"ރައީސް ނަޝީދު، ގެނައި އިރު ވަރަށް ކްރިޓިކަލް، އެކަމަކު މިހާރު މޭޖަ ނުރައްކަލުން ސަލާމަތްވެއްޖެ."
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލައި ދިން ހަމަލާއަށް ފަހު އެމަނިކުފާނު ހޮސްޕިޓަލަށް ގެންދިޔައިރު އޮންނެވި ހާލަތާއި ސާޖަރީތަކަށް ފަހު ހާލުކޮޅު ސިފަކޮށްދެއްވަމުން އޭޑީކޭގެ ޑޮކްޓަރުންގެ ޓީމުން މިއަދު ބުންޏެވެ. ދިރިއުޅުއްވާ ކެނެރީގެ ކައިރީގައި ބޮމެއް ގޮއްވާލައިގެން ދިން ހަމަލާގައި އެމަނިކުފާނުގެ ހަށިކޮޅުގެ އެކި ގުނަވަންތައް ފޫއަޅުވާލައި ރޭޒާ ފުއްތައް ހުރީ ވަދެފަ އެވެ.
ފުރާނައަށް ނުރައްކާވާ މިންވަރަށް ހަށިގަނޑަށް ވަދެފައި ހުރި ރޭޒާ ފުއްތައް ނެގުމަށް 16 ގަޑިއިރުގެ އޮޕަރޭޝަންތައް ކުރަން ޖެހުނެވެ. ޑޮކްޓަރުން ކުރިން ތައްޔާރުވެފައި ނުވާ ހާލަތަކަށް ނަޝީދަށް ނުރައްކާވެފައި އޮތުމުން އެމަނިކުފާނުގެ ފުރާނަ ސަލާމަތްކުރަން ޑޮކްޓަރުންނަށް ކުރިމަތިވި ގޮންޖެހުން ވެސް ބޮޑެވެ.
ނަޝީދުގެ އިޒްނަ އާއި އާއިލާގެ ރުހުން ވެސް ލިބިގެން ބޭއްވި ނޫސްވެރިންގެ ބައްދަލުވުމުގައި އެމަނިކުފާނަށް ފަރުވާ ދެއްވި ޑޮކްޓަރުންގެ ޓީމުން ވިދާޅުވީ ނަޝީދަށް މިހާރު އަމިއްލައަށް ނޭވާ ލެވޭތީ އެމަނިކުފާނު ވެންޓިލޭޓަރުން ނަގާފައިވާ ކަމަށެވެ.
އޭޑީކޭ ހޮސްޕިޓަލުގެ ޗީފް މެޑިކަލް އޮފިސަރު އަބްދުﷲ ނިޔާފް ވިދާޅުވީ ބުރާސްފަތިދުވަހުގެ ރޭ އަނިޔާތަކަކާ އެކު ނަޝީދު އޭޑީކޭގެ އިމަޖެންސީ ރޫމަށް ގެންދިޔައީ 8:30 ހާއިރު ކަމަށެވެ. ހޮސްޕިޓަލުގައި ޑޮކްޓަރުންގެ ޓީމަށް އެ ވަގުތު ތިއްބެވުމާ އެކު ވަގުތުން ފަރުވާ ފެށި އެވެ.
ނަޝީދަށް ފުރަތަމަ އެޓެންޑުވި އެއް ޑޮކްޓަރު ޑރ. ދުސޫމާ ވިދާޅުވީ އޭރު ފަރުވާގެ ބޭނުމަށް ކުރި ހުރިހާ ސުވާލަކަށް ޖަވާބު ދެއްވި ކަމަށެވެ. އެކަމަކު ޕްރައިމަރީ ސާވޭއެއް ހެދިއިރު ހަށިކޮޅުގައި ގިނަ ޒަހަމްތަކަކާ އެކު ގިނަ އަދަދެއްގެ ލޭ ފައިބާތީ އޮޕަރޭޝަން ތިއޭޓަރަށް ގެންދަން ޖެހުނު ކަމަށް ވިދާޅުވި އެވެ.
