ޗައިނާއިން މިދިޔަ މަހު ފަހުކޮޅު ޖައްވަށް ފޮނުވި ބިޔަ ރޮކެޓުގެ ބައިތައް ވެއްޓިފައިވަނީ ރާއްޖެ ސަރަހައްދާ ދިމާއަށް ކަމަށް އެ ގައުމުގެ ކަމާބެހޭ އޮފީހުން ބުނެފި އެވެ.
ދިގު މިނުގައި 108 ފޫޓު އަދި ބަރުދަނުގައި 40،000 ޕައުންޑު ހުންނަ ލޯންގް މާޗް ބީ5 ރޮކެޓު މިދިޔަ މަހުގެ 29 ވަނަ ދުވަހު ޖައްވަށް އުދުއްސާލާފައިވަނީ ޗައިނާގެ ސްޕޭސް ސްޓޭޝަނަށް ބޭނުންވާ މުހިއްމު ބައިތަކެއް ފޮނުވުމަށެވެ.
އެ ރޮކެޓުގެ ތެޔޮ ހުސްވުމުން އަނބުރާ ދުނިޔެއަށް މިސްރާބު ޖަހާފައިވާއިރު، މިއަދުގެ ހެނދުނުގެ ވަގުތެއްގައި އެ ރޮކެޓުގެ ބައިތައް ވެއްޓިފައިވަނީ ދ. އަތޮޅުގެ ހުޅަނގަށް ކަމަށް ސްޕޭސް ޑޭޓާ ޓްރެކިން އިން ދައްކަ އެވެ. އެކަމަކު އޭގެން އެއްވެސް ބައެއް ދ. އަތޮޅުގެ އެއްވެސް ރަށަކަށް އަމާޒުވި ކަމުގެ މައުލޫމާތެއް އަދި ނުލިބެ އެވެ.
އަދި އެކަމާ ގުޅޭގޮތުން އެމްއެންޑީއެފުން ވެސް އަދި ވަކި އެއްޗެއް ބުނެފައެއް ނުވެ އެވެ.
ޗައިނާގެ ސްޕޭސް އޮފީހުން ބުނެފައިވަނީ ރޮކެޓުގެ ބޮޑު ބައެއް ވެއްޓުމުގެ ކުރިން ރީއެންޓްރީގައި ހަލާކުވެފައިވާ ކަމަށެވެ.
އެ އޮފީހުން އަންދާޒާ ކުރަނީ ރޮކެޓުގެ 70 ޕަސަންޓު ރީއެންޓްރީގެ އަނދާފައިވާ ކަމަށެވެ.
ލޯންގް މާޗް ބީ5 ރޮކެޓު އަނބުރާ ދުނިޔެއަށް ވެއްޓޭއިރު، އޭގެ މިސްރާބު ކޮންޓްރޯލް ނުކުރެވޭތީ މީގެ ކުރިން ވެސް ތަޖުރިބާކާރުން ވަނީ ކަންބޮޑުވުންފާޅުކޮށްފަ އެވެ.
ނަމަވެސް، ދުނިޔޭގެ 70 ޕަސަންޓަކީ ކަނޑުގެ ސަރަހައްދުކަމުން، މީހުން ދިރިއުޅޭ ސަރަހައްދަކަށް ރޮކެޓުގެ ބައިތައް ވެއްޓުމުގެ ފުރުސަތު ހަނި ކަމަށް މާހިރުން ދަނީ ބުނަމުންނެވެ.
މިދިޔަ އަހަރު ލޯންގް މާޗް ބީ5 ރޮކެޓެއްގެ ބައިތައް އައިވަރީ ކޯސްޓުގެ ވިލެޖަކަށް ވެއްޓިގެން ބޮޑެތި ގެއްލުންތައް ލިބުނެވެ. ނަމަވެސް، އެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެ އެވެ.
