ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް އަމާޒުކޮށް ހަމަލާއެއް ދޭން ފޭސްބުކްގައި ގޮވާލި މީހެއްގެ މައްސަލަ ބަލައިދިނުމަށް އިދިކޮޅުން ފުލުހުންގެ ކިބައިން އެދެފި އެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ޓެރަރިސްޓް ހަމަލާއެއް ދީފައިވަނިކޮށް އަލީ ޔާސިރު ނަމަކަށް ކިޔާ މީހަކު ވަނީ ރައީސް ޔާމީންއަކީ "ގޮއްވާލަން" ޖެހޭ މީހެއް ކަމެއް ބުނެ އެފަދަ ހަމަލާއަކަށް ގޮވާލާފަ އެވެ.
މިކަމާ ގުޅިގެން ރައީސް ޔާމީންގެ ސަޕޯޓަރުން ކަންބޮޑުވުން ފާޅުކުރަމުން ދަނިކޮށް އިދިކޮޅުން ނެރުނު ނޫސްބަޔާނެއްގައި ބުނީ އެފަދަ އިންޒާރުތައް ފާޅުގައި ދެމުންދާ މީހުންނާއި ހިތްވަރުދޭ މީހުންގެ މައްސަލަތައް ނުބެލި، ދޫވެފައި ތިބުމަކީ ގައުމުގެ ސަލާމަތަށް ކުރިމަތިވާނެ ނުރައްކަލެއް ކަމަށެވެ.
އެފަދަ މީހުން ކޮންމެ މަގުސަދެއްގައި އިންޒާރުދީ، ޓެރަރިސްޓް އަމަލުތައް ހިންގުމަށް ގޮވާލި ނަމަވެސް، އެކަން ބަލަން ޖެހޭނެ ކަމާއި އެއީ ކުދިކުދި ކަންކަން ކަމުގައި ދެކިގެން އަޅާނުލާ ތިބިގެން ނުވާނެ ކަމަށް އިދިކޮޅުގެ ބަޔާނުގައިވެ އެވެ.
އެހެންވެ، ރައީސް ޔާމީނަށް އިންޒާރު ދިން މީހާ ހިފާ ހައްޔަރުކޮށް، އަވަހަށް ފިޔަވަޅު އެޅުމަށް ވަނީ ގޮވާލާފަ އެވެ. އަދި، މިވަގުތު ގޭބަންދުގައި ހުންނެވި ރައީސް ޔާމީން ސަލާމަތާއި ރައްކާތެރިކަން ވަރުގަދަކުރުމަށް ވެސް އެދިފައިވެ އެވެ.
އިދިކޮޅުން ވަނީ ރައީސް ނަޝީދަށް އަމާޒުކޮށް ދިން ހަމަލާ، ހަރުކަށި އިބާރާތުން ކުށްވެރިކޮށް އެކަމުގައި ޝާމިލުވާ މީހުން އަވަހަށް ހައްޔަރު ކުރުމަށް ވެސް ގޮވާލާފަ އެވެ. ރައީސް ނަޝީދު އަވަހާރަކޮށްލުމަށް ދިން ހަމަލާގައި ލިބުނު ޒަހަމްތަކަށް އެމަނިކުފާނު ފަރުވާ ހޯއްދަވަމުން ގެންދަވާއިރު، މިހާރު ވެސް އޮންނެވީ އޭޑީކޭ ހޮސްޕިޓަލްގެ އައިސީޔޫގަ އެވެ.
ހަމަލާއާ ގުޅޭ ހަތަރު މީހަކު ފާހަގަ ކުރެވިފައިވީކަން ކޮމިޝަނަރު އޮފް ޕޮލިސް މުހައްމަދު ހަމީދު ވިދާޅުވެފައިވީ ނަމަވެސް، މިހާތަނަށް އެއްވެސް މީހަކު ހައްޔަރުކޮށްފައެއް ނުވެ އެވެ. ހަމަލާގެ އެއްވެސް މައުލޫމާތެއް އިންޓެލަށް ލިބިފައިނުވާކަން ވެސް ހަމީދު ހާމަކުރައްވާފައިވެ އެވެ.
ޗީޕް އޮފް ޑިފެންސް ފޯސް އަބްދުﷲ ޝަމާލު ވިދާޅުވެފައިވާ ގޮތުގައި، ގޮއްވާލާފައިވާ އައިއީޑީއަކީ 2007 ވަނަ ސަލްޓަންޕާކް ސަރަހައްދުގައި ގޮއްވާލި އައިއީޑީއަށް ވެސް ބާރުގަދަ އެއްޗެކެވެ. އަސްކަރީ އާލާތްތައް ނެތް ނަމަވެސް، ޑިވައިސްގައި ގޮވާ ޒާތުގެ ގިނަ ތަކެތި ބޭނުންކޮށްފައިހުރި ކަމަށާއި ގެއްލުން ބޮޑުކުރުމަށް ރޭޒާފުށް ވެސް އަޅާފައި ހުރި ކަމަށެވެ.
