އެމްއެމްޕީއާރުސީ މެދުވެރިކޮށް ހިންގި ބޮޑު ހިޔާނާތުގެ ތަހުގީގަށް ރައްޔިތުންގެ މަޖިލީހުގެ މައިނޯރިޓީ ލީޑަރު، އަދި އޭދަފުށި ދާއިރާގެ އިދިކޮޅު މެމްބަރު އަހްމަދު ސަލީމް (ރެޑްވޭވް) ރިޔާސީ ކޮމިޝަނަށް އިއްޔެ ހާޒިރުކޮށްފި އެވެ.
އޭނާ މެންދުރުފަހު ކޮމިޝަނަށް ހާޒިރުކުރީ، "އަދަދު"އަށް އެނގިފައިވާ ގޮތުގައި އޭނާގެ މައްޗަށް ތުހުމަތުކޮށް އެސެޓް ރިކަވަރީ ކޮމިޝަނާއި ފުލުހުންނާއި އޭސީސީން ހިންގާ ޖޮއިންޓް އިންވެސްޓިގޭޝަންގައި ބަލާ މައްސަލައެއްގެ ތަހުގީގަށް ސުވާލުކުރާށެވެ. އޭނާ މިއަދު ވެސް ހާޒިރުވެވަޑައިގަތުމަށް ވަނީ އަންގައިފަ އެވެ.
ސަލީމް ހާޒިރުކުރުމާ ގުޅޭ ގޮތުން ރިޔާސީ ކޮމިޝަނުން ވާހަކައެއް ނުދެއްކި އެވެ. ހަމައެކަނި ބުނީ ހިޔާނާތާ ގުޅޭ ތަހުގީގުތައް ކުރިއަށް އެބަދާ ކަމަށެވެ.
ސަލީމްގެ މައްޗަށް ކުރާ ތުހުމަތާ ގުޅިގެން "އަދަދު"އިން ގުޅުމުން އަދި މެސެޖްކޮށްގެން ވެސް ސަލީމް ޖަވާބެއް ނުދެއްވި އެވެ.
މީގެ ކުރިން ވެސް ކޮމިޝަނުގެ ތަހުގީގަށް ބައެއް މީހުން ހާޒިރުކުރި އެވެ. އޭގެތޭރޭގައި ހިޔާނާތުން މަންފާވި ކަމަށް ތުހުމަތުކުރާ ރައްޔިތުންގެ މަޖިލީހުގެ ކުރީގެ މެމްބަރުން ހިމެނިވަޑައިގަންނަ އެވެ.
ފުލުހުންނާއި އޭސީސީ އާއި އެސެޓް ރިކަވަރީ ކޮމިޝަނުން އޮކްޓޯބަރު، 24، 2019 ގައި ބޭއްވި ނިއުސް ކޮންފަރެންސްގައި، ކުރީގެ ނައިބު ރައީސް އަހްމަދު އަދީބު އިސްވެ ހުންނަވައި އެމްއެމްޕީއާރުސީގެ ޖަރީމާ ހިންގި ގޮތާއި ފައިސާ ބައި އެޅި ގޮތާއި މަންފާ ލިބުނު މީހުންގެ އާ މައުލޫމާތާއި ހެކިތައް ވެސް ތަހުގީގަށް ލިބިފައިވާ ކަމަށް ބުނެ 267 މީހުންގެ ލިސްޓެއް އޮތް ކަން ހާމަކުރި އެވެ. އޭގެތެރެއިން އެންމެ އިސްކަންދީގެން ބަލަން ޖެހޭ މައްސަލަތަކުގެ ތަރުތީބެއް އެކުލަވާލާފައިވާ ކަމަށް ތަހުގީގީ އިދާރާތަކުން ބުންޏެވެ.
ތަހުގީގީ އިދާރާތަކުގެ ލިސްޓުގައި މަޖިލީހުގެ ކުރީގެ 44 މެމްބަރުންނާއި މިހާރުގެ 16 މެމްބަރުންނާއި ސަރުކާރުގައި މިހާރު ވެސް ހިމެނޭ ހަތް ބޭފުޅުންނާއި ކުރީގެ ސަރުކާރުގެ އިސް މަގާމްތަކުގައި ތިއްބެވި 30 ބޭފުޅުންނާއި މިނިވަން މުއައްސަސާތަކުގައި ކުރިން އުޅުއްވި ފަސް މެމްބަރުންނާއި ފަސް ފަނޑިޔާރުންގެ އިތުރުން ސަލާމަތީ ހިދުމަތްތަކާ ބެހޭ ހަތް އޮފިސަރުން ހިމެނިވަޑައިގަންނަވަ އެވެ.
ހިޔާނާތުގެ ތަހުގީގު ލަސްވެފައިވާ މައްސަލައިގައި ރައްޔިތުންގެ މަޖިލީހުން މީގެ ހަފުތާއެއްހާ ދުވަސް ކުރިން ވަނީ ކަންބޮޑުވުންފާޅުކޮށްފަ އެވެ. ހިޔާނާތުން މަންފާވި ލިސްޓު ހޯދަން ވެސް ތަހުގީގީ އިދާރާތަކުގައި ވަނީ އެދިފަ އެވެ.
މަޖިލީހުން ކަމާބެހޭ އިދާރާތަކުގައި މިގޮތަށް އެދުނީ، އެމްއެމްޕީއާރުސީގެ ހިޔާނާތް ނުފޮރުވޭނެ ކަމަށާއި ބާރާއި ނުފޫޒު ގަދަ، ރައްޔިތުންގެ މަޖިލީހުގެ މެމްބަރަކަސް، ވަޒީރުންނާއި އަމީރެއް ވިޔަސް ރައްޔިތުންނަށް ފަޅާއަރުވާނެ ކަމުގެ އިންޒާރު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްވާފައި ވަނިކޮށެވެ.
