ލަންޑަން (މެއި 7) - ޔޫރޮޕާ ލީގުގެ ސެމީ ފައިނަލުން ކަޓައި 25 އަހަރަށް ފަހު ފުރަތަމަ ފަހަރަށް ޔޫރަޕްގެ މުބާރާތެއް ނެތް ސީޒަނަކާ އަންނަ އަހަރު އާސެނަލުން ކުރިމަތިލާން ޖެހުމުގެ ފުރުސަތު ބޮޑުއިރު، އެ ޓީމުގެ ކޯޗު މިކޭލް އާޓެޓާ އޭނާގެ ވަޒީފާ ދިފާއުކޮށް ވާހަކަ ދައްކައިފި އެވެ.
އާސެނަލް މި ވަގުތު އޮތީ އިނގިރޭސި ޕްރިމިއާ ލީގުގެ ނުވަ ވަނައިގަ އެވެ. ބާކީ ހަތަރު މެޗު އޮތްއިރު އެ ޓީމަަށް އަންނަ ސީޒަނުގެ ޗެމްޕިއަންސް ލީގު ނޫނީ ޔޫރޮޕާ ލީގުގެ ޖާގައެއް ލިބުމުގެ ފުރުސަތު އޮތީ ވަރަށް ކުޑަވެފަ އެވެ. އެ ޓީމުން އަންނަ ސީޒަނުގެ ޗެމްޕިއަންސް ލީގަށް ކޮލިފައިވުމަށް ބޭނުން ހިފަން އަމާޒުކޮށްގެން ހުރީ ޔޫރޮޕާ ލީގުގެ ޗެމްޕިއަނަށް އޮންނަ ފުރުސަތެވެ. އެކަމަކު ރޭ ޔޫރޮޕާ ލީގުން ކެޓުމުން އެ ދޮރު ވެސް ބަންދުވީ އެވެ.
ރޭގެ މެޗަށް ފަހު އޮތް ނޫސްވެރިންގެ ބައްދަލުވުމުގައި އާސެނަލްގައި އާޓެޓާގެ މުސްތަގުބަލާ ބެހޭގޮތުން ގިނަ ސުވާލުތަކެއް ވަނީ އަމާޒުވެފަ އެވެ.
"ކޯޗުންގެ ވަޒީފާ އަކީ އަބަދުވެސް ފާޑުކިޔުން އަމާޒުވާނެ ކަމެއް. ވަޒީފާގެ ބިރު ނެތް ކޯޗަކު ނުހުންނާނެ. މީގެ އަބަދުވެސް ކޮންފިޑެންސާ އެކު ކަންކަން ރަނގަޅުކުރެވޭނެ ކަމުގެ އުއްމީދުގައި މަސައްކަތް ކުރުން އޮތީ. އަހަރެން މި ހުރީ އަމިއްލަ ނަފްސު ސާބިތުކޮށްދޭން ލިބޭ ފުރުސަތެއް ވިއްޔާ ބޭނުން ހިފައިގެން ކުރިއަށްދާން ތައްޔާރަށް،" އާޓެޓާ ބުންޏެވެ.
"އަހަރެެން މި މަގާމުގައި ނުހުންނާނަން އަހަންނަކީ މިކަމަށް އެންމެ ރަނގަޅު މީހާ ކަމަށް ނުވަންޏާ. އަހަރެން ބޭނުންވަނީ އެ ވާހަކަ ނުދައްކައި ދަނޑުމަތީގައި އެކަން ސާބިތުކޮށްދޭން،"
އާސެނަލްގެ ގިިނަ ސަޕޯޓަރުން މި ދުވަސްވަރު އެންމެ ބޮޑަށް އަޑުއުފުލަމުން އަންނަނީ އެ ކްލަބްގެ ވެރިޔާ ސްޓޭން ކްރޮއެންކާއާ ދެކޮޅަށެވެ. އެކަަމަކު ރޭ ޔޫރޮޕާ ލީގުން ކެޓުމުން އާޓެޓާއާ މެދު ނުރުހުންވި ސަޕޯޓަރުން ވަނީ އޭނާ މަގާމުން ދުރުކުރަން ޖެހޭ ކަމަށް ގޮވާލައިފަ އެވެ. އާޓެޓާ ބުނީ ބަލިވާ ދުވަހެއްގައި ފުޓްބޯޅައިގައި ކޮންމެ ވާހަކައެއް ވެސް ދެއްކިދާނެ ކަމަށެވެ.
"އަހަރެން ބޭނުންވަނީ ދެން ސީޒަނުގައި ބާކީ އޮތް ހަތަރު މެޗުން ރަނގަޅު ނަތީޖާއެއް ނެރެގެން ދެވެން އޮތް ހިސާބަކަށް ދާން،" އާޓެޓާ ބުންޏެވެ.
ކުރިން އާސެނަލްގެ ކެޕްޓަންކަން ކުރި އާޓެޓާ އެ ޓީމުގެ ކޯޗުކަމާ ހަވާލުވީ 2019 ވަނަ އަހަރުގެ ޑިސެމްބަރު މަހު މެންޗެސްޓާ ސިޓީގެ އެސިސްޓަންޓް ކޯޗުކަން ދޫކޮށްލުމަށް ފަހު އެވެ. މިދިޔަ ސީޒަނުގައި އާޓެޓާ ވަނީ އާސެނަލަށް އެފްއޭ ކަޕް ކާމިޔާބުކޮށްދީފަ އެވެ. އަދި މި ސީޒަން ފެށީ ލިވަޕޫލް ބަލިކޮށް ޗެރިޓީ ޝީލްޑް އުފުލާލައިގެންނެވެ. އެކަމަކު މުޅި ސީޒަނުގެ ތެރޭގައި ގިނަ މެޗުތަކެއްގައި ރަނގަޅަށް ކުޅުން ނުދެއްކި ނަތީޖާތަކަށް އަސަރުުކުރީ އެވެ.
އާސެނަލާ އެކު އާޓެޓާ ސޮއިކުރި ތިން އަހަރުގެ އެއްބަސްވުން ހަމަވާނީ އަންނަ އަހަރުގެ ޑިސެމްބަރު މަހަށެވެ.
