ޕެރިސް (މެއި 8) - ބްރެޒިލްގެ ތަރި ނޭމާ ޕީއެސްޖީއާ އެކު ހަދާފައިވާ ކޮންޓްރެކްޓް 2025 އާ ހަމައަށް އާ ކޮށްފި އެވެ.
އުމުރުން 29 އަހަރުގެ ނޭމާ ޕީއެސްޖީއާ އެކު މީގެ ކުރިން ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. އޭނާ މިއަދު ކޮންޓްރެކްޓް އާ ކުރީ އިތުރު ތިން އަހަރަށެވެ. އެހެން ކަމުން އޭނާގެ ކޮންޓްރެކްޓް ހަމަވާނީ 2025 ވަަނަ އަހަރުގެ ޖޫން މަސް ނިމުމުންނެވެ. އާ އެއްބަސްވުމުގައިވާ ގޮތުން ނޭމާ އަށް އަހަރަކު 30 މިލިއަން ޔޫރޯގެ މުސާރައެއް ލިބޭނެ އެވެ. އެކަމަކު އިސްތިހާރު ޑީލްތަކާ އެކު އަދަދު އިތުރުވާނެ ކަމަށް ބެލެވެ އެވެ.
ނޭމާ ބާސެލޯނާ ދޫކޮށް 2017 ވަނަ އަހަރު ޕީއެސްޖީ އަށް ބަދަލުވީ ދުނިޔޭގެ ރެކޯޑް އަގެއް ކަމަށްވާ 222 މިލިއަން ޔޫރޯ އަށެވެ. އޭނާ ޕީއެސްޖީއާ އެކު ކޮންޓްރެކްޓް އާ ކޮށްފައިމިވަނީ އަލުން ބާސެލޯނާ އަށް ދާން އުޅޭ ކަމަށް މީޑިއާގައި ވާހަކަ ދެކެވެމުން ދަނިކޮށެވެ.
ނޭމާ (ކ) އާއި ޕީއެސްޖީގެ ރައީސް ހެއްލާފީ.-- ފޮޓޯ: ޕީއެސްޖީ
ޕީއެސްޖީއާ އެކު ނޭމާ ވަނީ މިހާތަނަށް ނުވަ މުބާރާތް ކާމިޔާބުކޮށްފަ އެވެ. އެއީ ތިން ލީގު ތަށްޓާއި ފްރާންސް ކަޕާއި ލީގު ކަޕް އަދި ސުޕަ ކަޕް ތެރެއިން ކޮންމެ މުބާރާތެއް ދެ ފަހަރު އެވެ. ޕީއެސްޖީން މިދިޔަ އަހަރުގެ ޗެމްޕިއަންސް ލީގުގެ ފައިނަލާއި މި އަހަރުގެ ސެމީން ފުރުސަތު ހޯދުމުގައި ނޭމާގެ ދައުރު ބޮޑެވެ.
"އަހަރެން މި ކްލަބްގައި މަޑުކުރަން މި ނިންމީ އިތުރު ކާމިޔާބީތަކެއް ހޯދަން. އަހަރެން ޕީއެސްޖީގައި މިހުރީ އުފަލުން،" ނޭމާ ބުންޏެވެ.
ޕީއެސްޖީގެ ރައީސް ނާސިރު އެލް ހެއްލާފީ ވިދާޅުވީ ނޭމާ މަޑުކުރުމަކީ މި ޕްރޮޖެކްޓް އިތުރަށް ފުުރިހަމަކުރަން ލިބިގެންދިޔަ ހިތްވަރެއް ކަމަށެވެ. އަދި ކުރިއަށް އޮތްތަނުގައި އިތުރު ކުޅުންތެރިން ޕީއެސްޖީ އަށް ގެންނަން މަސައްކަތްކުރާނެ ކަމަށް ހެއްލާފީ ވިދާޅުވި އެވެ.
