ލޯ މަރާލާ އިރަށް، އާދަމް އުމަރު، 41 އަށް ސިފަވަނީ ބާރުގަދަ އެ ގޮވުމެވެ. ބޮން ހަރުކޮށްފައި ހުރި ސައިކަލުން އޭނާ އަށް ދުރަށް ޖެހިލަން ލިބުނު ދެތިން ސިކުންތެވެ. ސައިކަލް މަތީގައި މަޑުކޮށްގެން އިންދައި ބާރު އަޑުފައްގަނޑަކާ އެކު އެރި ބޯ ދުންތަކެވެ. އެއްޗެހިތަކެއް ބުރައިގެން އައިސް އޭނާގެ ހަށިގަނޑުގައި ޖެހުނު ކަމުގެ އިހްސާސެވެ. އެ ޝޮކުގައި ވީ ގޮތެއް ނޭނގި އިރުކޮޅަކު ހުރެފައި ބޭއިހްތިޔާރުގައި ފަޔަށް ބަލާލެވުނު އިރު ފެނުނީ ހޯސްލާފައި ލޭ އަންނަ ތަނެވެ.
ކުރިމަތިން ފެނުނީ ދެ ބޮޑީގާޑުން ވެގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކާރުކޮޅަށް އެރުވި ތަނެވެ. އެވަގުތު އެތަނުގައި ތިބި އެންމެން ވެސް ތިބީ ހާސްވެ ކަންބޮޑުވެފަ އެވެ.
އެ ހާދިސާގެ މެދަށް ވަދެވުނު އާދަމަށް ހުރި ތަނުން ގުޑާލެވުނީ މީހަކު އައިސް އެހީތެރިވެދިނުމުންނެވެ. އައިޖީއެމްއެޗުގައި އެޑްމިޓްކޮށް އައިވީ ގުޅާފައި އޮތް އާދަމަށް މި ފިކުރުތަކާ ހެދި އަރާމެއް ނުކުރެ އެވެ. ބޮން ގޮއްވާލުމާ އެކު ކުރިމަތިވި ޝޮކުން އަދި މުޅިން އަރައި ނުގަނެވެނީ އެވެ. ހަމަލާގައި ކަނާތު ފަޔަށް ވަރަށް ބޮޑު އަނިޔާއެއް ވެސް ވި އެވެ. ބޮޑު ބައެއްގައި އޮތީ ޕްލާސްޓަރު އަޅައިފަ އެވެ.
މި ބިރުވެރި ގޮވުމާ މިދިޔަބުރާސްފަތިދުވަހުގެ ރޭ އޭނާ އަށް ކުރިމަތިލާން ޖެހުނީ ރިހޭ ފައި މައްޗަށް ފޮއި ވެއްޓިފައި ވަނިކޮށެވެ؛
އާދަމްގެ ފައިގެ އެކްސްރޭ "އަދަދު" ގެ ނޫސްވެރިންނަށް ދައްކާލަނީ: އާދަމްގެ ފައި ވަނީ ވަރަށް ބޮޑަށް ޒަހަމްވެފައި-- ފޮޓޯ: އަހުމަދު ސާއިލް އަލީ/ އަދަދު
ބޮމުގެ ހަމަލާގެ ތެރެއަށް ވަދެވުނީ އޭނާގެ ދިރިއުޅުމުގައި ހިތްދަތި އެތައް ކަމެއް ތަހައްމަލް ކުރަން ޖެހިފައި ވަނިކޮށެވެ. މާލެއަށް ނިސްބަތްވާ އާދަމާއި އަންހެނުންގެ ކައިވެންޏަށް 17 އަހަރުވި އިރު ކުއްޖަކު ނުލިބި ތިބެފައި އަންހެނުން ބަނޑުބޮޑުވީ ހައެއްކަ މަސް ކުރިންނެވެ. އެކަމަކު ދަރިފުޅު ފެނިލުމުގެ ނަސީބު ނުލިބުނެވެ. ކުރިމަތިވި ސިއްހީ ހާލަތާ ހެދި ދަރިފުޅު ބައިގެން ދިޔައީ އެވެ. ދިރިއުޅުމުގައި ކުރިމަތިވި އެންމެ ހިތްދަތި އެ ހާދިސާ އިން އަރައިނުގަނެވި އުޅެނިކޮށް އަންހެނުންގެ މަންމަގެ ހާލު ސީރިއަސްވީ އެވެ. ފަރުވާ ދޭން ޖެހުނީ ވެންޓިލޭޓަރުގަ އެވެ. އެ ހިތާމަ ވަށާލާފައި ވަނިކޮށް އަންހެނުންނާއި އާދަމް ވެސް ކޮވިޑަށް ޕޮޒިޓިވްވީ އެވެ. އެރޭ އޭނާ ބޭރަށް ނުކުމެ އުޅުނީ ބަލިން ފަސޭހަވުމާ އެކު ދެމަފިރިން ކުރިން ރާވާފައި އޮތް ގޮތަށް މާލެ ދޫކޮށް އަންހެނުންގެ ރަށަށް ބަދަލުވުމަށް ކުރަން ޖެހޭ ކަންކަން ނިންމުމަށެވެ.
