ހަތަރު ފުރޮޅުލީ އުޅަނދުތައް ރަޖިސްޓްރީކުރަން ގަރާޖެއް ބޭނުން ނުވާ ގޮތަށް ގާނޫނު އިސްލާހު ކުރުމާ ދެކޮޅަށް ފަހު ވަގުތު މަޖިލިސް ކޮންޓްރޯލްކުރާ އެމްޑީޕީގެ ބައެއް އިސް މެމްބަރުން ތެދުވަޑައިގަތުމުން، އެ އިސްލާހަށް މިއަދު ތާއީދު ނުލިބި އަނބުރާ ކޮމިޓީއަށް ފޮނުވާލައިފި އެވެ.
އުޅަނދުތައް ގަރާޖެއްގައި ރަޖިސްޓްރީ ކުރުން ލާޒިމު ނުވާ ގޮތަށް ހެދުމަށް އެއްގަމު ދަތުރުފަތުރުގެ ގާނޫނަށް އިސްލާހު ހުށަހެޅުއްވީ ނޮޅިވަރަމް ދާއިރާގެ އަމިއްލަ މެމްބަރު މުހައްމަދު ނަޝީދު އަބްދުﷲ އެވެ.
އެ އިސްލާހުގެ މަގުސަދަކީ ބައެއް ގަރާޖުތަކުގެ ވެރިފަރާތްތަކުން އެކަމުގެ ނާޖާއިޒު ފައިދާ ނަގައި ގަރާޖު ފީގެ ގޮތުގައި ބޮޑެތި އަދަދުތަކުން ފައިސާ ނަގަމުންދާ މައްސަލަ ހައްލު ކުރުން ކަމަށް ބުނެފައިވެ އެވެ.
އެ ބިލު ދިރާސާ ކުރިއިރު މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން ކަމާގުޅޭ އިދާރާތަކުގެ ލަފަޔާ އެކު ނިންމާފައި ވަނީ އިންޖީނުލީ އެއްގަމު އުޅަނދު ރަޖިސްޓަރީ ކުރަން ހުށަހަޅާއިރު ގަރާޖެއްގައި އެ އުޅަނދެއް ބާއްވާނެ ކަމުގެ ލިޔުން ހުށަހަޅަން ލާޒިމްނުވާ ގޮތަށެވެ.
ނަމަވެސް، އެ ރިޕޯޓުގެ ބަހުސްގެ ތެރެއިން ހާއްސަކޮށް މާލެއަށް ނިސްބަތްވާ އެމްޑީޕީގެ އިސް މެމްބަރުން ވަނީ އެކަމާމެދު ވަރަށް ބޮޑަށް ނުރުހުން ފާޅުކުރައްވައިފަ އެވެ.
މިގޮތުން، އެކަމާ އެންމެ ބޮޑަށް ކަންބޮޑުވުންފާޅުކުރެއްވި މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އިއްޔެ ކުރިއަށް ދިޔަ ބަހުސްގެ ތެރެއިން ވެސް ނުރުހުން އެންމެ ބޮޑަށް އަމާޒުވީ އެމްޑީޕީގެ އެހެން މެމްބަރުންނަށެވެ.
އެކަމަކު މިހާރު ގެންނަން އުޅޭ ބަދަލު ބޮންޑޭ އެ ވިދާޅުވާހާ ގޯސް ކަމަަކަށް އެމްޑީޕީގެ އެހެން މެމްބަރުން ގަބޫލެއް ނުކުރައްވަ އެވެ.
ބޮންޑޭ ދެކެވަޑައިގަންނަވާ ގޮތުގައި، އިސްލާހު ހުށަހަޅާފައިވާ ގޮތަށް ފާސްވެއްޖެ ނަމަ "އެމްޑީޕީގެ މެމްބަރުން ގެއަށް ދާންވީ" އެވެ.
ބޮންޑޭގެ ކަންބޮޑުވުންތަކަށް ތާއީދުކުރައްވައި، މިއަދުގެ ޖަލްސާގައި ގަލޮޅު އުތުރު ދާއިރާގެ މެމްބަރު އީވާ އަބްދުﷲގެ އިތުރުން ހެންވޭރު މެދު ދާއިރާގެ މެމްބަރު އަލީ އާޒިމް ވެސް ވަނީ ތެދުވެވަޑައިގެންފަ އެވެ.
އީވާ ވިދާޅުވީ ކޮރަޕްޝަން ހުއްޓުވުމަކަށް ބުނެ ގަވައިދު އުވާލައިގެން އެކަމެއްގެ އަސާސެއް ފިލައިގެންނުދާނެ ކަމަށެވެ.
އަދި އެކަމުގައި ހިނގަމުންދާ ކޮރަޕްޝަން ހުއްޓުވާނީ އެކަމަށް އޮންނަ ގަވައިދު އުވާލުމުގެ ބަދަލުގައި އެ ގާނޫނު ތަންފީޒުކޮށްގެން ކަމަށް މަޖިލީހުގެ ނައިބު ރައީސްކަން ވެސް ކުރައްވާ އީވާ ވިދާޅުވި އެވެ.
އީވާގެ ހުށަހެޅުއްވުމަށް ތާއީދުކުރައްވައި، އަލީ އާޒިމް ވެސް ވިދާޅުވީ ކަމެއް ގޯސްކޮށް ހިނގާކަމަށް ބުނެ އެކަން ހުއްޓުވަން އޮންނަ ގަވައިދެއް ނޫނީ ގާނޫނެއް އުވާލުމަކީ އޭގެ ހައްލެއް ނޫން ކަމަށެވެ.
މިއަދުގެ ޖަލްސާއަކީ މަޖިލީހުގެ މިއަހަރުގެ ފުރަތަމަ ދައުރުގެ ފަހު ޖަލްސާކަމުން މަސައްކަތްތައް ނިންމިމުމަށް ވަގުތު އިތުރުކޮށްގެން، އެ ބިލު އިތުރަށް ފުރިހަމަ ކުރަން އަނބުރާ ކޮމިޓީއަށް ފޮނުވުމަށް އީވާ ހުށަހެޅުއްވި ހުށަހެޅުން ފާސްވީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 68 މެމްބަރުންގެ އަގުލަބިއްޔަތުންނެވެ.
އެ ހުށަހެޅުމަށް އެއް މެމްބަރަކު ތާއީދު ނުކުރެއްވިއިރު، ވަކި ގޮތަކަށް ވޯޓު ނުދެއްވާ މެމްބަރަކު ވެސް އިންނެވި އެވެ.
