އޭއެފްސީ ކަޕްގެ ދެކުނު އޭޝިއާގެ ގްރޫޕްގެ ޕްލޭއޮފް މެޗުގައި ރާއްޖޭގެ އީގަލްސްއާ ދެކޮޅަށް ކުޅެން މާލެ އައިސްފައިވާ އިންޑިއާގެ ބެންގަލޫރު އެފްސީން ހޮޓަލުން ނުކުމެ ޕްރޮޓޮކޯލާ ހިލާފުވުމުން އެ ޓީމާ މެދު ފިޔަވަޅު އަޅައިދޭން އެފްއޭއެމުން އޭއެފްސީގައި އެދިއްޖެ އެވެ.
ބެންގަލޫރުން ޕްރޮޓޮކޯލާ ހިލާފުވި މައްސަލައިގައި ޔޫތު މިނިސްޓަރު އަހުމަދު މަހުލޫފް މިރޭ ކުރެއްވި ޓްވީޓެއްގައި ވަނީ އޭއެފްސީ އާއި ރާއްޖޭގެ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާއި ހިލާފަށް ހޮޓަލުން ނުކުމެގެން ބެންގަލޫރު މާލެ ތެރޭގައި އުޅެފައިވާތީ އެ ޓީމު މި ހިނދުން ފެށިގެން ރާއްޖެ ދޫކޮށްދިއުމަށް އެދޭ ކަމަށް ވިދާޅުވެފަ އެވެ. އަދި ބެންގަލޫރަށް ދެން ރާއްޖޭގައި މެޗު ނުކުޅެވޭނެ ކަމަށާއި އެފްއޭއެމާ ވާހަކަ ދައްކައިގެން އޭއެފްސީ ކަޕްގެ ގްރޫޕް ސްޓޭޖު މެޗުތައް ފަސްކުރަން ހުށަހަޅާނެ ކަމަށް މިނިސްޓަރު ވިދާޅުވި އެވެ.
އެފްއޭއެމްގެ އޮފިޝަލަކު "އަދަދު" އަށް ވިދާޅުވީ ބެންގަލޫރުން ޕްރޮޓޮކޯލާ ހިލާފުވެފައިވާ މައްސަލަ އޭއެފްސީގެ ސަމާލުކަމަށް ގެނެސްފައިވާ ކަމަށާއި އެ ޓީމާ މެދު ފިޔަވަޅު އަޅައިދޭން ހުށަހަޅާފައިވާ ކަމަށެވެ. އަދި މީގެ އެންމެންގެ ރައްކާތެރިކަމާ ގުޅޭ ކަމެއްގައި ބެންގަލޫރުން އުސޫލާ ހިލާފުވި މައްސަލައިގައި ބަދަލު ހޯދަން ވެސް އެފްއޭއެމުން އެދޭނެ ކަމަށް އޮފިޝަލް ވިދާޅުވި އެވެ.
އިއްޔެ ހަވީރު ބެންގަލޫރު ޓީމު ރާއްޖެ އައިސްފައި އެ ޓީމު ތިބޭ ހޮޓެލް ޖެން އަށް ޗެކިން ވުމުގެ ކުރިން ވަނީ ކޮވިޑަށް ޓެސްޓްކޮށްފަ އެވެ. ބެންގަލޫރުގެ ކުޅުންތެރިންނާއި އޮފިޝަލުންގެ ޓެސްޓް ވަނީ ނެގެޓިވްވެފަ އެވެ. އަންގާރަ ދުވަހުގެރޭ ގަލޮޅު ދަނޑުގައި ރާއްޖޭގެ އީގަލްސްއާ ދެކޮޅަށް ކުޅޭ މެޗަށް މިއަދު ބެންގަލޫރު ޓީމުން ވަނީ ހެންވޭރު ދަނޑުގައި ޕްރެކްޓިސް ވެސް ކޮށްފަ އެވެ.
