މެޑްރިޑް (މެއި 2) - ސްޕެނިޝް ލީގުގައި މިރޭ ލިއޮނަލް މެސީގެ ދެ ގޯލާ އެކު ބާސެލޯނާ އިން 3-2 އިން ވެލެންސިއާ ބަލިކޮށް ލީގުގެ ރޭހުގައި މުހިއްމު މޮޅެއް ހޯދައިފި އެވެ.
އެއް ވަނައިގައި އޮތް އެތުލެޓިކޯ މެޑްރިޑާއި ދެ ވަނައިގައި އޮތް ރެއާލް މެޑްރިޑް ރޭ ކުޅުނު މެޗުތަކުން މޮޅުވުމުން މިރޭގެ މެޗަށް ނުކުތްއިރު މޮޅުވުމުގެ ޕްރެޝަރު ބާސެލޯނާ އަށް އޮތެވެ. ބާސެލޯނާ އިން ވަނީ މި މޮޅާ އެކު ލީގުގެ ދެ ވަނައިގައި އޮތް ރެއާލް މެޑްރިޑާ ޕޮއިންޓުގެ ގޮތުން އެއްވަރުކޮށްފަ އެވެ. ލީގުގެ ރޭހުގައި ދެން އޮތް އެންމެ މުހިއްމު މެޗަކީ އަންނަ ހޮނިހިރު ދުވަހު އެތުލެޓިކޯ އާއި ބާސެލޯނާ ކުޅޭ މެޗެވެ.
އެއް ވަނައިގައި އޮތް އެތުލެޓިކޯ އަށް 34 މެޗުން 76 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލާއި ތިން ވަނައިގައި އޮތް ބާސެލޯނާގެ އޮތީ 34 މެޗުން 74 ޕޮއިންޓެވެ. ރެއާލަށް ކުރި ލިބެނީ ހެޑް ޓު ހެޑް ގަވާއިދުންނެވެ. ހަތަރެއްގައި އޮތް ސެވިއްޔާ އަށް 33 މެޗުން ވަނީ 70 ޕޮއިންޓް ލިބިފަ އެވެ.
ވެލެންސިއާ ދަނޑުގައި މިރޭ ކުޅުނު މެޗުގެ 50 ވަނަ މިނިޓްގައި އެ ޓީމުން ލީޑުނެގި އެވެ. ކޯނަރެއްގައި ކާލޯސް ސޮލާ ދިން ބޯޅައަކުން ގަބްރިއެލް ޕައުލިސްޓާ ވަނީ ބޮލުން ގޯލެއް ޖަހައިފަ އެވެ. ވެލެންސިއާ އަށް ލީޑު ހިފަހައްޓައިލެވުނީ ހަތް މިނިޓް އެވެ. މެސީ ވަނީ ބާސެލޯނާ އަށް އެއްވަރުކޮށްދީފަ އެވެ. މިއީ މެސީ ފޮނުވާލި ޕެނަލްޓީ ވެލެންސިއާގެ ކީޕަރު ޔެސްޕާ ސިލިސަން އަތުގައި ޖެހިފައި ރީބައުންސްވެގެން އައި ބޯޅައެއްގައި މެސީ ޖެހި ގޯލެކެވެ.
އޭގެ ހަ މިނިޓް ފަހުން އެންޓޮއިން ގްރީޒްމަން ވަނީ މެޗުގައި ފުރަތަމަ ފަަހަރަށް ބާސެލޯނާ އަށް ލީޑުނަގައިދީފަ އެވެ. މި ގޯލުގައި ބާސެލޯނާގެ ފްރެންކީ ޑި ޔޯންގެ ދައުރު ބޮޑެވެ. މެޗުގެ 69 ވަނަ މިނިޓްގައި މެސީ ވަނީ ހިލޭ ޖެހުމަކުން ގޯލެއް ޖަހައި ބާސެލޯނާގެ ލީޑުފުޅާކޮށްދީފަ އެވެ.
މެޗު ނިމެން ހަތް މިނިޓަށް ވެފައި ވަނިކޮށް ސޮލާ ވަނީ އޭރިއާބޭރުން ޖެހި ޝޮޓަކުން ގޯލެއް ކާމިޔާބުކޮށްފަ އެވެ. އިތުރު ގޯލެއް ޖަހައި ނަތީޖާ ހަމަހަމަކުރަން ވެލެންސިއާ އިން މަސައްކަތްކުރި ނަމަވެސް ކާމިޔާބެއްނުވި އެވެ.
ލީގުގައި އެންމެ ފަހުން ގްރަނާޑާ އަތުން ބާސެލޯނާ ބަލިވި މެޗުގައި ރަތް ކާޑު ދައްކައި ބެންޗުން ފޮނުވާލި ބާސެލޯނާގެ ކޯޗު ރޮނާލްޑް ކޫމަން ހުރީ ސަސްޕެންޝަނުގަ އެވެ. ބާސެލޯނާ އިން ވަނީ ކޫމަންގެ ސަސްޕެންޝަން އެޕީލްކޮށްފަ އެވެ.
