މެންޗެސްޓާ (މެއި 8) - ޗެމްޕިއަންސް ލީގުގެ ފައިނަލާ މެދު ދެން ވިސްނާނީ އިނގިރޭސި ޕްރިމިއާ ލީގު ކަށަވަރުކުރުމަށް ފަހު ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ޗެމްޕިއަންސް ލީގުގެ ފައިނަލުގައި ސިޓީން ޗެލްސީއާ ދެކޮޅަށް ނުކުންނާނީ މި މަހު 29 ވަނަ ދުވަހު އެވެ. މިރޭ ޗެލްސީ ބަލިކޮށްގެން ހަތަރު އަހަރުގެ ތެރޭ ތިން ވަނަ ފަަހަރަށް ލީގު ހޯދުމުގެ ފުރުސަތު ސިޓީ އަށް އެބައޮތެވެ.
"ކުޑަ މިންވަރަކަށް ވެސް އަހަރެމެން މި ވަގުތު ޗެމްޕިއަންސް ލީގުގެ ފައިނަލާ މެދު ނުވިސްނާނަން. ހުރިހާ ފޯކަސް އެއް އޮތީ ލީގަށް. އެއީ އަހަރެމެން އަދި ގަބޫލެއް ނުކުރަން ލީގު ކަށަވަރު ކުރެވުނު ކަމަށް. ލީގު ތަށި ނުލިބެނިސް އެ ލިބުނު ކަމަށް ނިންމައިގެން އެ ވާހަކަ ދައްކަން ނެތިން،" މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ގާޑިއޯލާ ބުންޏެވެ.
ގާޑިއޯލާގެ ކެރިއަރުގައި އޭނާ ވަނީ ދެ ފަަހަރު ޗެމްޕިއަންސް ލީގު ކާމިޔާބުކޮށްފަ އެވެ. އެއީ 2009 އާއި 2011 ވަނަ އަހަރު ބާސެލޯނާއާ އެކު އެވެ. ބަޔާން މިއުނިކްގައި ގާޑިއޯލާ އަށް ޗެމްޕިއަންސް ލީގު ކާމިޔާބު ނުކުރެވުނުއިރު، ސިޓީއާ 2016 ވަނަ އަހަރު ހަވާލުވި ފަހުން މި ފަހަރަކީ އެ ޓީމުން ކުއާޓާ އަށް ވުރެ ދުރަށް ދިޔަ ފުރަތަމަ ފަހަރެވެ. ސިޓީން ފައިނަލުގެ ފުރުސަތު ހޯދީ ސެމީގައި ޕީއެސްޖީ ބަލިކޮށްފަ އެވެ.
ކުޅެން ޖެހޭ މެޗުތަކުގެ އަދަދަށް ބަލާއިރު ޕްރިމިއާ ލީގަކީ ޗެމްޕިއަންސް ލީގަށް ވުރެ އުނދަގޫ މުބާރާތެއްކަން ގާޑިއޯލާ މީގެ ކުރިން ވެސް ވަނީ ފާހަގަކޮށްފަ އެވެ. ގާޑިއޯލާ އިއްޔެ ވަނީ އެ ވާހަކަ އަލުން ތަކުރާރުކޮށްފަ އެވެ.
"އަހަރެން އަބަދުވެސް ބުނަން ޕްރިމިއާ ލީގޭ މީގެ އެންމެ މުހިއްމީ. ފައިނޭންޝިއަލީ ބަލާއިރު ވެސް ޕްރިމިއާ ލީގު ހޯދުމަކީ މާ ބޮޑު ކަމެއް. ޗެމްޕިއަންސް ލީގަށް ކޮލިފައިވުމަކީ ވެސް މާ ބޮޑު ކަމެއް،" ގާޑިއޯލާ ބުންޏެވެ
ސިޓީން ހަތަރު ތަށި ހޯދަން ކުރި އުއްމީދަށް ހުރަސް އެޅީ ޗެލްސީންނެވެ. އެއީ އެފްއޭ ކަޕްގެ ސެމީ ފައިނަލުން ސިޓީ ކަޓުވާލީ ޗެލްސީންނެވެ. ގާޑިއޯލާ ބުނީ މިރޭ ސިޓީން ނުކުންނާނީ އެފްއޭ ކަޕްގެ ސެމީން ބަލިވުމުގެ ބަދަލުހިފުމުގެ ވިސްނުމުގައި ނޫން ކަމަށެވެ.
ޗެލްސީގެ ކޯޗު ތޯމަސް ޓުޗެލް ބުނީ މިއީ ކުރިން ނިމިފައި އޮތް މެޗެއް ނުވަތަ ކުރިއަށް އަންނަ އޮތް މެޗަށް އަސަރުތަކެއް ކުރާނެ މެޗެއްގެ ގޮތުގައި އޭނާ ނުދެކޭ ކަމަށެވެ. މިއީ ލީގުގައި ޗެލްސީން ދަމަހައްޓަމުން އައި ރަނގަޅު ރެކޯޑަށް އިތުރު ފުރިހަމަކަމެއް ގެންނަން ލިބޭ ފުރުސަތެއް ކަމަށް ޓުޗެލް ދެކެ އެވެ.
"ކޮންމެ ގޮތެއް ވިޔަަސް ލީގު އަހަރެމެންނަށް ލިބޭކަށެއް ނެތް މި ސީޒަނުގައެއް. އެހެންވީމަ އަހަރެެމެން ޓާގެޓް ކޮށްގެން މި އުޅެނީ ގަދަ ހަތަރެއް. އެ ރޭހަށް ވެސް އަދި އަހަރެެމެންގެ ރަނގަޅު ފޯމު ދަމަހައްޓަން ވެސް މި މެޗުން މޮޅެއް މުހިއްމު،" ޓުޗެލް ބުންޏެވެ.
ޕްރިމިއާ ލީގުގައި ސިޓީން ވަނީ ޗެލްސީއާ ދެކޮޅަށް ކުޅުނު މެޗުތަކުން 26 ފަހަރު ބަލިވެފަ އެވެ. ސިޓީ އެންމެ ގިނައިން ބަލިވެފައިވަނީ ވެސް ޗެލްސީ އަތުންނެވެ. މިރޭ ސިޓީން ލީގު ހޯދައިފިނަމަ އެ ޓީމު ވެގެންދާނީ ލީގުގެ ޗެމްޕިއަންކަން ހަތް ފަހަރަށް ހޯދި ހަ ވަނަ ކްލަބަށެވެ.
ޗެލްސީގެ ކޯޗުކަމާ ޓުޗެލް ހަވާލުވި ފަހުން އެ ޓީމު ރަށުންބޭރުގައި ކުޅުނު މެޗަކުން ބަލިވެފައިނުވެ އެވެ. އަށް މެޗުން މޮޅުވިއިރު، ތިން މެޗު ނިމުނީ އެއްވަރުވެގެންނެވެ. އެ މެޗުތަކުގައި ޗެލްސީ ކޮޅަށް ވަނީ ހަތަރު ގޯލެވެ.
ޗެލްސީގެ ކޯޗަކަށް ފްރޭންކް ލަމްޕާޑް ހުރި ފަހު މެޗުތަކުގެ ތެރެއިން މެޗެއްގައި ސިޓީ ލީގުގައި ވަނީ ޗެލްސީ ދަނޑުގައި މޮޅުވެފަ އެވެ. ސިޓީގެ އިއްތިހާދު ސްޓޭޑިއަމްގައި މިރޭ ޗެލްސީއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 21:30 ގަ އެވެ.
