މާލެ ސަރަހައްދުގައި ކޮންޓްރޯލެއް ނެތި ކޮވިޑު ފެތުރެމުންދާތީ މިރޭ ނުވައަކުން ފެށިގެން ފަތިހު ހަތަރަކަށް ވަކި މުއްދަތެއް ނެތް ގޮތަށް ކާފިއު އިއުލާންކޮށްފައި އޮތަސް ޒަރޫރީ ބޭނުންތަކަށާއި ޑެލިވަރީ ހިދުމަތަށް ފުލުހުން ހުއްދަ ދޫކުރާނެ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ރޭ ބުނެފި އެވެ.
ފުލުހުންގެ ހުއްދައަށް www.police.gov.mv/permit އިން އެދެވޭނެ އެވެ.
ޑެލިވަރީ ހިދުމަތަށް ރެސްޓޯރަންޓްތަކާއި ފިހާރަތަކަށް ހުއްދަ ލިބޭނެ އެވެ.
ކޮވިޑު ކޮންޓްރޯލްކުރަން އަޅާފައިވާ ފިޔަވަޅުތައް
ސަރުކާރު އޮފީސްތައް ބަންދުކުރުން
ސްކޫލްތައް ބަންދުކޮށް އޮންލައިންކޮށް ކިޔަވައި ދިނުން
ޕާކުތަކާއި، ކުޅިވަރު ދަނޑުތަކާއި، ސުވިމިން ޓްރެކުތައް ބަންދުކުރުން
މިސްކިތްތަކުގައި މާސްކު އެޅުމާއެކު ނަމާދު ކުރާއިރު ގައިދުރުކަން ބެހެއްޓުން
ހުއްދައާއެކު ޒަރޫރީ ބޭނުންތަކަށް މެނުވީ ރަށްރަށަށް ދަތުރުކުރުން ހުއްޓާލުން
ވެކްސިން ފުރިހަމަ ކުރުމުން ދަތުރުކުރުމަށް ދީފައިވާ ލުއި މެދުކަނޑާލުން
އިންޑިއާ އިން އަންނަ ދިވެހިންނާއި ވޯކް ޕާމިޓް ހޯލްޑާސް 14 ދުވަހަށް ކަރަންޓީނުވުން
ފާއިތުވެދިޔަ 24ގަޑި އިރު ތެރޭގައި 734 މީހުން ވަނީ ކޮވިޑް-19 އަށް ޕޮޒިޓިވް ވެފަ އެވެ. އޭގެ ތެރެއިން މާލެ ސަރަހައްދުން 540 މީހުންނަށް ވަނީ ބަލިޖެހިފަ އެވެ. މާލެ ސަރަހައްދުގައި ބަލިވާ ރޭޓު އިތުރުވަމުންދާތީ ސިއްހީ ދާއިރާގެ މީހުންނަށް ވަނީ ބުރަބޮޑުވެފަ އެވެ.
