މެންޗެސްޓާ (މެއި 2) - މެންޗެސްޓާ ޔުނައިޓެޑްގެ ވެރިންނާ ދެކޮޅަށް އެ ކްލަބްގެ ސަޕޯޓަރުން ކުރިއަށްގެންދިޔަ ހަޅުތާލު ކޮންޓްރޯލް ކުރުމުގައި އެކަށީގެންވާ ކުރިއެރުމެއް ނުލިބުމުން މިރޭ ލިވަޕޫލާ ދެކޮޅަށް މެންޗެސްޓާ ޔުނައިޓެޑް ކުޅެން އޮތް މެޗު ފަސްކޮށްފި އެވެ.
މެޗު ދެން ކުޅޭނެ ތާރީހެއް ނިންމާނީ ޕްރިމިއާ ލީގުން ދެ ކްލަބާ މަޝްވަރާކުރުމަށް ފަހު އެވެ.
މެޗު ފެށެން ދެ ގަޑިއިރަށް ވެފައި ވަނިކޮށް ޔުނައިޓެޑްގެ އެތައް ސަތޭކަ ސަޕޯޓަރުން ވަނީ ދަނޑަށް ވަދެފަ އެވެ. އަދި ކޮމެންޓޭޓަރުން ތިބޭ ސަރަހައްދަށް އަލިފާން ބޯޅަ އުކި ވީޑިއޯ ވެސް ވަނީ ސޯޝަލް މީިޑިއާގައި އާންމުވެފަ އެވެ. ކުޑަ އިރުކޮޅެއްގެ ތެރޭގައި ދަނޑުމައްޗަށް އެރި ސަޕޯޓަރުން ވަނީ ދަނޑުން ބާލައިފަ އެވެ.
ދަނޑުބޭރުގައި އެތައް ހާސް ޔުނައިޓެޑް ސަޕޯޓަރުން ބައިވެރިވެގެން ކުރިއަށްގެންދާ މި އެއްވުން ތަކަކީ އެ ކްލަބްގެ ވެރިން ޔޫރަޕިއަން ސުޕަ ލީގުގައި ބައިވެރިވާން ނިންމުމަށް ފަހު ފަހުން އެ ނިންމުން ބަދަލުކުރި ނަމަވެސް ކްލަބް ވިއްކާލަން ދެކޮޅު ހަދަމުންދާތީ އެވެ.
ޔުނައިޓެޑްްގެ ސަޕޯޓަރުން ދަނޑުމަތީގައި ކޯނަރު ދަނޑި ހިފައިގެން.
ޔުނައިޓެޑް ސަޕޯޓަރުންގެ އަނެއް ޝަކުވާ އަކީ އެ ކްލަބްގެ ވެރިން ކަމަށްވާ އެމެރިކާގެ ގްލޭޒާ އާއިލާ އިން އެ ކްލަބަށް ލިބޭ ފައިސާ ކްލަބަށް އެކަށީގެންވާ ވަރަށް އިންވެސްޓްނުކޮށް އަމިއްލަ ވިޔަފާރިތައް ފުޅާކުރަން މަސައްކަތްކުރާތީ އެވެ.
މި މެޗުގެ ކުރިން ޔުނައިޓެޑްގެ ކޯޗު އޮލެ ގުނަ ސޯލްޝެއާ ވަނީ ސަޕޯޓަރުންގެ ހިތްހަމަަނުޖެހުންތައް ހުރިކަން އެނގޭ ކަމަށާއި ޝުއޫރު ފާޅުކުރި ނަމަވެސް މެޗު ކުޅެވޭނެ މާހައުލެއް އެބައޮތް ކަމަށް ގަބޫލުކުރެވޭ ކަމަށް ބުނެފަ އެވެ.
އެކަމަކު މެންޗެސްޓާ ޕޮލިހުންނާއި ޕްރިމިއާ ލީގުގެ އޮފިޝަލުން މެޗު ބާއްވަން ކުރި ހުރިހާ މަސައްކަތެއް ހުއްޓާލަން ޖެހުނީ އެންމެ ފުރަތަމަ މެޗު ޝެޑިއުލްކުރިތާ އެއް ގަޑިއިރު ފަހުން ވެސް މެޗު ކުޅެވޭނެ ކަމުގެ ފުރިހަމަ ޔަގީންކަން ނުލިބުމުންނެވެ. މެޗު ފަސްކުރަން ނިންމިއިރު، ދެ ޓީމުގެ ކުޅުންތެރިން ތިބީ ހޮޓަލުގަ އެވެ. މެޗު ކުޅެވޭނެ ކަމަަށް ދެ ޓީމުން ވެސް ވަނީ ފުރަތަމަ އެގާރަ ކުޅުންތެރިން ފައިނަލްކޮށް އާންމުކޮށްފަ އެވެ.
މިރޭގެ މެޗު ޔުނައިޓެޑާއި ލިވަޕޫލްގެ އިތުރުން ދެން މުހިއްމުވެފައި އޮތީ ލީގުގެ އެއް ވަނައިގައި އޮތް މެންޗެސްޓާ ސިޓީ އަށެވެ. މިރޭ ލިވަޕޫލުން ޔުނައިޓެޑް ބަލިކުރިނަމަ ސިޓީ އަށް ހަތަރު އަހަރު ތެރޭ ތިން ވަނަ ފަހަރަށް ލީގު ޗެމްޕިއަންކަން ކަށަވަރުވާނެ އެވެ.
