މެޑްރިޑް (މެއި 6) - އަންނަ ސީޒަނަށް ރެއާލް މެޑްރިޑް ވަރުގަދަ ކުރުމުގެ ގޮތުން ޕީއެސްޖީގެ ފޯވާޑް ކީލިއަން އެމްބާޕޭ ގަންނަން ކުރާ މަސައްކަތުގެ ތެރެއިން ޕީއެސްޖީން ބޭނުންނަމަ އެ ޑީލުގެ ތެރެއިން ރެއާލްގެ ބެލްޖިއަމް ތަރި އެޑެން ހަޒާޑް ދޫކޮށްލަން އެ ކްލަބުން ނިންމާފައިވާ ކަމަށް ސްޕެއިނުގެ މީޑިއާ ރިޕޯޓްތައް ބުނެފި އެވެ.
ސްޕެއިނުގެ ނޫސްތަކުން މި ހަބަރު ރިޕޯޓްކޮށްފައިމިވަނީ ރެއާލްގެ ސަޕޯޓަރުންގެ ނުރުހުން ހަޒާޑަށް ވަރަށް ބޮޑަށް އަމާޒުވަމުން އަންނަ ދަނޑިވަޅެއްގަ އެވެ. ޗެމްޕިއަންސް ލީގުގެ ސެމީ ފައިނަލުގައި ރޭ ހަޒާޑްގެ ކުރީގެ ޓީމު ޗެލްސީ އަތުން ބަލިވެ ރެއާލް ވަނީ ކަޓައިފަ އެވެ.
އެ މެޗަށް ފަހު ހަޒާޑާއި ޗެލްސީގެ ކުޅުންތެރިން ދަނޑުމަތީގައި ސަމާސާ ކުރާ މަންޒަރު ދައްކައިދޭ ވީޑިއޯ އެއް ސޯޝަލް މީޑިއާގައި ވަނީ ވަރަށް ބޮޑަށް ވައިރަލް ވެފަ އެވެ. ރެއާލް މެޗަކުން ބަލިވިތާ މާ ގިނައިރެއް ނުވެ ކެމެރާ ކުރިމަތީގައި ހަޒާޑްގެ ފަރާތުން އެ ފަދަ ކަމެއް ފެނުމުން ސްޕެއިންގެ ނޫސްތަކުން އޭނާ އަށް ފާޑުކީއިރު، ސޯޝަލް މީޑިއާގައި ބައެއް ސަޕޯޓަރުން ހަޒާޑް ވިއްކާލަން ޖެހޭ ކަމަށް ބުނެފަ އެވެ.
އުމުރުން 30 އަހަރުގެ ހަޒާޑް ޗެލްސީ ދޫކޮށް ރެއާލަށް ސޮއިކުރީ 2019 ވަނަ އަހަރުގެ ޖުލައި މަހު 100 މިލިއަން ޔޫރޯ އަށެވެ. ރެއާލްގައި ހަޒާޑް ދައްކާ ކުޅުމަށް ބެލުމަށް ފަހު އެ ޓްރާންސްފާ ފީ 160 މިލިއަން ޔޫރޯ އަށް އަރާނެ އެވެ. ރެއާލަށް ބަދަލުވި ފަހުން އަނިޔާގެ އެކި އެކި މައްސަލަތަކުގެ ސަބަބުން ގިނަ މެޗުތަކެއް ހަޒާޑަށް ގެއްލުނުއިރު، މިދިޔަ ދެ ސީޒަނުގައި ވެސް އޭނާ އަށް ޖެހުނީ އެންމެ ހަތަރު ގޯލެވެ.
ރެއާލާ އެކު ފުރިހަަމަކުރި ދެ ޕްރީ ސީޒަނުގައި ހަޒާޑްގެ ފިޓްނަސް އަށް އެންމެ ބޮޑަށް އަސަރުކުރީ ޗުއްޓީ އަށް ފަހު ޓީމާ ގުޅުނުއިރު ފަލަވެފައި ހުރުމުންނެވެ. އޭނާގެ ފަރާތުން މިހާރު އެކަށީގެންވާ ވަރަށް ޕްރޮފެޝަނަލް އުސޫލު ނުފެެންނަ ކަމަށް ވެސް ސްޕެއިނުގެ މީޑިއާތަކުން ރިޕޯޓްކުރެ އެވެ. ހަޒާޑް މި ވަގުތު ރެއާލްގައި ހުރީ ހަފްތާ އަކު 450،000 ޔޫރޯ ލިބޭ ގޮތަށެވެ.
އަންނަ ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ ހޯދަން ގިނަ ކްލަބްތަކަކުން ޝައުގުވެރިވެ އެވެ. ޕީއެސްޖީން ވަނީ އެމްބާޕޭ އަށް ހަތަރު އަހަރުގެ އެއްބަސްވުމެއް ހުށަހަޅައިފަ އެވެ. އެއީ އަހަރަކު 36 މިލިއަން ޔޫރޯ (43 މިލިއަން ޑޮލަރު) ލިބޭ ގޮތަށެވެ. އެކަމަކު އެމްބާޕޭ އެ ކްލަބްގައި މަޑުނުކުރާނެ ކަމަށް ފްރާންސްގެ ނޫސްތަކުން ވަނީ ރިޕޯޓްކޮށްފަ އެވެ. ޕީއެސްޖީގެ ކޯޗު މައުރީސިއޯ ޕޮޗެޓީނޯ ވެސް ވަނީ އެމްބާޕޭ އެ ކްލަބްގައި މަޑުކުރުމުގެ ފުރުސަތު ކުޑަ ކަަމަށް ބުނެފަ އެވެ.
އެމްބާޕޭ ކުރިއަށް އޮތް ޓްރާންސްފާ މާކެޓްގައި ޕީއެސްޖީ ދޫކޮށްލައިފިނަމަ އޭނާ ނެތްތަނަށް ޕީއެސްޖީން ގެންދަން ބޭނުންވަނީ ލިވަޕޫލްގެ މިސްރު ފޯވާޑް މުހައްމަދު ސަލާހު އެވެ.
