ކްރިކެޓް ބޯޑް އޮފް މޯލްޑިވްސް އިން ރޯދަ މަހު ކުރިއަށްގެންދާ ކްރިކެޓް ކާނިވަލުގެ އޮފީސް ތަކަށް ހާއްސަ ޓޭޕް ބޯލް ކްރިކެޓް މުބާރާތުގެ ޗެމްޕިއަންކަން ޔޫތު މިނިސްޓްރީ ބަލިކޮށް ކަސްޓަމްސް ރެކްރިއޭޝަން ކުލަބުން އިއްޔެ ހޯދައިފި އެވެ.
ކުޅިވަރު އެކުވެނި ކްރިކެޓް ސްޓޭޑިއަމްގައި އިއްޔެ ހަވީރު ކުޅުނު މެޗުން ކަސްޓަމްސް މޮޅުވީ ނުވަ ލަނޑުންނެވެ.
ޓޮސް ދިމާވީ ޔޫތު މިނިސްޓްރީ އަށެވެ. މިނިސްޓްރީން ނިންމީ ފީލްޑް ކުރާށެވެ. ކަސްޓަމްސް އިން ކުޅެން އަރައި އަށް އޯވަރު ނިމުނުއިރު ވަނީ 102 ލަނޑު އެއްކޮށްފަ އެވެ. ކަސްޓަމްސްގެ ތަޖުރިބާކާރު ބެޓްސްމަން މުހައްމަދު އާމިރް ވަނީ 20 ލަނޑު އެއްކޮށްފަ އެވެ. އެ ޓީމުގެ މުހައްމަދު ހައިކަލް ވެސް 20 ލަނޑު އެއްކުރިއިރު، އެ ޓީމުގެ އަހުމަދު ޝަރީފަށް އެއްކުރެވުނީ 14 ލަނޑެވެ.
މިނިސްޓްރީން ކުޅެން އަރައި އެ ޓީމުގެ ބަންގްލަދޭޝް ކުޅުންތެރިޔާ ސައިފުލް އިސްލާމް ވަނީ 19 ލަނޑު އެއްކޮށްފަ އެެވެ. ކަސްޓަމްސްގެ އާމިރާއި ޝަރީފް ވަނީ ކޮންމެ ކުޅުންތެރިއަކު ދެ ވިކެޓް ނަަގައިފަ އެވެ. ފަހު އޯވަރަށް ދިޔައިރު މެޗުން މޮޅުވާން މިނިސްޓްރީ އަށް ބޭނުންވަނީ 18 ލަނޑެވެ. އިމާދު އިސްމާއިލް ވަރަށް ހިތްވަރުކުރި ނަމަވެސް މެޗުން މޮޅުވެވޭވަރަށް ލަނޑު އެއްނުކުރެވުނެވެ.
ފައިނަލުގެ އެންމެ މޮޅު ކުޅުންތެރިޔަކީ ކަސްޓަމްސްގެ އާމިރު އެވެ. ބެސްޓް އޯލްރައުންޑާ ލިބުނީ މުބާރާތުގައި 102 ލަނޑު އެއްކޮށް ހަ ވިކެޓް ނަގައި 583 ޕޮއިންޓް ހޯދި ސައިފުލް އިސްލާމް އެވެ.
ހަ ޓީމު ވާދަކުރި އޮފީސް މުބާރާތުގެ ފައިނަލުން މިނިސްޓްރީ ފުރުސަތު ހޯދީ ސެމީގައި މަޖިލިސް ޓީމު ބަލިކޮށްފަ އެވެ. އަދި ކަސްޓަމްސް އިން ވަނީ ސެމީގައި ކްލަބް އިމިގްރޭޝަންގެ މައްޗަށް ކުރިހޯދައިފަ އެވެ.
