މެންޗެސްޓާ (މެއި 6) - ފަސްކުރަން ޖެހުނު ލިވަޕޫލާ ދެކޮޅަށް ކުޅެން އޮތް މެޗު ޝެޑިއުލްކުރި ގޮތުން މެންޗެސްޓާ ޔުނައިޓެޑުން އަށް ދުވަސް ތެރޭ ހަތަރު މެޗު ކުޅެން ޖެހިއްޖެ އެވެ.
މިދިޔަ އާދިއްތަ ދުވަހުގެރޭ ވާދަވެރި ލިވަޕޫލާ ދެކޮޅަށް ޔުނައިޓެޑް ކުޅެން އޮތް މެޗު ފަސްކުރަން ޖެހުނީ އެ މެޗުގެ ކުރިން ޔުނައިޓެޑްގެ ސަޕޯޓަރުން އެ ކްލަބްގެ ވެރިންނާ ދެކޮޅަށް ކުރަމުންދިޔަ ހަޅުތާލު ކޮންޓްރޯލުން ނައްޓައި ސަޕޯޓަރުން ދަނޑަށް ވަނުމުންނެވެ. ކުޑަ ވަގުތު ކޮޅެއްގެ ތެރޭގައި ސަޕޯޓަރުން ދަނޑުން ބޭލި ނަަަމަވެސް ޕްރިމިއާ ލީގާއި މެންޗެސްޓާ ފުލުހުން ބޭއްވި ބައްދަލުވުންތަކަށް ފަހު އެ ދުވަހު މެޗު ކުޅެވޭނެ ރައްކާތެރި މާހައުލެއް ކަށަވަރުނުކުރެވޭތީ އެންމެ ފަހުން ނިންމީ މެޗު ފަސްކުރާށެވެ.
ޕްރިމިއާ ލީގުން ރޭ އިއުލާނުކުރި އާ ޝެޑިއުލްގައިވާ ގޮތުން ފަސްކުރި ޔުނައިޓެޑާއި ލިވަޕޫލް މެޗު ކުޅޭނީ އަންނަ ބުރާސްފަތި (މެއި 13) ވަނަ ދުވަހު އެވެ. މިއާ އެކު ޔުނައިޓެޑުން ދެ ދުވަހުން ކަހަލަ ގޮތަކަށް އަށް ދުވަސް ވަންދެން މެޗު ކުޅެން ޖެހުނީ އެވެ.
ޔުނައިޓެޑްގެ މެޗުތައް:
- ރޯމާ/ ޔުނައިޓެޑް (ޔޫރޮޕާ ލީގު - 6 މެއި)
- އެސްޓަން ވިލާ/ ޔުނައިޓެޑް (ޕްރިމިއާ ލީގު - 9 މެއި)
- ޔުނައިޓެޑް/ ލެސްޓާ ސިޓީ (ޕްރިމިއާ ލީގު - 11 މެއި)
- ޔުނައިޓެޑް/ ލިވަޕޫލް (ޕްރިމިއާ ލީގު 13 މެއި)
މި މެޗުތައް ރޭވުނު ގޮތަށް ބަލާއިރު ޔުނައިޓެޑަށް އެންމެ އުނދަގޫވާނީ ލެސްޓާއާ ކުޅުމަށް ފަހު 50 ގަޑިއިރު ފަހުން ލިވަޕޫލާ ކުޅެން ޖެހުމެވެ. އެ ދެ މެޗާ ގާތްގާތުގައި ކުރިމަތިލާން ޖެހުނުއިރު، ޔުނައިޓެޑަށް އޮތް ހިތްހަމަޖެހުމަކީ ދެ މެޗު ވެސް އޮތީ އެ ޓީމުގެ ދަނޑުގައި ކަމަށްވުމެވެ.
ޔޫރޮޕާ ލީގުގެ ސެމީ ފައިނަލް ދެ ވަނަ ލެގުގައި މިރޭ ޔުނައިޓެޑުން ރޯމާއާ ދެކޮޅަށް ކުޅޭ މެޗު އޮންނާނީ އިޓަލީގެ ރޯމްގަ އެވެ. ފުރަތަމަ ލެގުގައި ޔުނައިޓެޑް ވަނީ އަމިއްލަ ދަނޑުގައި 6-2 އިން ރޯމާ ބަލިކޮށްފަ އެވެ. ޔުނައިޓެޑަށް ފައިނަލުގެ ޖާގަ ގާތްގަނޑަކަށް ލިބިފައިވާއިރު، މިއީ 2017 ވަނަ އަހަރު މި މުބާރާތުގެ ޗެމްޕިއަންކަން ހޯދި ފަހުން ޔުނައިޓެޑް މި މުބާރާތުގެ ފައިނަލުގައި ކުޅޭނެ ފުރަތަމަ ފަހަރެވެ.
ޔުނައިޓެޑުން ދެން އެންމެ އަވަހަށް އިނގިރޭސި ޕްރިމިއާ ލީގުގެ މެޗަކަށް ނުކުންނައިރު، އެ ޓީމަށް ލީގު ގެއްލިފައި އޮތުމުގެ ފުރުސަތު އެބައޮތެވެ. ހޮނިހިރު ދުވަހުގެރޭ ޗެލްސީގެ މައްޗަށް މެންޗެސްޓާ ސިޓި ކުރިހޯދައިފިނަމަ އެ ޓީމަށް ލީގު ކަށަވަރުކުރެވޭނެ އެވެ.
