ކޮވިޑުގެ ފަރުވާއަށް 75 ވެންޓިލޭޓަރު ހޯދަން ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ އެކު ވީ އެއްބަސްވުން ބާތިލްކުރަން އެ ކުންފުންޏަށް ނޯޓިސް ފޮނުވައިފި އެވެ.
އެޓާނީ ޖެނެރަލްގެ އޮފީހުން މިއަދު ބުނީ އެއްބަސްވުން އުވާލަން ހެލްތު މިނިސްޓްރީން އެގްޒެކިއުޓާސްއަށް ނޯޓިސް ފޮނުވީ މިދިޔަ އާދީއްތަ ދުވަހު ކަމަށެވެ.
މީގެ އަހަރެއްހާ ދުވަސްކުރިން އެޕްރީލް، 2، 2020 ގައި އެ ކުންފުންޏާ އެކު ހެލްތު މިނިސްޓްރީން ވެންޓިލޭޓަރު ހޯދަން އެއްބަސްވެފައިވީ ނަމަވެސް މިހާތަނަށް ރާއްޖެ ފޮނުވީ ޖުމްލަ 15 ވެންޓިލޭޓަރެވެ. އެތައް މުއާމަލާތްތަކަކަށް ފަހު ވެސް ބާކީ 60 ވެންޓިލޭޓަރު އެ ކުންފުނިން ނުފޮނުވި އެވެ.
ވެންޓިލޭޓަރު ހޯދަން އެގްޒެކިއުޓާސްއާ އެކު ހެލްތު މިނިސްޓްރީން އެއްބަސްވީ 34 މިލިއަން ރުފިޔާ އަށެވެ. މީގެތެރެއިން 30 މިލިއަން ރުފިޔާ އެ ކުންފުންޏަށް ބޭންކް ގެރެންޓީއަކާ ނުލައި އެޑްވާންސްގެ ގޮތުގައި ވަނީ ދޫކޮށްފަ އެވެ. މިއީ ގޯސްކޮށް ހިންގާފައިވާ މުއާމަލާތެއް ކަން އޮޑިޓް ރިޕޯޓުގައި ވަނިކޮށް އޭސީސީން މި މައްސަލަ ތަހުގީގުކޮށް ހިޔާނާތް ހިންގާފައިވާ ކަމުގެ ތުހުމަތުތަކާ އެކު ދައުވާ އުފުލައިދޭން ވެސް އެދުނެވެ. އެ ތަހުގީގުގައި ބައެއް ކަންކަން ފުރިހަމަކުރަން ޕީޖީ އޮފީހުން ވަނީ މައްސަލަ އަނބުރާ އޭސީސީއަށް ފޮނުވައިފަ އެވެ.
އެއްބަސްވީ 29 ދުވަހުގެ ތެރޭގައި ވެންޓިލޭޓަރުތައް ފޮނުވަން
އެޓާނީ ޖެނެރަލްގެ އޮފީހުން ބުނިގޮތުގައި އެގްޒެކިއުޓާސް އާއި ހެލްތު މިނިސްޓްރީއާ ދެމެދު އެއްބަސްވެފައި އޮތީ އެޑްވާންސް ޕޭމަންޓް ދައްކާތާ 29 ދުވަހުގެ ތެރޭގައި މުދާ ފޯރުކޮށްދޭށެވެ. މި މުއްދަތުގައި ވެންޓިލޭޓަރުތައް ފޯރުކޮށްނުދީފި ނަަމަ ބާތިލްކުރެވޭނެ ކަމަށް އެއްބަސްވުމުގައި ބަޔާންކޮށްފައިވާ ކަމަށް އޭޖީ އޮފީހުން ބުންޏެވެ.
"އެއްބަސްވުން ބާތިލްކުރާ ދުވަހާ ހަމައަށް މުދާ ފޯރުކޮށްދީފައި ނުވާ ނަމަ އެ މުދާ ފޯރުކޮށްދިނުމަށް އެހާ ތަނަށް ދައްކާފައިވާ ފައިސާ އަނބުރާ ރައްދުކޮށްދޭންވާނެ ކަމަށް އެއްބަސްވުމުގައި ބަޔާންކޮށްފައިވެ އެވެ،" އޭޖީ އޮފީހުން ބުންޏެވެ.
