހާރު ފެތުރިފައިވާ ކަމަށާއި ރައްކާތެރިކަމުގެ އުސޫލަށް އަމަލު ނުކުރާ ނަމަ ނަންބަރުތައް އަދިވެސް އިތުރުވެ، ސިއްހީ ނިޒާމު ހުއްޓިދާނެ ކަމަށެވެ.
ހާލަތު ގޯސްވަމުން ދާތީ ބޮޑު ވަޒީރު މަހިންދަ ރާޖަޕަކްސަ ވަނީ އޮކްސިޖަނާއި ވެންޓިލޭޓަރުގެ އެހީތެރިކަމަށް ޗައިނާގައި އެދިވަޑައިގެންފަ އެވެ.
އެކަމަށް ރަސްމީކޮށް އެދުނީ ކޮލޮމްބޯގައި ހުންނަ ޗައިނާ ސަފީރުގެ ކިބައިންނެވެ. އޮކްސިޖަނާއި ވެންޓިލޭޓަރުގެ އިތުރުން، އޮކްސިޖަން ސިލިންޑަރާއި، ކޮންސަންޓްރޭޓަރާއި، ރެގިއުލޭޓަރާއި، ތެރަޕީ މެޝިން ފަދަ ތަކެތީގެ އެހީއަށް ވެސް އެދިފައި ވެއެވެ.
ކޮލޮމްބޯގައި ހުންނަ ޗައިނާ އެމްބަސީގެ ތަރުޖަމާނަކު ޑެއިލީ މިރާ ނޫހަށް ވިދާޅުވީ ލަންކާ ސަރުކާރުގެ ރިކުއެސްޓެއް ލިބިއްޖެ ކަމަށާއި ވީ އެންމެ އަވަހަކަށް އެހީ ފޯރުކޮށްދޭން މަސައްކަތް ކުރަމުންދާ ކަމަށެވެ.
ތަރުޖަމާނު ވިދާޅުވީ އިންޑިއާ ހިމެނޭހެން މުޅި ދެކުނު އޭޝިއާއަށް ކޮވިޑުގެ ރާޅުތަކެއް އަރާފައި ވާތީ ލަންކާ ސަރުކާރުގެ އެދުން އެންމެ މުހިއްމު ކަމެއްގެ ގޮތުގައި އިސްކަން ދީގެން ބަލާނެ ކަމަށެވެ.
"ޗައިނާ ސަރުކާރުން މަސައްކަތް ކުރާނީ އެދުނު ހުރިހާ އެއްޗެއް ފޯރުކޮށްދޭން ސިއްހީ އެހީގެ ގޮތުގައި. އެންމެ މުހިއްމީ ވަގުތު. ފައިސާ ހުރި ނަމަވެސް ފެކްޓަރީއަށް ގޮސް ސަޕްލައި ނުލިބި ލަސްވެދާނެ. އެކަމަކު ޗައިނާ ސަރުކާރުން އަވަސް ކުރަން ކުރެވެން ހުރި ހުރިހާ ކަމެއް ކުރާނެ،" ތަރުޖަމާނު ވިދާޅުވި އެވެ.
އިންޑިއާގައި ބަލި ފެތުރި ނޭޕާލާއި ބަންގްލަދޭޝް ކަހަލަ ގައުމުތަކުގެ ހާލަތު ވެސް ވަނީ ގޯސްވެފައި. އިތުރު ބައިވަރު ގައުމުތަކުން ވަނީ ސިއްހީ ސަޕްލައި ހޯދަން ޗައިނާއަށް އޯޑަރުތައް ފޮނުވާފައި. އެކަމަކު ލަންކާގެ އެދުމަށް ހާއްސަ ސަމާލުކަމެއް ދޭނަން. އެއީ ދެ ގައުމުގެ ގާތް ގުޅުމަށް އިހްތިރާމް ކުރުމުގެ ގޮތުން. -- ޗައިނާ އެމްބަސީގެ ތަރުޖަމާނު
ބޮޑު ވަޒީރުގެ ޗީފް އޮފް ސްޓާފް ޔޮޝީތާ ރާޖަޕަކްސަ ވިދާޅުވީ އަވަސް ސިއްހީ އެހީތެރިކަމަށް ޗައިނާގައި އެދުނީ ދިމާވެދާނެ ކުއްލި ހާލަތަކަށް ތައްޔާރުވެ ތިބުމަށް ކަމަށެވެ.
ލަންކާގައި ކޮވިޑުގެ ހާލަތު ގޯސްވަމުން ދާއިރު، މިހާތަނަށް އެ ގައުމުން ކޮވިޑް ފަތުރާ ވައިރަހުގެ ހަ ވޭރިއެންޓެއް ފެނިފައި ވެއެވެ. އެއީ ޔޫކޭ ވޭރިއެންޓް، ޑެންމާކާއި އީޔޫ އަދި މެދުއިރުމަތީގެ ވޭރިއެންޓް، ނައިޖީރިއާ ވޭރިއެންޓް، އިންޑިއާ ވޭރިއެންޓް، ދެކުނު އެފްރިކާ ވޭރިއެންޓް އަދި މުޅިން އަލަށް ލަންކާއިން ފެނިފައިވާ ވޭރިއެންޓެވެ.
