ލަންޑަން (މެއި 4) - އާސެނަލްގެ ލެޖެންޑުންތަކަކާ ގުޅިގެން ސްޕޮޓިފައިގެ ފައުންޑާ ސްވިޑެންގެ ބިލިއަނަރު ޑެނިއަލް އެކް އާސެނަލް ގަންނަން ކުރާ މަސައްކަތް ވަރަށް ބޮޑަށް ވައިގައި ހިފާފައިވާއިރު، އާސެނަލްގެ ވެރިޔާ ސްޓޭން ކްރޮއެންކާ އެ ކްލަބް ވިއްކާލުމާ މެދު ވިސްނަން ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އާސެނަލް ގަންނަން ޝައުގުވެރިވާކަން އެކް ފުރަތަމަ އިއުލާނުކުރީ ޓްވިޓާގަ އެވެ. ފަހުން ކްލަބްގެ ސަޕޯޓަރުންގެ ތާއީދު އެކަމަށް އޮތް ކަމަށް އެނގުމުން އެކް ދެން ވިސްނީ ކްލަބްގެ ލެޖެންޑުންގެ ތާއީދު ހޯދުމަށެވެ. އެގޮތުން އާސެނަލްގެ ތާރީހުގައި މުހިއްމު ތިން ކުޅުންތެރިން ކަމަށްވާ ތިއަރީ އޮންރީ އާއި ޑެނިސް ބާކެމްޕް އަދި ޕެޓްރިކް ވިއޭރާއާ ބައްދަލުކޮށް އެކް ވަނީ އޭނާގެ ޕްރޮޕޯސަލްތައް ހުށަހަޅައިފަ އެވެ.
އޮންރީ އާއި ބާކެމްޕް އަދި ވިއޭރާ އަށް އެކްގެ ފަރާތުން އެންމެ ބޮޑަށް ކަމުދިޔަ ސިފަ އަކީ ކްލަބްގެ ސަޕޯޓަރުން އެދޭ ގޮތަކަށް ކްލަބް ރިފޯމްކުރަން އެކް ވެސް ބޭނުންވުމެވެ. އެކް އަކީ އާސެނަލްގެ ސަޕޯޓަރަކަށްވާތީ ސަޕޯޓަރުންގެ އިހުސާސްތައް ހުންނަ ގޮތް ވަރަށް ރަނގަޅަށް އެނގޭ ކަމަށް އޭނާ ވަނީ ސްވިޑެންގެ ނޫހަަކަށް އިންޓަވިއު ދީފަ އެވެ.
ސްޕޮޓިފައިގެ އިވެންޓެއްގެ ތެރެއިން އެކް.--
"އެކްއާ އެކު އާސެނަލްގެ އަސްލު ޑީއެންއޭ ފެންނާނެ. އެ ޔަގީންކަން އަހަރެމެންނަށް އެބައޮތް،" އޮންރީ ސްކައި ސްޕޯޓްސް އަށް ދިން އިންޓަވިއުއްގައި ބުންޏެވެ.
ރިޕޯޓްތައް ބުނާގޮތުން އެކް އާސެނަލް ގަންނަން ކުރާ މަސައްކަތުގައި ބައިވެރިވާން އިތުރު ކުޅުންތެރިން ވަނީ ނިންމައިފަ އެވެ.
އާސެނަލްގެ ސަޕޯޓަރުން ކްރޮއެންކާއާ މެދު ހިތްހަމަނުޖެހުން ފާޅުކުރަމުން އަންނަތާ ހަތަރު ވަރަަކަށް އަހަރު ވެއްޖެ އެވެ. އެކަމަކު މި ފަހަރު ހާލަތު ތަފާތެވެ. އެެއީ މައްސަލަ ބޮޑުވެފައިވާ ޔޫރަޕިއަން ސުޕަ ލީގުގައި އާސެނަލުން ބައިވެރިވާން ކްރޮއެންކާ ކުޅެފައިވާ ރޯލުގެ ސަބަބުންނެވެ. ފާއިތުވި އަހަރުތަކުގައި އާސެނަލްގެ ނަތީޖާތައް ދަށްވަމުން އަންނަ އެންމެ ބޮޑު ސަބަބަކީ ކްރޮއެންކާ އެ ކްލަބްގެ ކުރިމަގަށް ބަލައި އިންވެސްޓްކުރަން ދެކޮޅު ހަދާތީ ކަމަށް އާސެނަލް ސަޕޯޓަރުން ބުނެ އެވެ.
އެމެރިކާގެ ވިޔަފާރި ހަބަރުތައް ގެނެސްދޭ ބައެއް މީޑިއާތަކުން ރިޕޯޓްކުރާ ގޮތުގައި ކްރޮއެންކާ މިދިޔަ ދުވަސްތަކުގައި ވަނީ އާސެނަލް ވިއްކާލުމާ ބެހޭ މަޝްވަރާތަކެއް ކޮށްފަ އެވެ. އެ ގޮތުން ކްރޮއެންކާ އެންމެ ފުރަތަމަ އާސެނަލް ވިއްކާލަން ކީ 1.7 ބިލިއަން ޕައުންޑަށެވެ. އެކަމަކު އާސެނަލްގެ ބައެއް ކަހަލަ ލޯންތަކަކާ އެކު އެ އަދަދު ދެ ބިލިއަން ޕައުންޑަށް އެރުމުގެ ފުރުސަތު އެބައޮތެވެ.
ދާދި ފަހުން އެކް ވަނީ އާސެނަލް ގަންނަން އޭނާ ވަކި ފަންޑެއް އެކުލަވާލާފައިވާ ކަމަށް ބުނެފަ އެވެ. އެކްގެ އަމިއްލަ މިލްކިއްޔާތުގައި 3.4 ބިލިއަން ޕައުންޑް (4.7 ބިލިއަން ޑޮލަރު) އެބަހުއްޓެވެ.
ކްރޮއެންކާގެ ކޭއެސްއީ އިން އެންމެ ފުރަތަމަ އާސެނަލްގެ ހިއްސާ ގަތީ 2007 ވަނަ އަހަރު އެވެ. އެ އަށް ފަހު 2011 ވަަނަ އަހަރު މެޖޯރިޓީ ހިއްސާދާރަކަށްވި އެވެ. އޭރު ކްރޮއެންކާ އާސެނަލްގެ އަގެއްގެ ގޮތުގައި މީޑިއާ އަށް ހާމަކުރީ 731 މިލިއަން ޕައުންޑްގަ އެވެ. ކްރޮއެންކާ އެއްކޮށް އާސެނަލް ގަތީ 2018 ވަަނަ އަހަރު އެވެ. އެންމެ ފަހުން ފޯބްސް އިން ނެރުނު އެންމެ އަގުބޮޑު ކްލަބްތަކުގެ ތެރެއިން އަށް ވަނައިގައި އޮތީ އާސެނަލް އެވެ. އެ ލިސްޓުގައިވާ ގޮތުން އާސެނަލްގެ އަގަކީ 2.8 ބިލިއަން ޕައުންޑް އެވެ.