ޑޮކްޓަރުންގެ ޓީމުން ފުރަތަމަ އިސްކަމެއް ދިނީ ހަށިކޮޅުން ފައިބަމުން ދިޔަ ލޭ މަނާކުރާށެވެ.
ޑޮކްޓަރުންގެ ޓީމުން ވަނީ ބޮމުގެ ހަމަލާގައި ނަޝީދުގެ ހަށިކޮޅަށް ރޭޒާ ފުއްތައް ވަދެފައި ހުރި ދިމާތަކާއި އެހެން ވެސް ސީރިއަސް އަނިޔާވި ތަންތަން ހިމެނޭ އިމޭޖެއް ދައްކައިފަ އެވެ.
މަޑޫ ނޫކުލަ: ދަގަނޑު އެއްޗެހިތަކެއް ހަށިގަނޑުގެ ތެރެއަށް ވަދެފައި | ގަދަ ނޫކުލަ: ހަންގަނޑުގެ ތެރެއަށް ވަދެފައި ހުރި ޕްލާސްޓިކް ކޮޅުތައް ނެގި ތަންތަން | ރަތްކުލަ: ބޭރުފުށުން ލިބުނު އަނިޔާ
ނިޔާފް ވިދާޅުވި ގޮތުގައި ހަށިގަނޑުގެ ތެރޭގައި ހުރި އަނިޔާތައް ތަފްސީލްކޮށް ފެނުނީ ލޭ މަނާކޮށްފައި ސީޓި ސްކޭން ހެދުމުންނެވެ. މަޑު ނޫކުލައިން ހުރި ތަންތަނަކީ ރޭޒަފުއްތައް ވަދެފައި ހުރި ތަންތަން ކަން ފާހަގަކުރައްވަމުން ނިޔާފް ވިދާޅުވީ ފުއްޕާމޭގެ ތެރެއަށް ވެސް އެތިކޮޅެއް ވަދެފައި އިންދައި ފެނުނެވެ.
"އެއީ ފުރާނައަށް ނުރައްކާ ވެދާނެ އެތިކޮޅަކަށްވާތީ އެންމެ މުހިއްމު ފަރުވާއެއްގެ ގޮތުގައި އިސް ނެގީ އެކަމަށް،" ނިޔާފް ވިދާޅުވި އެވެ.
ނުވަ އެމްއެމްގެ ރޭޒަފުއް، ނަޝީދުގެ މޭ ފޫއަޅާލާފައި ވަދެފައި ހުރީ ހަމަލާގައި ބޮޑަށް ޒަހަމްވި ވައަތް ފަރާތުގެ އަރިކަށިންނެވެ.
"އޭތި އިނީ ހަތަރު ވަނަ ރިބުގައި ޖެހި ރިބު ފުނޑިފައި. އެއް ސެންޓިމީޓަރު ތިރިއަށް ޖެހުނު ނަމަވެސް ހިތަށް އަރާނެ ކަހަލަ ނުރައްކާތެރި ގޮތަށް އިން އެއްޗެއް. ރިބު ފުނޑިގެން ގޮސް ވަރަށް ބައިވަރު ކުނޑިތައް ލަންގަށް ވެސް އެޅިފައި ހުރި،" ޑޮކްޓަރު ވިދާޅުވި އެވެ.
ފުރާނަ ސަލާމަތްކުރުމުގެ އޮޕަރޭޝަނަށް ފަހު ޑރ. ނިޔާފާއި ޓީމުން ދެން އިސްނަގަން ޖެހުނީ ބަނޑަށް ލިބިފައި ހުރި އަނިޔާތައް ދެނެގަނެ ފަރުވާ ދިނުމަށެވެ. ސީޓީ ސްކޭނުން ދެއްކީ ބަނޑަށް ތިން ރޭޒާ ފުއް ވަދެފައިވާ ކަމެވެ. އެކަމަކު ލިބިފައި ހުރި އަނިޔާ އެނގޭނީ އެތެރެ ބަލައިގެން ކަމަށްވާތީ، ކެމެރާ ލައްވައިގެން އެ ޕްރޮސީޖާ ވެސް ކުރިއަށް ގެންދިޔަ އެވެ.