އެކަމަކު ބޮމުގެ ހަމަލާގައި އޭނާ އަށް ތަހައްމަލްކުރަން ޖެހިފައިވާ ހިތްދަތިކަން އެހެން ހިތާމަތަކަށް ވުރެން ބޮޑެވެ. މަރުގެ އެތިފަހަރަކުން ސަލާމަތްވާން ލިބުނީ ހަމަ ދެތިން ސިކުންތެވެ.
ސައިކަލް މަތީގައި އިނީ ނަޝީދު ކާރަށް އަރަންދެން
ސެލްބީ ސްޓާ ހާޑްވެއާގެ ޕިކަޕު ޑުރައިވަރަކަށް އުޅުނު އާދަމް ދިރިއުޅެނީ އެމެޓީ ފިހާރައާ ޖެހިގެން ހުންނަ ގ. އުލަލާގޭގަ އެވެ. ރަށަށް ބަދަލުވާންވެގެން، ކުރިން ދިރިއުޅުނު ގޭގައި ހުރި ތަކެތި ރަށަށް ފޮނުވަން އެއް ބޯޓުން އަނެއް ބޯޓަށް އެރުވުމަށް ފަހު ވެސް އެ ރެއަށް ކުރަން ނިންމައިގެން ހުރި ކަންކަން ގިނަ އެވެ. މާލޭގައި ކޮވިޑުގެ ބަލި ހާލަތާ ހެދި ނުވައެއް ޖަހާއިރު ކާފިއު ފަށާތީ އޭގެ ކުރިން އޭނާގެ އުމުރުން ދުވަސްވީ ބަލި މަންމަ މައްޗަންގޮޅީގައި ހުރި ގެއަކަށް ވެސް ބަދަލުކުރަން ޖެހެ އެވެ.
ބޭރުގައި އުޅުމަށް ފަހު ގެއަށް ވަންނަން ސައިކަލް ޕާކުކުރަން ދިޔައިރު އާދަމަށް ފެނުނީ މަޖީދީމަގާއި ނީލޯފަރު ހިނގުމުގެ ކުރިމައްޗަށް ވާގޮތަށް ނަޝީދުގެ ކާރުކޮޅު ޕާކުކޮށްފައި އޮއްވަ އެވެ. އޭރު އެ ކާރުކޮޅާ ފަސްވަރަކަށް ފޫޓު ދުރުގައި ނޫކުލައިގެ ސައިކަލެއް ޕާކުކޮށްފައި ހުއްޓެވެ. އެއީ ނަޝީދު އަވަހާރަކޮށްލަން އައިއީޑީ ހަރުކުކޮށްފައި ހުރި ސައިކަލެވެ. އެ ސައިކަލު ކައިރީގައި ޕާކުކުރަން އުޅެނިކޮށް ޒޯނުން ޖާގައެއް ފެނުމުން އޭނާގެ ހިތް ބުނީ އެތަނުގައި ސައިކަލް ބޭންދުމަށެވެ. އެހެންވެ ހިތަށް އެރިގޮތަށް، ސައިކަލް ޕާކުކުރީ ތަންކޮޅެއް ދުރުގަ އެވެ.
