ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރޭ އިއުލާނުކުރި ފިޔަވަޅުތަކާ އެއްގޮތަށް އަމަލުކުރުމުގެ ގޮތުން އެފްއޭއެމުން މިހާރު ކުރިއަށްގެންދާ ތިން ވަނަ ޑިވިޝަން ފުޓްބޯޅަ މުބާރާތް މެދުކަނލަން ނިންމައިފި އެވެ.
އެޗްޕީއޭ އިން ކުޅިވަރު މުބާރާތްތައް މި ވަގުތު ނުބާއްވަން އެންގީ މާލެ ސަރަހައްދުގައި ކޮވިޑް-19ގެ ކޭސްތައް މި ދުވަސްވަރު ރެކޯޑް އަދަދަކަށް އިތުރުވަމުންދާތީ އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) "އަދަދު" އަށް ވިދާޅުވީ މި ވަގުތު ހާލަތަށް ބަލާފައި ތިން ވަނަ ޑިވިޝަން ވަގުތީ ގޮތުން މެދުކަނޑާލަން ނިންމާފައިވާ ކަމަށެވެ.
ތިން ވަނަ ޑިވިޝަން މެދުކަނޑާލަން މިއަދު ނިންމިއިރު، މިރޭ އެ މުބާރާތުގައި ޓެންޓް ސްޕޯޓްސް ކްލަބާއި ތުޅާދޫ އެވެންޗާސް ސްޕޯޓްސް ކުޅޭ މެޗު އޮތީ ޝެޑިއުލްކޮށްފަ އެވެ.
ތިން ވަނަ ޑިވިޝަން ފުޓްބޯޅަ މުބާރާތް އެންމެ ފުރަތަމަ ޝެޑިއުލް ކުރީ މިދިޔަ ފެބްރުއަރީ މަހު އެވެ. އެކަމަކު މުބާރާތް ފެށެން ކުޑަ ދުވަސްކޮޅަކަށްވެފައި ވަނިކޮށް ފަސްކުރަން ޖެހުނީ ކޮވިޑް-19ގެ ކޭސްތައް މާލެ ސަރަހައްދުގައި ގިނަވާތީ އެޗްޕީއޭގެ އެންގުމަށް ކުޅިވަރު ހަރަކާތްތައް ހުއްޓާލަން ޖެހުމުންނެވެ. ކްލަބްތަކުން ކުރިމަތިލާން ޖެހުނު ބޮޑެތި ގޮންޖެހުންތަކަށް ފަހު މުބާރާތް އަލުން ފެށުނީ މިދިޔަ މަހުގެ 18 ވަނަ ދުވަހު އެވެ. ސާދަ ޓީމާ އެކު ކުރިއަށްދާ މި މުބާރާތުގައި މިހާތަނަށް 12 މެޗެއް ވަނީ ކުޅެފަ އެވެ.
މުބާރާތުގެ ފޯމެޓް މި ވަގުތު އޮތްގޮތަށް ބަލާއިރު، ފުރަތަމަ ދެ ގްރޫޕްގައި ހަތަރު ޓީމު ހިމެނޭނެ އެވެ. އަދި ދެން އޮތް ދެ ގްރޫޕްގައި ހިމެނޭނީ ތިން ޓީމެވެ. ކޮންމެ ގްރޫޕަކުން ވެސް ދެ ޓީމު ކުއާޓާ ފައިނަލަށް ހޮވޭނެ އެވެ. މިހާތަނަށް ކުޅުނު މެޗުތަކުން ބައެއް ޓީމުތައް ވަނީ ކުއާޓާ ފައިނަލްގެ ޖާގަ ހޯދައިފަ އެވެ.
ކޮވިޑް-19ގެ ސަބަބުން އަވަހަށް ސީޒަން ނިންމާލަން ޖެހޭތީ މިދިޔަ ސީޒަނުގައި ތިން ވަނަ ޑިވިޝަން ނުބާއްވަ އެވެ. އެހެންވެ މި ފަހަރުގެ ތިން ވަނަ ޑިވިޝަން އަވަހަށް ބާއްވަން ނިންމީ ދެ ވަނަ ޑިވިޝަނަށް ޕްރޮމޯޓްވާނެ ހަތަރު ޓީމެއް ކަނޑައެޅުމަށެވެ. އެފްއޭއެމުން މީގެ ކުރިން ބުނީ ތިން ވަނަ ޑިވިޝަން ނިމުމުން އެކަށީގެންވާ މުއްދަތެއް ދިނުމަށް ފަހު ދެ ވަނަ ޑިވިޝަން ފުޓްބޯޅަ މުބާރާތް ވެސް ފަށާނެ ކަމަށެވެ.