ގަލޮޅު ދަނޑުގައި ބުދަ ދުވަހު މެންދުރު ބޭއްވި ނޫސްވެރިންގެ ބައްދަލުވުމުގައި މިނިސްޓަރު މަހުލޫފާއި އެފްއޭއެމްގެ ރައީސް ބައްސާމް އަދީލް ޖަލީލް ވަނީ އޭއެފްސީ ކަޕް ބާއްވަނީ ފުރިހަމަ ރައްކާތެރި ގައިޑްލައިންތަކަކާ އެކުގައި ކަމަށް ވިދާޅުވެފަ އެވެ. އެފްއޭއެމުން ވަނީ މި ވަގުތު ރާއްޖޭގައި ރެކޯޑް މިންވަރަކަށް ކޮވިޑްގެ ކޭސްތައް ގިނަވެފައިވާތީ މުބާރާތް ފަސްކުރަން ހުށަހަޅައިފަ އެވެ. އެކަމަކު އޭރު އޭއެފްސީން އެންގީ އިތުރަށް ހާލަތު ގޯސްނުވާނަމަ މުބާރާތް ޝެޑިއުލާ އެއްގޮތަށް ކުރިއަށްގެންދާށެވެ. އެކަމަކު މިނިސްޓަރު މިރޭ އޭއެފްސީ ކަޕްގެ ގްރޫޕް ސްޓޭޖު މެޗުތައް ފަސްކުރަން ހުށަހަޅާނެ ކަމަށް ވިދާޅުވެފައިވާއިރު، ދެން މުބާރާތުގެ މެޗުތައް ހޯސްޓްކުރުމުގައި ދަތިތަކެއް ދިމާވާނެ އެވެ. މުބާރާތުގެ ގްރޫޕް ސްޓޭޖުގެ މެޗުތައް ޝެޑިއުލް ކޮށްފައި އޮތީ މި މަހު 14 އިން 20 އަށެވެ.
މިކަމާ މެދު އެފްއޭއެމުން އަދި ރަސްމީކޮށް ބަހެއް ބުނެފައިނުވެ އެވެ. އެފްއޭއެމުން ގޮތެއް ކަނޑައަޅާނީ އޭއެފްސީއާ މަޝްވަރާކުރުމަށް ފަހު ކަމަށް ބެލެވެ އެވެ.
އޭއެފްސީ ކަޕްގައި ވާދަކުރާ ރާއްޖޭގެ މާޒިޔާ އާއި އީގަލްސް އިން ތިބީ މި ވަގުތު ކޭމްޕް ކޮށްގެންނެވެ. އީގަލްސް ހޮޓަލް ޖެންގައި ތިބިއިރު، މާޒިޔާ ކޭމްޕްކޮށްފައިވަނީ ހުޅުމާލޭ އަކާސިއާ ގެސްޓް ހައުސްގަ އެވެ. މި ދެ ޓީމުން އިއްޔެ ކޭމްޕްކުރީ ކޮވިޑަށް ޓެސްޓް ހެދުމަށް ފަހު އެވެ.
އީގަލްސް އިން ވަނީ މިދިޔަ މަހުގެ ހަތް ވަނަ ދުވަހު ކޮލިފައިން ފުރަތަމަ ބުރުގައި މާލޭގައި ބޫޓާންގެ ޗެމްޕިއަން ތިމްޕޫ ސިޓީ ބަލިކޮށްފަ އެވެ. ޕްލޭއޮފްގައި ކުޅުމުގެ ފުރުސަތު އީގަލްސް އަށް ލިބުނީ ކޮލިފައިން ދެ ވަނަ ބުރުގައި އެ ޓީމާ ދެކޮޅަށް ކުޅެން އޮތް ބަންގްލަދޭޝްގެ ޑާކާ އަބަހާނީ އަށް މެޗު ކުޅެވޭގޮތްނުވެ، އެންމެ ފަހުން އޭއެފްސީން އެ ޓީމު މުބާރާތުން ވަކިކުރުމުންނެވެ.
ބެންގަލޫރާއި އީގަލްސް ކުޅެން އޮތް ޕްލޭއޮފް މެޗުން މޮޅުވާ ޓީމަކަށް އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕުން ޖާގަ ލިބޭނެ އެވެ. އެ ގްރޫޕްގައި އޮތީ ރާއްޖޭގެ މާޒިޔާގެ އިތުރުން އިންޑިއާގެ އޭޓީކޭ މޯހަން ބަގާން އާއި ބަންގްލަދޭޝްގެ ބަޝުންދުރާ ކިންގްސް އެވެ. އެ ދެ ޓީމު ކުރިއަށް އޮތް ދެ ދުވަހެއްގެ ތެރޭގައި މާލެ އަންނަ ގޮތަށް އޮތީ ހަމަޖެހިފަ އެވެ. އެ ދެ ޓީމުން ވަނީ ރާއްޖޭގައި ތިބޭ ހޮޓަލަށް ފައިސާ ވެސް ދައްކައިފަ އެވެ.