އައިއީޑީ ހަރުކުރި ނޫ ކުލައިގެ ސައިކަލް: އާދަމް ފުރަތަމަ ސައިކަލް ޕާކުކުރަން އުޅުނީ މި ނޫކުލައިގެ ސައިކަލް ކައިރީގައި.
"ހަރު ޖައްސާފައި ބަލާލިއިރު ނަޝީދު އާއި ބޮޑީގާޑުން އޭރު އަންނަނީ [ނީލޯފަރުމަގުން ހިންގަވާފައި މަޖީދީ މަގާ ދިމާލަށް]. އެހެންވެ އަޅުގަނޑު އިންގޮތަށް އިނީ ސައިކަލްގައި [ނަޝީދު ހުރަސްކޮށް ދަންދެން]. އަޅުގަނޑު ސައިކަލް ފަހަތުން ނެއްޓިފައި ދެ ތިން ސިކުންތެއް ވާނީ ބާރު އަޑުފައްގަނޑެއް ގޮވައިފި،" އާދަމް އެ ހާދިސާ "އަދަދު" އަށް ކިޔައިދިނެވެ.
އަމިއްލަ ގައުމުގައި، ފުރާނަ ނުރައްކަލަކަށް ހުށަހެޅުނު ޓެރަރިސްޓު އެ ހާދިސާގައި އައިއީޑީ ގޮވުން، އާދަމް ސިފަ ކުރަނީ، ހޮނުގުގުރި އަކަށް ވުރެން ވެސް ބާރު އަޑުފަށްގަނޑެއްގެ ގޮތުގަ އެވެ.
އާދަމް "އަދަދު" އަށް އިންޓަވިއޫ ދެނީ: އޭނާއަށް ވަނީ ޝޮކެއް ލިބިފައި--
"ވަރަށް ބާރު އަޑެއް ހުރީ. އެ ގަޑީގައި އަޅުގަނޑަށް ނޭނގުނު އަޅުގަނޑު ފޯނު ވެސް ވީތަނެއް. ތަޅުދަނޑި ދިޔަ ދިމާލެއް ވެސް ނޭނގެ. ފައި ހަލާކުވި ގޮތެއް ވެސް ނޭނގެ. އެ ގަޑީގައި އެއްޗެއް ޖެހުނު ކަމެއް ނޭނގެ." އެ ބިރުވެރި ވަގުތު އާދަމް ސިފަ ކުރި އެވެ.
"އަޅުގަނޑަށް ފެނުނު ނަޝީދު ކާރަށް ލަނިކޮން،"
ލޭ މަނާކުރަން ޓީޝާޓެއް ދިނީ އެތަނުން މީހަކު، ފަޔަށް ބޮޑު އަނިޔާއެއް
ފައި ޒަހަމްވެ ގިނަ އަދަދެއްގެ ލޭ އަންނަކަން އާދަމަށް ރޭކާލީ މާފަހުންނެވެ. އޭނާއަށް އެހީތެރިވީ އެތަނަށް އައި ބައެކެވެ. ސީދާ ކޮން ބައެއްކަން ނޭނގުނަސް އެ މީހުންނަށް ހިތުގެ އެންމެ ފުންމިނުން އާދަމް ޝުކުރު އަދާ ކުރެ އެވެ.
"ކުޑަކޮށް ހިނގާލަން އުޅުނުއިރު ފެނުނީ ފައިން ލޭތައް އައިސް ފައިވާނުގެ ވަދު ވެސް ވަރަށް ބޮޑަށް ކަނޑައިގެން ގޮސް އިން ތަން. ދެން އެ ގަޑީގައި އެތަނުން އައި ކުއްޖަކު ޓީޝާޓް ބާލާފައި ފައިގައި އޮޅާލީ. ދެން އެކަމަކު އެ ކުއްޖާގެ ވެސް ދެ ކަންފަތް ބައްވެގެން ކޮޅަށް ނުހުރެވިގެން އެތަނަށް ތިރިވީ،" އާދަމް ބުންޏެވެ.
