މަސްވެރިކަމާއި ދަނޑުވެރިކަމުގެ ދާއިރާ އިން ރައީސް އިބްރާހިމް މުހައްމަދު ސޯލިހް، ވެވަޑައިގަތް ވައުދު ފުއްދުން ލަސްވެފައިވާ ކަމުގެ ޝަކުވާ ބޮޑުވެފައި ވަނިކޮށް ކެބިނެޓަށް ބަދަލު ގެންނަވައި އޭނާއަށް އިތުބާރުކުރައްވައި އެ ޒިންމާ މަތިކުރެއްވުމުން ޑރ. ހުސެއިން ރަޝީދު ހަސަން ރައީސަށް މިރޭ ޝުކުރު އަދާކުރައްވައިފި އެވެ.
ހުސެއިން ކުރިން ހުންނެވީ އެންވަޔަރަމެންޓް މިނިސްޓަރުގެ މަގާމުގަ އެވެ. އެކަމަކު ރައީސް ނިންމެވީ ފިޝަރީޒް މިނިސްޓަރު ކަމުގައި ހުންނެވި ޒަހާ ވަހީދު ރައީސް އޮފީހުގެ މިނިސްޓަރު ކަމަށް ބަދަލުކޮށް ފިޝަރީޒް ހިންގެވުން ހުސެއިން ހަވާލު ކުރައްވާށެވެ. ސަރުކާރު ހިންގާ ކޯލިޝަންގައި ހިމެނޭ ޖުމްހޫރީ ޕާޓީގެ ސްލޮޓެއްގައި ކެބިނެޓަށް ވަޑައިގަތް ހުސެއިނަށް މިއަދު ވަނީ ފިޝަރީޒް މިނިސްޓަރު ކަމުގެ ފަތްކޮޅު އަރުވައިފަ އެވެ.
މަސްވެރިންނާއި ދަނޑުވެރިންގެ ވަޒީރެއްގެ ގޮތުގައި ފުރަތަމަ ކުރެއްވި ޓުވީޓުގައި، އެ ދެ ދާއިރާ އިން ނަފާ އިތުރުކުރަން ޖެހޭ ކަމަށާއި އެ ކަމުގައި ނަތީޖާ ނެރެދެއްވަން ތައްޔާރަށް ހުންނެވި ކަމުގެ ޔަގީން ކަމެއް ދެއްވާފައިވެ އެވެ. އެކަމުގައި ރައީސް އޭނާ އަށް އިތުބާރު ކުރައްވައި ފުރުސަތު ދެއްވީތީ ޝުކުރު އަދާކުރެއްވި އެވެ.
ފިޝަރީޒް މިނިސްޓަރު ކަމާ ހަވާލުވެވަޑައިގެންނެވި، ޑރ. ހުސެއިން ވަނީ 2008- 2013 އަށް ފިޝަރީޒް މިނިސްޓްރީގެ ސްޓޭޓް މިނިސްޓަރުގެ މަގާމު ފުރުއްވަައިފަ އެވެ. ލޭބާ މިނިސްޓްރީގައި ވެސް ހިދުމަތް ކުރެއްވި ޑރ. ހުސެއިނަކީ ގާނޫނު އަސާސީ އިސްލާހުކުރަން އެކުލަވާލި ރައްޔިތުންގެ ހާއްސަ މަޖިލީހުގެ މެމްބަރުކަން ކުރެއްވި ބޭފުޅެކެވެ.
ޖުމްހޫރި ޕާޓީގެ ޑެޕިޔުޓީ ލީޑަރުގެ މަގާމުގައި ހުންނެވި، ޑރ، ހަސަން ވަނީ މަސްވެރިކަމުގެ ދާއިރާއިން ޕީއެޗްޑީ ހާސިލުކުރައްވައިފަ އެވެ.
ފިޝަރީޒް މިނިސްޓަރުކަން ޑރ. ހުސެންއަށް ދެއްވާފައި މިވަނީ އެ މިނިސްޓްރީގެ މަސައްކަތްތަކާ ގުޅިގެން މަސްވެރިންނާއި ދަނޑުވެރިންގެ ޝަކުވާ ބޮޑުވެފައި ވަނިކޮށެވެ. ރާއްޖޭގައި ބާނާ މަހަށާއި ދަނޑުވެރިކަމުގެ ބާވަތްތަކަށް ހަމަ އަގު ނުލިބޭތީ ކަންބޮޑުވުން އެބައޮތެވެ. އެ ވައުދުތައް ފުއްދަން ޒަހާ ގާބިލު ނޫން ކަމަށް ފާޑުކިއުން ވެސް އަމާޒުކުރި އެވެ.
ޑރ. ހުސައިން ކުރިން ހުންނެވި އެންވަޔަރަމެންޓް މިނިސްޓްރީއަށް ރައީސް އޮފީހުގެ ކުރީގެ ޕޮލިސީ ސެކްރެޓަރީ އައިމިނަތު ޝައުނާ މިއަދު ވަނީ އައްޔަން ކުރައްވައިފަ އެވެ. ކެބިނެޓަށް ރައީސް މިބަދަލުތައް ގެންނެވީ ވައުދު ފުއްދުން އަވަސްކޮށް ނަތީޖާ ނެރެން ކަމަށް ރައީސް އޮފީހުން ބުނެ އެވެ.
