ރިސޯޓެއް ގޮތަށް ތަރައްގީ ކުރުމަށްޓަކައި ވ. އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ކުރީގެ ރައީސް އަބްދުﷲ ޔާމީންގެ ބޭންކު އެކައުންޓަކަށް ޖަމާކޮށްފައިވާ ކަމަށް ބުނާ މައްސަލައެއްގައި އެމަނިކުފާނުގެ މައްޗަށް ޖިނާއީ ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވައިފި އެވެ.
ވ. ތިނަދޫ ކައިރިން އޮތް އާރަށަކީ ޕިކުނިކު ދާ ކުޑަ ފަޅުރަށެކެވެ. އެ ރަށް ކުރިން އޮތީ ޑީއާރްޕީގެ ކުރީގެ ލީޑަރު އަހުމަދު ތަސްމީން އަލީގެ ހިއްސާ އޮންނަ ކުންފުންޏަކަށް ދީފަ އެވެ. ނަމަވެސް އޭނާގެ އަތުން އޯގަސްޓު، 2015، ގައި ފަޅުރަށް އަތުލުމަށްފަހު ސެޕްޓެމްބަރު މަހު، އެ ރަށް ހަވާލުކޮށްފައި ވަނީ ވ. އަތޮޅުގެ ކުރީގެ މެމްބަރު ޔޫސުފް ނައީމްގެ ހިއްސާ އޮންނަ ކުންފުންޏަކަށެވެ.
ރައީސް ޔާމީނާ ގާތް ގުޅުމެއް އޮންނަ ޔޫސުފް ނައީމްގެ ޓޫޖީ ނަމަކަށް ކިޔާ ކުންފުންޏާ އާރަށް ހަވާލު ކުރި މަހު ހަމަ އޭނާ ވަނީ އެ ރަށް އެއް މިލިއަން ޑޮލަރަށް ބޭރުގެ ކުންފުންޏަކަށް ވިއްކާލައިފަ އެވެ. މި ނޫހަށް އެނގިފައިވާ ގޮތުގައި އޭގެ ފަހުން ހަމަ ސެޕްޓެމްބަރު މަހު، އެ އެއް މިލިއަން ޑޮލަރު ރައީސް ޔާމީން އެޗުއެސްބީސީގައި ހުޅުވާފައި ހުންނަ އެކައުންޓަކަށް ވަނީ ޖަމާކޮށްފަ އެވެ.
އެމްއެމްޕީއާރްސީ އިން ވަގަށް ނެގި އެއް މިލިއަން ޑޮލަރު އެމަނިކުފާނުގެ އެކައުންޓަކަށް ޖަމާވި މައްސަލައެއްގައި ފަސް އަހަރުގެ ހުކުމެއް މިހާރު ވެސް ތަންފީޒު ކުރައްވަމުން ގެންދަވާ ރައީސް ޔާމީންގެ މައްޗަށް މިފަހަރު ކުރާ ތުހުމަތަކީ ރިޝްވަތު ނެންގެވުމާއި ކަޅު ފައިސާ ދޮވުމުގެ ކުށެވެ.
އެ މައްސަލަ ފުލުހުން ތަހުގީގު ކުރުމަށްފަހު ޕީޖީ އޮފީހަށް ފޮނުވާފައި ވަނީ މިދިޔަ އަންގާރަ ދުވަހެވެ.
ރިޝްވަތު ނެންގެވުމާއި ކަޅު ފައިސާ ދޮވުމުގެ އެހެން މައްސަލައެއްގެ ޝަރީއަތް ރައީސް ޔާމީންގެ މައްޗަށް ކްރިމިނަލް ކޯޓުގައި މިހާރު ވެސް ދަނީ ހިންގަމުންނެވެ. އެއީ މަގާމުގެ ނުފޫޒު ބޭނުން ކުރައްވައިގެން އެމްއެމްޕީއާރްސީ މެދުވެރިކޮށް ރ. ފުއްގިރި ވިއްކައިގެން ލިބުނު 1.1 މިލިއަން ޑޮލަރު އެމަނިކުފާނުގެ އެކައުންޓަކަށް ޖަމާކުރައްވާފައިވާ މައްސަލައެއްގަ އެވެ.
އެ މައްސަލައިގައި ރައީސް ޔާމީންގެ މައްޗަށް ދައުވާ އުފުލާފައި ވަނީ ޖޫން، 2020 ގަ އެވެ.
އެހެންކަމުން އާރަށް މައްސަލައިގައި ރައީސް ޔާމީންގެ މައްޗަށް ޕީޖީ ދައުވާ އުފުލައިފި ނަމަ އެ މައްސަލަ ވާނީ އެމަނިކުފާނުގެ މައްޗަށް އުފުލާ ހަ ވަނަ ޖިނާއީ ދައުވާއަށެވެ. ހުކުމްކޮށްފައިވާ މައްސަލަ އާއި މިހާރު ކޯޓުގައި ކުރިއަށްދާ މައްސަލައިގައި ވެސް ޔާމީން މައްޗަށް ކޮންމެ މައްސަލައެއްގައި ދެ ދައުވާ ކުރެ އެވެ.
އެމްއެމްޕީއާރްސީ މައްސަލައިގައި ރައީސް ޔާމީން ޖަލަށްލުމަށް ހުކުމް ކުރީ ނޮވެމްބަރު 8، 2019، ގަ އެވެ. އޭގެ ފަހުން ރެއާ ހަމައަށް އެ ހުކުމް ތަންފީޒު ކުރައްވަމުން ގެންދެވީ މާފުށީ ޖަލުގަ އެވެ. އެކަމަކު މި ރޯދަ މަސް ނިމެންދެން އެ މަނިކުފާނު ދެން ހުންނަވާނީ ގެކޮޅުގައި ކަމަށް މޯލްޑިވްސް ކަރެކްޝަނަލް ސާވިސް އިން ރޭ ވަނީ ބުނެފަ އެވެ.
ރައީސް ޔާމީން ގެކޮޅަށް ބަދަލުކޮށްފައި މި ވަނީ އެމަނިކުފާނު ރޯދަ މަހަށް ޖަލުން ދޫކޮށްދިނުމަށް އަނބިކަނބަލުން ފާތިމަތު އިބްރާހިމް ސިޓީއަކުން ރައީސް އިބްރާހިމް މުހައްމަދު ސޯލިހުގެ އަރިހުގައި އެދިވަޑައިގެންފައި ވަނިކޮށެވެ.
"އިރާދަކުރެއްވިއްޔާ ދެރަގޮތެއް ރައީސް ޔާމީނަކަށް ނުވާނެ،" މި މަހު ބޭއްވި ނޫސްވެރިންގެ ބައްދަލުވުމެއްގައި ރައީސް ސޯލިހު ވިދާޅުވެފައިވެ އެވެ.
ޔާމީން ގެކޮޅަށް ބަދަލު ނުކުރާތީ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ސިލްސިލާ މުޒާހަރާތަކެއް އިއުލާނުކޮށް މާލޭގެ މަގުމައްޗަށް ވެސް ވަނީ ނިކުމެފަ އެވެ. ޕީޕީއެމް އޮފީސް ކުރިމަތީ ބާއްވާ މި މުޒާހަރާ ކުރިއަށް ގެންދިއުމުގެ ފުރުސަތު ފުލުހުން ދީފައެއް ނުވެ އެވެ.