ލިބިފައި ހުރި ޒަހަމްތަކަށް ފަރުވާ ދޭން އާދަމް ހޮސްޕިޓަލަށް ގެންދިޔައީ އެތަނަށް ސައިކަލެއްގައި މަޑުކުރި ދެ ޒުވާނެއްގެ އެހީތެރިކަމާ އެކުގަ އެވެ. އޭނާގެ ކަނާތު ފައިގެ ކުޑަވާ އިނގިއްޔާ ދިމާލުން ތިން އިންޗިއެއްހާތަން އޭރު ހުރީ ފަޅައިގެން ގޮސްފަ އެވެ.
ޑޮކްޓަރުން ބެލިއިރު ކުޑަވާ އިނގިލީގައި އިހުސާސެއް ނެތެވެ. އެ އިނގިއްޔާ ދިމާލުން ކަށިގަނޑު ވަނީ ބިންދައިގެން ގޮސްފަ އެވެ. ޑޮކްޓަރުން ވަގުތުން އެންގީ އޮޕަރޭޝަން ކުރަން ޖެހޭނެ ކަމަށެވެ. އޮޕަރޭޝަން ކުރަން ބޭނުމީ އައިޖީއެމްއެޗުން ކަމަށް އޭނާ ބުނުމުން އެރޭ އެ ހޮސްޕިޓަލަށް ބަދަލުކޮށް ވަނީ އޮޕަރޭޝަން ކޮށްފަ އެވެ. އާދަމްގެ ކުޑަވައި އިނގިއްޔާ ދިމާލަށް ވަނީ ދަގަނޑު ފޮއްޗެއް ލައްވައިފަ އެވެ. ކަނާތު ފައިގައި އޮތީ ޕްލާސްޓަރު އަޅައިފަ އެވެ.
ނަޝީދުގެ ހަށިކޮޅަށް ބޮޑަށް ގެއްލުން ދޭންވެގެން އައިއީޑީއަށް ހުރީ ރޭޒާ ފުއްތަކެއް އަޅައިފަ އެވެ. އެ ދިން ހަމަލާގައި ރައީސް ނަޝީދުގެ ހަށިކޮޅުގެ އެކި ގުނަވަންތައް ފޫއަޅުވާލައި ރޭޒާ ފުއްތައް ހުރީ ވަދެފަ އެވެ. އެކަމަކު އާދަމްގެ ހަށިގަނޑަށް އެއިން އެއްޗެއް ނަސީބަކުން ނުވަދެ އެވެ. ވިއްސައިގެން އައިސް ޖެހުނު އެއްޗަކުން ފައި ފަޅައިގެން ދިޔައީ އެވެ. އަތާއި ފައިގެ އެކި ހިސާބުތަކުގައި ވެސް ކުދި ޒަހަމްތައް އެބަހުއްޓެވެ. ހިއްސު ކެނޑިފައި ވާ ކުޑަވާ އިނގިލި ރަނގަޅު ވާނެ ކަމެއް ނުވަތަ ނޫން ކަމެއް ވެސް އަދި ނޭނގެ އެވެ.
"އަޅުގަނޑު ބުނިން ޑޮކްޓަރު ގާތު އަޅުގަނޑަށް ހީވިއޭ ތެޅިގަތް ގަޑީގައި ކައިރީގައި އިން ސައިކަލްގައި ޖެހުނީހެން. ޑޮކްޓަރު ބުނީ ސައިކަލްގައި ޖެހިފައެއް ނޫނޭ ތިއީ. އެއްޗެއް އައިސް ޖެހިފައޭ ތިހިރީ،" ފަޔަށްވީ ގޮތް އާދަމް ކިޔައިދިނެވެ.
