ލަންޑަން (މެއި 1) - އިނގިރޭސި ޕްރިމިއާ ލީގުގައި މިރޭ ފުލަމް އަތުން 2-0 އިން މޮޅުވެ ހަތަރު ވަނައިގައި ހަ ޕޮއިންޓުގެ ލީޑެއް ލިބުނު ކަމުގައި ވިޔަސް ޗެލްސީ އަށް އަދި ގަދަ ހަތަރެއް ފަސޭހަނުވާނެ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
ޗެލްސީ ހަތަރު ވަނައިގައި އޮތީ 34 މެޗުން 61 ޕޮއިންޓް ހޯދައިގެންނެވެ. ފަސް ވަނައިގައި އޮތް ވެސްޓް ހޭމް ޔުނައިޓެޑަށް ލިބިފައިވަނީ 33 މެޗުން 55 ޕޮއިންޓެވެ. ހަ ވަނައިގައި އޮތް ލިވަޕޫލަށް 33 މެޗުން 54 ޕޮއިންޓް ލިބިފައިވާއިރު، ހަތް ވަނައިގައި އޮތް ޓޮޓެންހަމަށް ވަނީ 33 މެޗުން 53 ޕޮއިންޓް ލިބިފަ އެވެ.
ސްޓެމްފޯޑް ބްރިޖުގައި މިރޭ ކުޅުނު މެޗުގައި ޗެލްސީން ފުރަތަމަ ހާފުގައި ލީޑުނެގީ ކައި ހަވާޓްޒް ޖެހި ގޯލުންނެވެ. މެޗުގެ 10 ވަނަ މިނިޓްގައި ހަވާޓްޒް މި ގޯލު ޖެހި އެ ޓީމުގެ މޭސަން މައުންޓް ދިން ބޯޅައަކުންނެވެ. ފުރަތަމަ ހާފުގައި ދެ ވަަނަ ގޯލެއް ޖަހަން ޗެލްސީން ކުރި މަސައްކަތް ކާމިޔާބެއްނުވި އެވެ. އެކަމަކު ދެ ވަނަ ހާފްގެ ކުޅުން ފެށިގެން ހަތަރު މިނިޓް ތެރޭ ހަވާޓްޒް އިތުރު ގޯލެއް ޖެހި އެވެ. މިއީ ޓިމޯ ވާނާ ދިން ބޯޅައަކުން ހަވާޓްޒް ޖެހި ގޯލެކެވެ.
މެޗަށް ފަހު ޓުޗެލް ބުނީ މިއީ މި ވަގުތަށް ބަލާއިރު ވަރަށް މުހިއްމު މޮޅެއް ކަމަށާއި އެކަމަކު މިއީ ވަކި ކަމެއް ޔަގީންކުރެވޭނެ ނަތީޖާއެއް ކަމަށް ނުބެލެވޭނެ ކަމަށެވެ.
"އަހަރެމެން މި އޮތީ ގަދަ ހަތަރެއްގައި މި ވަގުތަށް. ތެދެއް މި ތިން ޕޮއިންޓް އަހަރެމެންނަށް ވަރަށް މުހިއްމު. އެކަމަކު ވިސްނަން ޖެހޭ އަހަރެމެންނަށް އަދި ގަދަ ހަތަރެއް ޔަގީނެއް ނުވޭ. މިއީ ލީޑެއް. އަހަރެމެންނަށް ފަރުވާކުޑަކޮށްލެވެން ނެތް. ދެން ހުރި މެޗުތަކަށް ފޯކަސް ކުރަން ޖެހޭ،" މިދިޔަ ޖެނުއަރީ މަހު ޗެލްސީއާ ހަވާލުވެ ރަނގަޅު މަސައްކަތްތަކެއް ކުރަމުން އަންނަ ޓުޗެލް ބުންޏެވެ.
"މި ރޭސް (ގަދަ ހަތަރެއްގެ ރޭސް) އެއްވެސް ޓީމަކަށް ފަސޭހައެއް ނުވާނެ"
ރެލިގޭޝަނުގައި އޮތް ފުލަމްއާ ދެކޮޅަށް ކުޅުނު މެޗުގައި ޗެލްސީގެ މައުންޓާއި ކީޕަރު އެޑޮއާޑް މެންޑީ އަށް ކޮންމެވެސް ވަރެއްގެ އަނިޔާއެއްވި ނަމަވެސް ބުދަ ދުވަހުގެރޭ ޗެމްޕިއަންސް ލީގުގެ ސެމީ ފައިނަލް މެޗަށް އެ ދެ ކުޅުންތެރިން ފިޓްވާނެ ކަމުގެ ޔަގީންކަން އެބައޮތް ކަމަށް ޓުޗެލް ވަނީ ބުނެފަ އެވެ.
