ލަންޑަން (މެއި 5) - ޗެލްސީއާ އެކު އޭނާ ހަދާފައިވާ ކޮންޓްރެކްޓް އާ ކުރުމުގެ ކަންތައްތަކަށް ވުރެ، މި ވަގުތަށް މުހިއްމީ ޗެމްޕިއަންސް ލީގުގެ ސެމީ ފައިނަލުގެ ދެ ވަނަ ލެގުގައި މިރޭ ރެއާލް މެޑްރިޑާ ދެކޮޅަށް ކުޅޭ މެޗުގެ ވާހަކަ ކަމަށް ޗެލްސީގެ ކޯޗު ތޯމަސް ޓުޗެލް ބުނެފި އެވެ.
ޗެލްސީގެ ކޯޗުކަމާ މިދިޔަ ޖެނުއަރީ މަހުގެ ފަހުކޮޅު ޓުޗެލް ހަވާލުވީ 18 މަސް ދުވަހުގެ ކޮންޓްރެކްޓެއްގަ އެވެ. ޗެލްސީގައި ޓުޗެލް މިހާތަނަށް ރަނގަޅު މަސައްކަތްތަކެއް ކޮށްފައިވާއިރު، އޭނާ އަށް އާ އެއްބަސްވުމެއް ޗެލްސީން ދޭން ޖެހޭނެ ކަމަށް ބުނެ އިނގިރޭސި މީޑިއާގައި އަންނަނީ ވާހަކަ ދެކެވެމުންނެވެ.
"މި ވަގުތު ތި ވާހަކަތަކަށް އަހަރެންގެ ސަމާލުކަމެއް ނެތް. އަހަރެންގެ ސިކުނޑި ހުސްކޮށްގެން މި ހުރީ ރެއާލްގެ މެޗަށް. އަހަންނަށް މުހިއްމީ އެ މެޗުގެ ވާހަކަތައް،" މިދިޔަ ޑިސެމްބަރު މަހު ޕީއެސްޖީ ކޯޗުކަމުން ވަކިވުމަށް ފަހު މަހެއްހާ ދުވަސް ތެރޭ ޗެލްސީއާ ހަވާލުވި ޓުޗެލް ބުންޏެވެ.
ޓުޗެލްގެ ކޯޗުކަމުގައި ޗެލްސީން ވަނީ މެންޗެސްޓާ ސިޓީ ބަލިކޮށް އެފްއޭ ކަޕްގެ ފައިނަލުން ފުރުސަތު ހޯދައިފަ އެވެ. ޗެލްސީން މިހާރު މަސައްކަތްކުރަނީ 2012 ވަނަ އަހަރަށް ފަހު ފުރަތަމަ ފަހަރަށް ޗެމްޕިއަންސް ލީގުގެ ފައިނަލުން ފުރުސަތު ހޯދާށެވެ. އެކަން ހާސިލްކުރަން ބަލާއިރު ޗެލްސީ އަށް ކުރިމަތީގައި އޮތީ އުނދަގޫ މަސައްކަތެކެވެ. އެއީ ޗެމްޕިއަންސް ލީގުގެ އެންމެ ކާމިޔާބު ޓީމު ކަމަށްވާ ރެއާލް މެޑްރިޑާ ދެކޮޅަށް ނަތީޖާ ނެރުމެވެ. މިދިޔަ ހަފްތާގައި ރެއާލް ދަނޑުގައި ކުޅުނު މެޗު ނިމުނީ 1-1 އިން އެއްވަރުވެގެންނެވެ.
"ފުރަތަމަ ލެގު އަހަރެމެން އެންމެ ބޭނުން ގޮތަކަށް ނުދިޔަ ކަމުގައި ވިޔަސް ނަތީޖާ އެންމެ ގޯހެއް ނޫން. އަދިވެސް އަހަރެމެން އަތުގައި އަމިއްލަ ކޮންޓްރޯލް އެބައޮތް. މީގެ ޖެހޭނީ އިދިކޮޅަށް ނުކުންނަ ޓީމު ކައިރީގައި ޖެހިލުމެއް ނެތި ކުޅެން. އަހަރެންގެ ނަަޒަރުގައި ޗެލްސީ އަށް އެކަން ކުރެވޭނެ،" ޓުޗެލް ބުންޏެވެ.
