ރާއްޖޭގެ ބައެއް ސަރަހައްދުތަކުގައި އެމްޕީއެލް އިން ދެމުން އައި ބަހުގެ ހިދުމަތް އެމްޓީސީސީގެ ދަށަށް ބަދަލު ކުރަން ނިންމައިފި އެވެ.
އެކަން ކަށަވަރުކޮށް ދެއްވަމުން އެމްޓީސީސީގެ ސީއީއޯ އާދަމް އާޒިމް "އަދަދު" އަށް ވިދާޅުވީ މިހާރު އެކަމާ ގުޅޭ ހުރިހާ މަޝްވަރާތަކެއް ނިމި، އަންނަ މަހުން ފެށިގެން އެމްޓީސީސީގެ ދަށަށް ބަހުގެ ހިދުމަތް ބަދަލުކުރެވިގެން ދާނެ ކަމަށެވެ.
މިހާރު އެމްޕީއެލްއިން ރާއްޖޭގެ ތިން ސަރަހައްދެއްގައި ބަހުގެ ހިދުމަތް ފޯރުކޮށް ދެ އެވެ. އެ ކުންފުނީގެ ޓްރާންސްޕޯޓް ލިންކުން ބަހުގެ ހިދުމަތް ދެނީ ގްރޭޓާ މާލެ، ލާމު އަތޮޅު އަދި އައްޑޫ ސިޓީ އާއި ފުވައްމުލައް ސިޓީގަ އެވެ.
އެމްޕީއެލްއިން ބަހުގެ ހިދުމަތް ދޭން ފެށީ އެ ކުންފުނީގެ ޓްރާންސްޕޯޓް ޕޯޓްފޯލިއޯއެއް އުފައްދަން ކުރެވުނު މަސައްކަތުގެ ތެރެއިންނެވެ. ބަހުގެ ހިދުމަތުގެ އިތުރުން އައްޑޫ ސިޓީގައި ފެރީގެ ހިދުމަތް ދެމުން އަންނަނީ ވެސް އެމްޕީއެލްއިންނެވެ.
އެމްޓީސީސީގެ ދަށަށް މި ހިދުމަތް ބަދަލު ކުރެވުނަސް އެއްވެސް މީހެއްގެ ވަޒީފާ ނުގެއްލޭނެ ކަމުގެ ޔަގީންކަން އާޒިމް ދެއްވި އެވެ.
އަދި އެ މުވައްޒަފުންނަށް ކުންފުނީގެ މުސާރައިގެ އޮނިގަނޑުގެ ތެރެއިން ކުރިން ލިބެމުން އައި މުސާރައާ އެއްވަރު ނުވަތަ އެއަށް ވުރެ ބޮޑު މުސާރައެއް ލިބޭނެ ކަަމަށް ވެސް ވިދާޅުވިި އެވެ.
އެމްޓީސީސީއަކީ ރާއްޖޭގައި ފުޅާ ދާއިރާއެއްގައި ބަހުގެ ހިދުމަތް ދެމުން އަންނަ ޓްރާންސްޕޯޓަށް ހާއްސަ ކުރެވިގެން ސަރުކާރުން އުފެއްދި ކުންފުންޏެކެވެ. މި ސަރަހައްދުތަކުގައި އެމްޓީސީސިން ހިދުމަތް ދޭން ފެށުމުން ރާއްޖޭގައި ބަހުގެ ހިދުމަތްދޭ ހުރިހާ ރަށެއްގައި އެ ހިދުމަތް ދޭނީ އެ ކުންފުނިންނެވެ.
މިހާރު އެ ކުންފުނިން އޮޕަރޭޓް ކުރަމުން އަންނަނީ ހުޅުމާލެ-ހުޅުލެ ބަސް ރޫޓް އަދި ހުޅުމާލޭގެ އެތެރޭގެ ރޫޓުތަކެވެ. ކައިރި މުސްތަގުބަލުގައި ހުޅުމާލެ ފޭސް-2 ހިމެނޭ ގޮތަށް މުޅި ގްރޭޓާ މާލެ ސަރަހައްދުގެ ބަހުގެ ހިދުމަތް އެމްޓީސީސީން ގުޅާލާނެ އެވެ.
