މިލާން (މެއި 7) - ލިއޮނަލް މެސީއާ ވެސް ވާހަކަ ދެއްކުމަށް ފަހު މިިދިޔަ އަހަރު ބާސެލޯނާ އަށް ބަދަލުވުމާ ވަރަށް ގާތަށް ދިޔަ ކަމަށް އިންޓަ މިލާނުގެ އާޖެންޓީނާ ފޯވާޑް ލަޓާރޯ މާޓީނޭޒް ބުނެފި އެވެ.
މިދިޔަ އަހަރު ބާސެލޯނާ އިން މާޓީނޭޒް ގަންނަން އުޅޭ ކަމަށް ސްޕެއިނުގެ މީޑިއާތަކުން ގިނަ ދުވަސްތަކެއް ވަންދެން ރިޕޯޓްކުރި އެވެ. އަދި އެކަމުގައި މެސީގެ އެހީތެރިކަން ހޯދާ ކަމަށް ވެސް ސްޕެއިނުގެ ނޫސްތަކުގެ ފަލަަސުރުހީ އަށް އެރި އެވެ.
"އަހަރެން ބާސެލޯނާ އަށް ބަދަލުވުމާ ވަރަށް ގާތަށް ދިޔަ. އަހަރެން ހުރިހާ ކަމެއް ނިމުނުކަމަށް ވެސް ގަބޫލުކުރިން. އެއީ މެސީއާ ވާހަކަ ދައްކާފައި. މެސީ ވެސް އެ ގޮތަށް ބޭނުންވާތީ،" އީއެސްޕީއެން އާޖެންޓީނާ އަށް ދިން އިންޓަވިއުއެއްގައި މާޓީނޭޒް ބުންޏެވެ.
އުމުރުން 23 އަހަރުގެ މާޓީނޭޒް ބާސެލޯނާ އަށް ވިއްކާލަން އިންޓަ އިން ކީ އަގަކީ 133 މިލިއަން ޑޮލަރެވެ. އެއީ އޭނާގެ ކޮންޓްރެކްޓް ގަންނަން ދައްކަން ޖެހޭ އަގެވެ. ބާސެލޯނާ އިން ބޭނުންވީ ބަދަލުގައި ކުޅުންތެރިއަކު ދީފައި އަގުހެޔޮކޮށް މާޓީނޭޒް ގެންނާށެވެ. އެގޮތުން 60 މިލިއަން ޑޮލަރުގެ އިތުރުން ފިލިއްޕޭ ކުޓީނިއޯ ނޫނީ އޮސްމާން ޑެމްބެލޭގެ ތެރެއިން އިންޓަ ބޭނުން ކުޅުންތެރިއަކު އިހުތިޔާރުކުރަން ވެސް ހުށަހެޅި އެވެ. އެކަމަކު އިންޓަ އިން ބާސެލޯނާ އިން ހުށަހެޅި ގޮތަށް ޑީލް ކުރިއަށްގެންދަން ބޭނުންނުވުމުން އެންމެ ފަހުން މާޓީނޭޒް އެ އިންޓަގައި މަޑުކުރަން ނިންމީ އެވެ.
މިދިޔަ އަހަރުގެ ޗެމްޕިއަންސް ލީގުގައި މާޓީނޭޒް (ކ) މެސީ އަތުން ބޯޅަ ހޯދަން މަސައްކަތްކުރަނީ.-- ފޮޓޯ: އޭއެފްޕީ
"ބާސެލޯނާގެ މާލީ ހާލަތު ހުރި ގޮތުން އަހަންނަށް އެ ޓީމަށް ނުދެވުނީ. މިހާރު ދެން މި ޓީމުގައި (އިންޓަގައި) މަޑުކުރެވުމަކީ ރަނގަޅު ނިންމުމެއް ކަމުގައި ދެކެން. އެއީ އަހަރެމެންނަށް އިޓާލިއަން ލީގުގެ ޗެމްޕިއަންކަން ލިބިއްޖެ،" އާޖެންޓީނާ ގައުމީ ޓީމުގެ ފޯވާޑް މާޓީނޭޒް ބުންޏެވެ.
އާޖެންޓީނާގެ ރޭސިން ކްލަބްގެ ޔޫތު ޓީމުން ފަށައި ފަހުން އެ ކްލަބްގެ ސީނިއާ ޓީމަށް 2015 އިން 2018 އަށް ކުޅުނު މާޓީނޭޒް އިންޓަ އަށް ބަދަލުވީ 27 މިލިއަން ޑޮލަރުގެ ފީ އަކަށެވެ. މާޓީނޭޒް ރޭސިން އަށް ކުޅެމުންދިޔައިރު އޭނާ އަށް ޔޫރަޕްގެ ގިނަ ކްލަބްތަކެއްގެ ހުށަހެޅުން ލިބުނެވެ.
"އަހަރެން ރޭސިން ޔޫތު ޓީމަށް ކުޅުނުއިރު ރެއާލްގެ ދެ ހުށަހެޅުން ލިބުނު. އެކަމަކު އަހަރެން ފުރަތަމަ ވިސްނީ އާޖެންޓީނާގެ ފުޓްބޯޅަ ތަޖުރިބާ ކުރަން. އެހެންވެ ރޭސިން ސީނިއާ ޓީމާ ގުޅުނީ. ރޭސިން ސީނިއާ ޓީމުގައި ހުއްޓައި ވެސް ގިނަ ކްލަބްތަކުން އައި. އެކަމަކު އެންމެ ރަނގަޅު އޮފާ ލިބުނީ އިންޓަ އިން،" މާޓީނޭޒް ބުންޏެވެ.
މާޓީނޭޒް ބުނީ މުސްތަގުބަލުގައި އޭނާ ޔޫރަޕްގެ އިތުރު ކްލަބަކުން ފެނުމުގެ ފުރުސަތު އެބައޮތް ކަމަށާއި އެކަމަކު ކެރިއަރު ނިންމާލަން ބޭނުންވަނީ ރޭސިން ޖޯޒީގައި އަދި އެއް ފަހަރު ކުޅުމަށް ފަހު ކަމަށެވެ.
