ސަރުކާރުގެ ޓޫރިޒަމް ޑިވެލޮޕްމަންޓް ޕްލޭނުގެ ތެރެއިން ރިސޯޓް ތަރައްގީކުރަން އަލަށް ހުޅުވާލި ރަށްތަކަށް 98 ފަރާތަކުން ޝައުގުވެރިކަން ފާޅުކޮށްފި އެވެ.
ޓޫރިޒަމް މިނިސްޓްރީން މިދިޔަ މަހު ކުރި އިއުލާނެއްގައި ރާއްޖޭގެ ހަތް އަތޮޅެއްގެ 23 ރަށެއްގައި ރިސޯޓް ތަރައްގީކުރަން ހުޅުވާލި އެވެ. މީގެ ތެރެއިން ކައިރި ކައިރީގައި ހުރި ބައެއް ރަށްތައް އެއްކޮށް ދޫކުރާތީ ރިސޯޓް ތަރައްގީކުރަން އެއްބަސްވުން ހަދާނީ 16 ފަރާތަކާ އެކު އެވެ.
މިއީ ރައީސް ސޯލިހު ސަރުކާރުގެ ޓޫރިޒަމަށް ރަށްތައް ދޫކުރުމުގެ ދެވަނަ މަރުހަލާގެ ތެރެއިން އޯޕަން ބިޑު އުސޫލުން ކުއްޔަށް ދޫކުރަން ހުޅުވާލި ރަށްތަކެކެވެ.
މި ރަށްތަކުގެ ތެރޭގައި ގިނައީ މިހާރު ރިސޯޓުތައް މަދު އަތޮޅުތަކުން ރިސޯޓް ތަރައްގީކުރަން ހުޅުވާލި ރަށްތަކެވެ. މި ރަށްތަކަކީ؛
- ހއ. ވެލިފިނޮޅު - 4.1 ހެކްޓަރު، އިތުރަށް ނުހިއްކޭ، އެކުއިޒިޝަން ކޮސްޓު 600،000 ޑޮލަރު
- ހއ. އަލިދުއްފަރުފިނޮޅު - 3 ހެކްޓަރު، އިތުރަށް ހިއްކޭ، އެކުއުޒިޝަން ކޮސްޓު 500،000 ޑޮލަރު
- ހދ. ކުޑަފަރުފަސްގަނޑު - 1.20 ހެކްޓަރު، އިތުރަށް ހިއްކޭ، އެކުއުޒިޝަން ކޮސްޓު 300،000 ޑޮލަރު
- މ. ސީދީހުރާ، ސީދީހުރާ ވެލިގަނޑާ އެކު - 3.28 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ 1.25 މިލިއަން ޑޮލަރު
- މ. މާފުށި - 10.40 ހެކްޓަރު، އިތުރަށް ނުހިއްކޭ، އެކުއިޒިޝަން ކޮސްޓަކީ 2.25 މިލިއަން ޑޮލަރު
- ތ. ކާއްޑޫ - 3.9 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ އެއް މިލިއަން ޑޮލަރު
- ތ. ކަނިމީދޫ - 10 ހެކްޓަރު، އިތުރަށް ނުހިއްކޭ، އެކުއިޒިޝަން ކޮސްޓަކީ 1.5 މިލިއަން ޑޮލަރު
- ތ. އޮޅުފުށި، އޮޅުފުށިފިނޮޅާ އެކު - 3.54 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ އެއް މިލިއަން ޑޮލަރު
- ލ. ކަށިދޫ - 3.1 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ އެއް މިލިއަން ޑޮލަރު
- ލ. ބޮޑުމުންޏަފުށި - 3 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ އެއް މިލިއަން ޑޮލަރު
- ލ. ދޮންބެހެރާ، ހޮޅުރަހާއާ އެކު - 2.04 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ 750،000 ޑޮލަރު
- ގއ. މާރެހާ - 17 ހެކްޓަރު، އިތުރަށް ނުހިއްކޭ، އެކުއިޒިޝަން ކޮސްޓަކީ ދެ މިލިއަން ޑޮލަރު
- ގއ. ފުނަދޫވިލިގިއްލާ - 5 ހެކްޓަރު، އިތުރަށް ނުހިއްކޭ، އެކުއިޒިޝަން ކޮސްޓަކީ އެއް މިލިއަން ޑޮލަރު
- ގދ. ކަނޑަހަލާގަލާ - 7.4 ހެކްޓަރު، އިތުރަށް ނުހިއްކޭ، އެކުއިޒިޝަން ކޮސްޓަކީ 1.25 މިލިއަން ޑޮލަރު
- ގދ. ކަޑަވާރެހޭ، ދިގުރެހާއާ އެކު - 2.1 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ އެއް މިލިއަން ޑޮލަރު
- ގދ. ފެރޭތަ ވިލިގިއްލާ, ދެކާނބާ، ކޮޑެރަޓާ އިތުރު ރަށަކާ އެކު - 9.26 ހެކްޓަރު، އިތުރަށް ހިއްކޭ، އެކުއިޒިޝަން ކޮސްޓަކީ އެއް މިލިއަން ޑޮލަރު
ރިސޯޓު ތަރައްގީކުރަން ހުޅުވާލި ފުރުސަތާ ގުޅޭގޮތުން ޓޫރިޒަމް މިނިސްޓަރު ޑރ. އަބްދުﷲ މައުސޫމް "އަދަދު" އަށް ވިދާޅުވީ އޭޕްރިލް މަހު ހުޅުވާލި ފުރުސަތުގެ މުއްދަތު ހަމަވީއިރު 98 ފަރާތަކުން ރިސޯޓް ތަރައްގީކުރަން ޝައުގުވެރިކަން ފާޅުކުރި ކަމަށެވެ.