"ކެމެރާ ލައްވައިގެން ބެލިއިރު ފެނުނީ ބަނޑުގެ މަސްގަނޑު ފޫއަޅާފައި ގޮސްފައި ހުރި ކަން. އަދި ވަރަށް ބައިވަރު ލޭ ބަނޑު ތެރޭގައި ހުރި ކަން. އެހެންވެ ވަގުތުން ނިންމީ ބަނޑުތެރެ ހުޅުވާފައި މަސްގަނޑު އެކުގައި އިވޭލުއޭޓްކުރަން،" ފަރުވާ ޓީމުގެ ޑޮކްޓަރަކު ވިދާޅުވި އެވެ.
"ގާތްގަނޑަކަށް 600-700 އެމްއެމްގެ ލޭ ހުރި. އެ ހުރިހާ ލޭތަކެއް ބޭރުކޮށްފައި ބެލިއިރު ފާހަގަކުރެވުނީ ފަލަ ގޮހޮރުގައި ލޯވަޅު އެޅިފައި ހުރި ކަމަށް. ދެތަނެއް އިން އެއްކޮޅުން ވަދެފައި އަނެއް ކޮޅުން ނުކުމެގެން ގޮސްފައި. އަނެއްކާ އެއް ފަރާތުން ވަދެފައި އަނެއް ފަރާތުން ނުކުމެގެން ގޮސްފައި އިން ބަނޑުގައި ވެސް."
އެތަންތަން ސާފުކުރުމަށް ފަހު ބެލިއިރު ލިވާ ވެސް އިނީ ފޫއަޅައިގެން ގޮސްފަ އެވެ. އެތަނުގައި އިން ރޭޒާ ފުއް ނަގާފައި ބެލިއިރު ބަނޑު ތެރޭގައި ވެސް ރޭޒާ ފުކެއް ދޫވެފައި އިން ކަމަށް ޑޮކްޓަރުން ވިދާޅުވި އެވެ.
"އޭތި އެއްގޮތަކަށް އަތު ޖެހޭ ގޮތެއް ނުވީ. ދެން ބެލިއިރު އެނގެނީ ހޮލޯ ސްޕޭސްއެއްގައި އޭތި އިންކަން،"
ޑރ. މިޝްވާރު ވިދާޅުވީ ނަޝީދުގެ ވައަތުގެ އޮޅަނބޮއްޓާއި ވާތު ފަލަމަސްގަނޑުގައި އިން ދޭއްޗާއި ކަކުލުހުޅުގައި ވެސް ދެ ރޭޒާ ފުއް އިން ކަމަށެވެ. މި ފަސް އެތި ނަގަން ލިބުނީ ކުޑަ ވަގުތުކޮޅެއް ކަން ފާހަގަކުރައްވަމުން ވިދާޅުވީ އަވަސް ކުރަން އެއް ވަގުތެއްގައި ތިން ޑޮކްޓަރުން ސާޖަރީގައި ބައިވެރިވި ކަމަށެވެ. އެއީ ވީހާވެސް އަވަހަށް ރޭޒާ ފުއްތައް ނަގައި ފާރުތައް ފެހުމަށެވެ. ގަޑިއެއްހާ އިރުގެ ތެރޭގައި އެ މެޓަލް ޕީސްތައް ނެގުނު ކަން ޑޮކްޓަރުންގެ ޓީމުން ފާހަގަކުރެއްވި އެވެ.