އާދަމްގެ ފަޔަށް ލިބިފައިވާ ގެއްލުންތައް އެކްސްރޭ އިން ފެންނަ ގޮތް: ކުޑަވައި އިނގިލި ވަނީ ބިންދައިގެން ގޮސް-- ފޮޓޯ: އަހުމަދު ސާއިލް އަލީ/އަދަދު
ހާދިސާ ހިނގިއިރު އާދަމް ލައިގެން ހުރި ޓީޝާޓާއި ސޯޓުގެ އިތުރުން އަތުގައި އޮތް ގަޑި ވެސް ފުލުހުންގެ ތަހުގީގަށް އެ ރޭ ވަނީ ގެންގޮސްފަ އެވެ.
އާދަމް ނިންމައިގެން ހުރީ، އޭނާގެ ހާލު ރަނގަޅުވެ ހޮސްޕިޓަލުން ދޫކޮށްލުމާ ރަށަށް ފުރާށެވެ. ކުރިއަށް ވުރެން ވެސް ބޮޑަށް މިތަނުން ބޭރުވާން ޖެހިއްޖެ ކަމުގެ ހިޔާލު އޭނާ ވަށާލައިފި އެވެ.
ހަގީގަތުގައި ވެސް މި ހާދިސާގެ ސަބަބުން އިތުރަށް މާލޭގައި އުޅެން އޭނާ ބިރުގެންފި އެވެ. ލިބުނު ޝޮކުގެ ސަބަބުން އޭނާއަށް ހުރީ ވަރަށް އަސަރު ކޮށްފަ އެވެ.
މާލޭގައި އުޅޭ އިރު ލިބޭހާ ފައިސާއެއް ދައްކަން ޖެހެނީ ކުއްޔާއި އެހެނިހެން ހަރަދުތަކަށެވެ. ދަރިއަކު ހޯދަން ކުރަން ޖެހޭ ހޭދައަށް ވެސް އެކަމާ ހެދި ހުރަސް އެޅޭތީ އާދަމާއި އޭނާގެ އަންހެނުން އަދިވެސް ނިންމައިގެން ހުރީ ކުރިން ރާވާފައި އޮތްގޮތަށް ރަށަށް ބަދަލުވުމަށެވެ.
"ވަރަށް ބޮޑަށް ބިރުގެންފި. ރައްކާތެރިކަމުގެ އެއްވެސް ޔަގީންކަމެއް ނެތް މާލެތެރެއަކު މިކަންވީ މިވީ ގޮތުން،" އާދަމް ބުންޏެވެ.
އާދަމްގެ ހިތުގައި އެ ބިރުވެރިކަން އުފެދިދާނެ ސަބަބުތައް ގިނަ އެވެ. އެންމެ ހައި ސެކިއުރިޓީގައި ހުންނަވާ ރާއްޖޭގެ އިސްވެރިއަކަށް އަމާޒުކޮށް ބޮމެއް ގޮއްވާލުމެވެ. އެ ހާދިސާގެ ވަގުތުގައި، އޭނާ ހިމެނޭ ގޮތުން ވަށައިގެން ތިބި އެތައް ބައެއްގެ ފުރާނައަށް ނުރައްކާ އޮތުމެވެ.
ސަލްޓަންޕާކުގައި، 2007 ގައި ގޮއްވާލި އައިއީޑީއަށް ވުރެން އެތައް ދަރަޖައެއް ބާރުގަދަ އައިއީޑީ ގޮއްވާލި އެ ވަގުތުކޮޅު ދުވަހަކު ވެސް އާދަމްގެ ހިތުން ފިލައިގެން ނުދާނެ އެވެ. އޭނާގެ މުޅި ހަޔާތުގައި ވެސް އެ ވަރުގެ ބިރަކާ އަދި ކުރިމައްޗެއް ނުވެ އެވެ. ބޮން ގޮއްވާލި ސައިކަލް ކައިރީގައި މަޑުކޮށްލަން އުޅުނު އާދަމް ސަލާމަތްވީ ހަމަ ކިރިޔާ އެވެ.