"ގަބޫލުކުރަން ޖެހޭނީ ރެއާލް ބަލިކުރެވޭނެ ކަމަށް. އެ އިތުބާރާއި އެ ކޮންފިޑެންސް ހުންނަން ވާނެ،"
ފާއިތުވި އަހަރުތަކަށް ބަލާއިރު ޗެމްޕިއަންސް ލީގުގެ އެންމެ ކާމިޔާބު ކޯޗު ހުރީ ރެއާލްގަ އެވެ. ޒިދާންގެ ކޯޗުކަމުގައި ރެއާލުން ވަނީ ޖެހިޖެހިގެން ތިން ފަަހަރު ޗެމްޕިއަންސް ލީގުގެ ޗެމްޕިއަންކަން ހޯދައިފަ އެވެ. ރެއާލުން އެންމެ ފަހުން ޗެމްޕިއަންސް ލީގުގެ ފައިނަލުގައި ކުޅުނީ 2018 ވަނަ އަހަރު އެވެ.
ޒިދާން ބުނީ ރެއާލުން ޗެލްސީއާ ދެކޮޅަށް ނުކުންނަން ޖެހޭ ކުރަން ޖެހޭ ކަންކަން ރަނގަޅަށް އެނގިގެން އެ އިތުބާރާ އެކު މޮޅުވާން ކަމަށެވެ.
"މިއީ ވަރަށް އުނދަގޫވާނެ ޗެލެންޖެއް. އަހަރެމެން ވަރަށް ވިސްނުންތެރިކަމާ އެކު ޕްލޭނާ އެއްގޮތަށް މަސައްކަތް ކުރަންޖެހޭނެ. ފުރަތަމަ ލެގުގައި ފެނުނު ކުޅުމަށް ވުރެ މި މެޗުގައި ޗެލްސީން ގިނަ ކަންކަން ރަނގަޅުކުރާނެ،" ޒިދާން ބުންޏެވެ.
މިރޭގެ މެޗަށް ނުކުންނައިރު ރެއާލަށް އޮތް އެންމެ ބޮޑު ހިތްހަމަަ ޖެހުމަކީ އަނިޔާގެ ސަބަބުން އެންމެ ފަހުން ކުޅުނު ގިނަ މެޗުތައް ގެއްލުނު ތަޖުރިބާކާރު ޑިފެންޑަރު ސާޖިއޯ ރާމޯސް އަށް މި މެޗުގައި ކުޅެވުމެވެ. އަދި ރާމޯސްގެ އިތުރުން ޗެލްސީއާ ދެކޮޅަށް ކުޅުނު ފުރަތަމަ ލެގު ގެއްލުނު ފާލަންޑް މެންޑީ އާއި ފެޑެރީކޯ ވަލްވޭޑޭ ވެސް ޗެެލްސީއާ ދެކޮޅަށް މިރޭ ކުޅޭ ރެއާލް ސްކޮޑުގައި ހިމެނެ އެވެ.
"އަހަރެމެންގެ ލީޑަރު އަހަރެމެންގެ ކެޕްޓަން (ރާމޯސް) މި ވަގުތު މި ހުރީ އަހަރެމެންނާ އެކު. އެކަމަކު ވިސްނަން ޖެހޭ ކަންތައްތައް އެބަހުރި. އަހަރެމެން އެއްވެސް ރިސްކެއް ނުނަގާނަން،" ޒިދާން ބުންޏެވެ.
މިއީ ޔޫރަޕްގެ މުބާރާތްތަކުގައި ޗެލްސީ އާއި ރެއާލްގެ ފަސް ވަނަ ކުރިމަތިލުމެވެ. ރަނގަޅު ރެކޯޑެއް އޮތީ ޗެލްސީ އަތުގަ އެވެ. ރެއާލް އަތުން އަދި ޗެލްސީ ބަލިވެފައިނުވެ އެވެ. މީގެ ކުރިން ކުޅުނު ހަތަރު މެޗުގެ ތެރެއިން ދެ މެޗުން ޗެލްސީ މޮޅުވިއިރު، އަނެއް ދެ މެޗު ނިމުނީ އެއްވަރުވެގެންނެވެ.
ޗެލްސީގެ ސްޓެމްފޯޑް ބްރިޖުގައި މިރޭ ރެއާލާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 00:00 ގަ އެވެ.