އެގްޒެކިއުޓާސް އަށް އެޑްވާންސްކޮށް ދެއްކި ފައިސާ އާއި އެއްބަސްވުމާ އެއްގޮތަށް މުދާ ފޯރުކޮށްނުދިނުމުން ލިބިފައިވާ ގެއްލުމުގެ ބަދަލު ސަރުކާރަށް ނުދައްކައިފި ނަމަ އާބިޓްރޭޝަނަށް މައްސަލަ ހުށަހަޅަން ވަނީ ނިންމައިފަ އެވެ.
މި އާބިޓްރޭޝަން ހިންގަން ނިންމާފައި ވަނީ މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރުގަ އެވެ. އެއްބަސްވުމުގައިވާ ގޮތުން މައްސަލަ ބަލާނީ 1 އާބިޓްރޭޓަރެވެ. އެއީ، ރާއްޖެ އިން ބޭރުގެ ތަޖުރިބާކާރު އާބިޓްރޭޓަރެއް ކަމަށް އޭޖީ އޮފީހުން ބުންޏެވެ.
އެ އޮފީހުން ބުނީ ރާއްޖެ އާއި ޔޫއޭއީ އަކީ "ކޮންވެންޝަން އޮން ދަ ރިކޮގްނިޝަން އެންޑް އެންފޯސްމަންޓް އޮފް ފޮރިން އާބިޓްރަލް އެވޯޑްސް، ނިއުޔޯކް ކޮންވެންޝަންގެ ބައިވެރިން ކަމަށެވެ. އެ މުއާހަދާގައި 168 ގައުމަކުން ބައިވެރިވެފައިވެ އެވެ.
މިއިން ކޮންމެ ގައުމެއްގައި ނަމަވެސް ހިންގާ އާބިޓްރޭޝަނަލުން ނިންމާ ނިންމުމެއް އެ މުއާހަދާގެ އެހެން މެމްބަރު ގައުމެއްގައި ތަންފީޒުކުރެވޭ ކަން އޭޖީ އޮފީހުން ފާހަގަކޮށްފައިވެ އެވެ.
ވެންޓިލޭޓަރުތައް ނުލިބި އެއްބަސްވުން ބާތިލްކުރަން ޖެހުނުއިރު، މިކަމުގައި ހިޔާނާތް ހިންގި ކަމުގެ ތުހުމަތުގައި އޭސީސީން ދައުވާކުރަން ފޮނުވީ ކުރީގެ ހެލްތު މިނިސްޓަރު އަބްދުﷲ އަމީން ހިމެނިވަޑައިގަންނަވާ ގޮތުން އެ މިނިސްޓްރީގެ މީހެއްގެ މައްޗަށެވެ. އޭސީސީން ބުނެފައިވާ ގޮތުގައި، ދައުވާ ކުރަން ފޮނުވީ، ދައުލަތުގެ މާލިއްޔަތުގެ ގަވާއިދާ ހިލާފުވެ، ވަކި ފަރާތަކަށް ނާޖާއިޒު މަންފާއެއް ހޯދައިދިން ކަމަށް އެކަށީގެންވާ މިންވަރަށް ހެއްކާއި ގަރީނާ ހުރި ކަމަށް ތަހުގީގަށް ސާބިތުވާތީ އެވެ. އެކަމަކު ޕީޖީ އޮފީހުން ބުނެފައި ވަނީ ދައުވާކުރެވޭ ވަރަށް އަދި ހެކި ނެތް ކަމަށާއި ފާހަގަކޮށްފައި ހުރީ އިދާރީ މައްސަލަތަކެއް ކަމަށެވެ.
އެކަމަކު ދައުވާ ނުކުރަން ނިންމި ނިންމުން އިޔާދަކޮށް، ވެންޓިލޭޓަރު އެއްބަސްވުމުގެ މައްސަަލަ އާއި ފައިސާ ދައުރުވި ގޮތް ބަލަން ވަނީ އޭސީސީގައި އެދިފަ އެވެ.