ޑރ. ޝަކީލް ވިދާޅުވި ގޮތުގައި ނަޝީދުގެ ވާތުން ހަށިގަނޑުގެ ތެރެއަށް ޕްލާސްޓިކްތަކެއް ހެރިފައި ހުއްޓެވެ. ފަލަމަސްގަނޑަށް ވެސް ވަދެފައި ހުރި އިރު ލޭހޮޅިތައް ހުންނަ އެ ސަރަހައްދަށް ވަނުމަކީ ނުރައްކަލެއް ކަން ޝަކީލް ފާހަގަކުރެއްވި އެވެ. ކަކުލަށް އަރާފައި ހުރި ދޭތިކޮޅުގެ ތެރެއިން އެކަތިކޮޅު އިނީ ކަށިގަނޑުގެ ތެރޭގައި ތާށިވެފަ އެވެ. އޭތި ނަގަން ޖެހުނީ ކޮނެލައިގެންނެވެ.
އެ ހިސާބަށް ދިޔައިރު ބަނޑުތެރޭގައި ފުންކޮށް ރޭޒާ ފުކެއް ދޫވެފައި އިން ކަން އެނގުނު ކަމަށް ވިދާޅުވި އެވެ. ސީޓީ ސްކޭނަކުން ބެލިއިރު، އޭތި ފަހުން ފެންނަނީ އެހެން ތަނަކުންނެވެ. ރޭޒާ ފުކެއް ވީމަ ބަރުދަނަކާއި އޮމާން އެއްޗެއް ވީމަ ނެގުމުގައި ވަރަށް ބޮޑު ގޮންޖެހުމެއް ކުރިމަތިވި ކަމަށް ވިދާޅުވި އެވެ.
އޮމާން އެއްޗެއް ދުވަމުންދާ އިރު އޭތި އަތުޖެއްސުން އެއީ އުނދަގޫވި ކަމެއް ކަމަށާއި އެހެންވެ ރާއްޖޭގައި ތިބި ސީނިއާ ޑޮކްޓަރުންގެ އެހީ ހޯދި ކަމަށް ނިޔާފް ވިދާޅުވި އެވެ. ޑޮކްޓަރުންނަށް ބިރު އޮތީ އެ ރޭޒާ ފުއް ހިތަށް ވަދެދާނެތީ އެވެ.
"އޭތި ހިތަށް ވަދެވިއްޖިއްޔާ، ހާޓް ޕަމްޕްކުރާ ގަޑީގައި ވިއްސައިގެން ދާނީ ލަންގަށް،" ނުރައްކާ މިންވަރު ސިފަކޮށްދެއްވަން ޑޮކްޓަރަކު ވިދާޅުވި އެވެ.
ޑޮކްޓަރުންގެ ޓީމުން ބުނި ގޮތުގައި ސާޖަރީއަކަށް ފަހު ސާޖަރީއެއް ނިންމައި ކެތު ލެބުގައި ވަރަށް ކްރިޓިކަލް ޕްރޮސީޖާއެއް ވެސް ކުރިއަށް ގެންދިޔަ އެވެ. ހޭނެއްތުމުގައި ގިނަ އިރުތަކެއް ވަންދެން ސާޖަރީތަކެއް ހެދުމަށް ފަހު ބާއްވާފައި އޮތީ ސީސީޔޫގަ އެވެ. އޭރު ވެސް ހާލަތު ކްރިޓިކަލް އެވެ.
އަމިއްލަފުޅަށް ނޭވާލާން ފެށުމުން މިއަދު ވެންޓިލޭޓަރު ނެގި ނަަމަވެސް އަންނަ ބަދަލުތައް ވަރަށް ރަނގަޅަށް މޮނިޓަކުރަން ޖެހޭ ކަަމަށް ޑޮކްޓަރުންގެ ޓީމުން ވިދާޅުވި އެވެ. ނަޝީދު ހޮސްޕިޓަލުން ދޫކޮށްލުމާ ގުޅޭ ޕްލޭނެއް އަދި ނެތް ކަމަށް ޑޮކްޓަރު ނިޔާފް ވިދާޅުވި އެވެ.