އޭގެ ތެރެއިން ރިސޯޓްތަކާ ގުޅޭ މައުލޫމާތު ދޭން ބޭއްވި އޮންލައިން ބައްދަލުވުމުގައި ބައިވެރިވީ 48 ފަރާތަކުންނެވެ.
މިއީ ހުޅުވާލި ރަށްތަކުގެ އަދަދުގެ ނިސްބަތުން ބަލާ ނަމަ ދަށް އަދަދެކެވެ. އެންމެ ފަހުން އުތުރުގެ ހަތަރު ރަށެއްގައި ރިސޯޓު ތަރައްގީކުރަން ހުޅުވާލި ފުރުސަތުގައި ވެސް މައުލޫމާތު ހޯދުމުގެ ބައްދަލުވުމުގައި 65 ފަރާތަކުން ބައިވެރިވި އެވެ.
އެ ފަހަރު ހަތް ފަރާތަކުން ބިޑު ފޮތް ގަތުމަށް ފަހު ފައިނަލް ބިޑް ހުށައެޅީ އެންމެ ފަރާތަކުންނެވެ. އެއީ ނ. ކުންނަމެލައިއަށް ހުށައެޅި ބިޑެކެވެ. މި ފަހަރު ހުޅުވާލި ރަށްތަކުގެ ތެރޭގައި އެ ފަހަރު ބިޑަށް ހުޅުވާލި ހއ. އަލިދުއްފަރުފިނުޅު ހިމެނެ އެވެ. ނަމަވެސް ހދ. ވައިކަރަމުރައިދޫއިން ދޭން ނިންމި 15 ހެކްޓަރުގެ ބިމާއި. ށ. ކުޑަޅައިމެންދޫ މި ފަހަރުގެ ލިސްޓުގައި ނުހިމެނެ އެވެ.
އަދަދުއާ ވާހަކަ ދެއްކި މި ދާއިރާގެ ތަޖުރިބާކާރަކު ވިދާޅުވީ ރާއްޖޭގައި ރިސޯޓް ތަރައްގީކުރަން އިންވެސްޓަރުންގެ މެދުގައި ޝައުގުވެރިކަން އޮތް ނަމަވެސް، ފަތުރުވެރިކަން އޮތް ނާޒުކު ހާލަތުން އިންވެސްޓަރުން ފަސް ޖެހެނީ ކަމަށެވެ.
އަދި، މި ހާލަތުގައި ރާއްޖެ ނޫން އެހެން ގައުމެއް ވިޔަސް ޓޫރިޒަމަށް އިންވެސްޓް ކުރާނީ ވަރަށް "ސްޓޭބަލް ކެޕިޓަލް" ހުރި ވިޔަފާރިތަކާއި ބޮޑެތި ވިޔަފާރިވެރިން އެކަނި ކަމަށް އޭނާ ވިދާޅުވި އެވެ.
"ޕެންޑެމިކް ހާލަތުން އަރިއަގަނެވޭނެ ކަމުގެ ޔަގީންކަން ބޮޑުވީމާ އިންވެސްޓަރުންގެ އިތުބާރު ބޮޑުވާނީ. މިއީ ކޮންމެހެން ރާއްޖެއަށް ވީމާ ދިމާވެގެން އުޅޭ މައްސަލައެއް ނޫން. ޓޫރިޒަމް ދާއިރާއިން ގްލޯބަލް އިންވެސްޓާ ކޮންފިޑެންސަށް ލޮޅުމެއް އައިސްފައި އޮތީ." އޭނާ ވިދާޅުވި އެވެ.
ޓޫރިޒަމް މިނިސްޓަރު މައުސޫމް ވެސް ހުންނެވީ މި ހާލަތުގައި ވެސް އިންވެސްޓަރުން ލިބޭނެ ކަމަށް އުއްމީދު ކުރައްވައިގެންނެވެ.
އަދި އިންވެސްޓަރުން ބޭނުންވާ އެންމެ ފަހުގެ މައުލޫމާތާއި ހުރިހާ އެހީތެރިކަމެއް ފަހިކޮށްދޭ މިނިސްޓްރީގެ ހައިސިއްޔަތުން އެކަން ކުރަމުން ގެންދާނެ ކަމުގެ ޔަގީންކަން މިނިސްޓަރު އެރުވި އެވެ.
ރިސޯޓްތައް ދޫކުރުމުގެ ކަންކަމުގައި މިހާރު ކުރިއަށްދަނީ ބިޑު ފޮތް ދޫކުރުމެވެ. އަންނަ މަހުގެ ހަ ވަނަ ދުވަހުގެ ނިޔަލަށް ޓޫރިޒަމް މިނިސްޓްރީން ބިޑު ފޮތްތައް ލިބޭނެ އެވެ.
ނަމަވެސް މި ދުވަސްކޮޅު ކޮވިޑާ ގުޅިގެން ބިޑު ފޮތް ދޫކުރުން ކުރިޔަށް ދަނީ އޮންލައިންކޮށެވެ. މިހާރު އީމެއިލްގެ ޒަރިއްޔާއިން ބިޑު ފޮތް ހަވާލު ކުރުމަށް ފަހު، ހާޑް ކޮޕީ ހަވާލުކުރާނެ ތާރީހެއް މިނިސްޓްރީން އެ ފަރާތްތަކަށް އަންގާނެ އެވެ.
