ލަންޑަން (މެއި 6) - ޔުއެފާ ޗެމްޕިއަންސް ލީގުގެ ދެ ލެގުގައި ޗެލްސީން ރެއާލް މެޑްރިޑާ ދެކޮޅަށް ދެއްކި ކުޅުމަށް ބަލާއިރު ޗެލްސީ އަށް ފައިނަލުގެ ޖާގައެއް ހައްގު ކަމަށް ރެއާލްގެ ކޯޗު ޒިނެދިން ޒިދާން ބުނެފި އެވެ.
ރެއާލް ދަނޑުގައި މިދިޔަ ހަފްތާގައި ޗެލްސީ ވަނީ 1-1 އިން އެއްވަރުކޮށްފަ އެވެ. ރޭ ޗެލްސީ ދަނޑުގައި އެ ޓީމުން ރެއާލް ބަލިކުރީ 2-0 އިންނެވެ. މެޗަށް ފަހު ޒިދާން ބުނީ ޗެލްސީން ރެއާލަށް ވުރެ ރަނގަޅަށް ކުޅުނު ކަމަށާއި ހުރިހާ ކަމެއް ވެސް ބުރަވެފައި އޮތީ ޗެލްސީ ކޮޅަށް ކަމަށެވެ.
"ފުރަތަމަ ކަމަކަށް އަހަރެން ބުނާނީ ޗެލްސީ އަށް ފައިނަލުގެ ޖާގައެއް ހައްގު. އެ މީހުން ތިބީ މި ސެމީ ފައިނަލަށް ވަރަށް ރަނގަޅަށް ތައްޔާރުވެގެން. އެ މީހުން (ޗެލްސީ) ކުޅުނީ ކުޅެވުނު އެންމެ މޮޅަށް. އަހަރެމެންގެ ލެވަލްގައި ނުކުޅެވުނު. ޗެލްސީ ފެނުނީ ރަނގަޅު ރޫހެއްގައި ކުޅެލިތަން. އެ މީހުންނަށް (ޗެލްސީ އަށް) އަހަރެން މަރުހަބާ ކިޔަން،" ޒިދާން ބުންޏެވެ.
ރެއާލްގެ ކޯޗުގެ މަގާމުގައި އެންމެ ފުރަތަމަ ހުރިއިރު ޒިދާން ވަނީ ޖެހިޖެހިގެން ތިން އަހަރު އެ ޓީމަށް ޗެމްޕިއަންސް ލީގު ކާމިޔާބުކޮށްދީފަ އެވެ. އެކަމަކު ދެ ވަނަ ފަހަރަށް ރެއާލާ ހަވާލުވެ، ޒިދާނަށް އަދި މި މުބާރާތުގައި އެ ވަރުގެ ތަފާތެއް ދައްކަން ވަނީ އުނދަގޫވެފަ އެވެ. މިދިޔަ އަހަރު ދެ ވަނަ ބުރުގައި މެންޗެސްޓާ ސިޓީ އަތުން ކެޓިއިރު، މި ފަހަރު ސެމީގައި ޗެލްސީ އަތުން މި ވަނީ ބަލިވެފަ އެވެ.
މި ސީޒަނުގައި ރެއާލަށް އެންމެ ބޮޑަށް ދިމާވީ އަނިޔާގެ މައްސަލަތަކެވެ. ޒިދާން ބުނީ ހުރި ހުރިހާ ގޮންޖެހުންތަކާ އެކީގައި ވެސް ޗެމްޕިއަންސް ލީގުގެ ސެމީ ފައިނަލަށް އާދެވުމަކީ ވެސް ހިތްހަމަޖެހޭ ކަމެއް ކަމަށާއި އެކަމަކު މި ހިސާބުން އަތްއުރާލައިގެން ސީޒަން ނިމެންދެން ނުތިބޭނެ ކަމަށެވެ.
"ވަރުގަދަކޮށް ސީޒަން ނިންމާލައި ލީގު ހޯދުމަށް އަމާޒުހިފާނަން. ބާކީ މި އޮތް ހަތަރު މެޗަށް އެއީ އަޒުމަކީ." ޒިދާން ބުންޏެވެ.
ޗެލްސީގެ ކޯޗު ތޯމަސް ޓުޗެލް މިދިޔަ އަހަރު ޕީއެސްޖީ ގޮވައިގެން ވަނީ ޗެމްޕިއަންސް ލީގުގެ ފައިނަލުން ބަލިވެފަ އެވެ. މިދިޔަ ޑިސެމްބަރު މަހު ޕީއެސްޖީގެ ކޯޗުކަމުން ވަކިކުރިތާ މަހެއްހާ ދުވަސް ފަހުން ޗެލްސީއާ ހަވާލުވެ ޓުޗެލް މި ވަނީ އެ ޓީމާ އެކު ޗެމްޕިއަންސް ލީގު ފައިނަލުން ފުރުސަތު ހޯދައިފަ އެވެ.
ޓުޗެލް އަކީ ތަފާތު ދެ ކްލަބެއް ގޮވައިގެން ޖެހިޖެހިގެން ދެ އަހަރު ޗެމްޕިއަންސް ލީގުގެ ފައިނަލުން ނުކުންނާނެ ފުރަތަމަ ކޯޗެވެ. ޓުޗެލް ބުނީ ޖެހިޖެހިގެން ދެ އަހަރު ފައިނަލުގައި ހިތި ތަޖުރިބާއެއް ކުރަން ބޭނުންނުވާ ކަމަށެވެ.
"އަހަރެން އަބަދުވެސް ބުނަމުން މި އަންނަނީ އަހަރެމެން ދާން ބޭނުންވާ ލެވަލަކީ ބަޔާން މިއުނިކާއި މެންޗެސްޓާ ސިޓީއާ ހިސާބަށް ކަމަށް. އަހަރެމެން ރެއާލާ ދެކޮޅަށް މި ދެއްކި ފެންވަރުގެ ކުޅުމެއް ދައްކައިގެން ބަލިނުކުރެވޭނެ ޓީމެއް ނެތް. ޓީމު ފެނުނީ އާދަޔާހިލާފު ރޫހެއްގައި ތިބެގެން ކުޅެލިތަން،" ޓުޗެލް ބުންޏެވެ.
ނުވަ އަހަރަށް ފަހު ޗެލްސީން ޗެމްޕިއަންސް ލީގުގެ ފައިނަލުގައި ކުޅޭއިރު، މެންޗެސްޓާ ސިޓީއާ ދެކޮޅަށް އެ ޓީމު ބައްދަލުކުރާ މި ފައިނަލް މެޗު އޮންނާނީ މި މަހު 29 ގައި ތުރުކީގެ އިސްތަންބޫލުގަ އެވެ. އޭގެ ކުރިން މި މަހުގެ 15 ވަނަ ދުވަހު އެފްއޭ ކަޕް ފައިނަލުގައި ލެސްޓާ ސިޓީއާ ދެކޮޅަށް ޗެލްސީ ނުކުންނާނެ އެވެ.
