ބާސްކެޓްބޯޅަ އެކެޑަމީތަކާއި ކްލަބްތަކުގެ ޕްރެކްޓިސް ކުރިއަށްގެންދާ ކުޅިވަރު އެކުވެނި އައުޓް ޑޯ ބާސްކެޓް ކޯޓު ބަންދުކުރުމުން ކުޅުންތެރިންނާއި ކްލަބްތަކަށް ބޮޑު ގެއްލުންތަކެއް ކުރިމަތިވެއްޖެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެންގުމަށް އިއްޔެ ވަނީ ބާސްކެޓްބޯޅަ ކޯޓުގައި ބަންދު ބޯޑު އަޅުވައިފަ އެވެ. އެކަމާ މެދު އެންމެ ފުރަތަމަ ހިތްހަމަ ނުޖެހުން ފާޅުކުރެއްވީ ދާދި ފަހުން ބާސްކެޓްބޯލް އެސޯސިއޭޝަން އޮފް މޯލްޑިވްސް (އެމްބީއޭ)ގެ ރައީސް ކަމަށް އިންތިހާބުވި އަހުމަދު އާދަމް (އެޑަމް) އެވެ.
އާދަމް އޭނާގެ ރަސްމީ ފޭސްބުކް އެކައުންޓް މެދުވެރިކޮށް ސޯޝަލް މީޑިއާގައި ކޮށްފައިވާ ޕޯސްޓެއްގައި ވިދާޅުވީ މިއީ އެކުވެނީގައި ބާސްކެޓް ކޯޓު އެޅި ފަހުން މި ގޮތަށް ބަންދުކުރި ފުރަތަމަ ފަހަރު ކަމަށެވެ.
"މިދިޔަ އަހަރު ވެސް އެންގީމައި މަޑުމަޑުން ގޭގައިތިބީ. އެހެނަސް މިހެން ބަންދު ބޯޑު އެޅުވުމުން އެ ހުއްޓުވެނީ ކިތަށް މީހުންގެ އާމްދަނީތޯ،" އާދަމް ސުވާލުކުރެއްވި އެވެ.
"ކެމްޕޭން އޯކޭ. ތޮށްޖެހިގެން އެހެން ކަންތައް އޯކޭ. އާންމުނަށް ނުފެންނަ ގޮތަށް ހުންނަ ހޯލްތަކުގައި މުބާރާތްތަށް އޯކޭ. ތޮށްޖެހިގެން ގޮސް ދުވާޓްރެކް ދުވުން އޯކޭ. އެންމެ ރަނގަޅު ދޯ އަހާލަން ބަލާލަން ކުޅެން އަންނަ ކުއްޖެއް ޕޮޒިޓިވްވިތޯ ކޯޗެއް ޕޮޒިިޓިވްވިތޯ،"
އެކުވެނި ބާސްކެޓްބޯލް ކޯޓުގައި ބަންދު ނޯޓިސް ހަރުކޮށްފައި.
ގިނަ ބާސްކެޓްބޯޅަ އެކެޑަމީތަކެއް ޓްރެއިނިން ކުރިއަށްގެންދާ ތަނަކީ އެކުވެނި އައުޓް ޑޯ ކޯޓެވެ. ބާސްކެޓްބޯޅަ ބައެއް ކޯޗުންގެ އާމްދަނީ ބަރޯސާވެފައި އޮންނަނީ އެކެޑަމީގެ މަސައްކަތަށެވެ. ލޮކްޑައުންގެ ސަބަބުން މިދިޔަ އަހަރު އެ މަސައްކަތް ހުއްޓިފައި އޮތުމުން މާލީ ގޮތުން ބޮޑު ގެއްލުމެއް ކުރިމަތިވި އެވެ. އަދި ކޮވިޑްގެ ކޭސްތައް ރާއްޖޭގައި ރެކޯޑް މިންވަރަށް އިތުރުވާތީ އެކުވެނި ބާސްކެޓް ކޯޓު ބަންދުކުރުމާ ގުޅިގެން އަނެއްކާ ވެސް އެކެޑަމީތައް ހިންގާ ފަރާތްތަކަށް ބޮޑު ގެއްލުމެއްވާނެ އެވެ.
"ބޭނުންވަނީ ކޮންމެ ކުޅިވަރަކަށް ވެސް މީގެ ހަމަހަމަ ފުރުސަތެއް އޮންނަން. ވަކި ކުޅިވަރަކަށް ވަކި ގޮތެއް ރަނގަޅެއް ނޫން،" ބާސްކެޓްބޯޅަ ކޯޗެއް "އަދަދު" އަށް ބުންޏެވެ.
ބާސްކެޓްބޯޅަ އައުޓް ޑޯ ކޯޓަކީ ބާސްކެޓްގެ ރަސްމީ ކްލަބްތައް ޕްރީ ސީޒަން މެޗުތައް ކުޅެން ވެސް ބޭނުންކުރަމުން އަންނަ ކޯޓެވެ. ކޯޓު ބަންދުކޮށްފައި އޮތުމުން ކްލަބްތަކުގެ ޕްރީ ސީޒަން ޓްރެއިނިން އަށް ވެސް ވަނީ ބުރޫއަރާފަ އެވެ. އެ ގޮތުން ކިންގްސް ބާސްކެޓްބޯލް ކްލަބާއި ސްޓިންގާސް ކުޅެން އޮތް ޕްރީ ސީޒަން މެޗެއް ވެސް ވަނީ ފަސްކުރަން ޖެހިފަ އެވެ.
