ޓޫރިޒަމް މިނިސްޓްރީގެ ޑިރެކްޓަރު ޖެނަރަލްގެ މަގާމުގައި ހުންނަވަނިކޮށް އެ މަގާމުން ވަކުކުރި އާއިޝަތު އަލީއަށް އަލުން ވަޒީފާ ދިނުމަށް ވަޒީފާއާބެހޭ ޓްރިބިއުނަލުން އަންގައިފި އެވެ.
އާއިޝަތު އަލީ، 2019 ވަނަ އަހަރު ޓޫރިޒަމް މިނިސްޓްރީން ވަކިކުރީ އުމުރުން 55 އަހަރުވެފައިވާތީ، ސިވިލް ސާވިސް ކޮމިޝަނަށް ލިބިދޭ އިހްތިޔާރުގެ ދަށުން މުސްކުޅިކުރުމަށްފަހު އެވެ.
އެއީ، ސިވިލް ސާވިސްގެ ގާނޫނާއި ގަވައިދާ ހިލާފަށް ކޮށްފައިވާ ކަމެއް ކަމަށް ބުނެ އާއިޝަތު ވަޒީފާ ޓްރިއުބިއުނަލަށް މައްސަލަ ހުށަހެޅުމުން މި މަހުގެ 14 ވަނަ ދުވަހު ވަނީ މައްސަލާގައި ގޮތް ކަނޑައަޅާފަ އެވެ.
މައްސަލާގައި އޭނާ އެދިފައިވަނީ، ޑިރެކްޓަރު ޖެނަރަލްގެ މަގާމު އަލުން އިޔާދަކޮށްދިނުމާއި މުސާރަ އާއި އިނާޔަތްތައް ނަގައިދިނުމަށެވެ. ނަމަވެސް، އެކަމަށް އިންކާރުކޮށް ސިވިލް ސާވިސް ކޮމިޝަނުން ވަނީ އެ ކޮމިޝަނުން އޭނާ ވަކިކުރަން ނިންމި ނިންމުން ދިފާއުކޮށްފަ އެވެ.
އެގޮތުން، އާއިޝަތު އަލީ ވަޒީފާއިން ވަކިކުރުމުގެ ކުރިން އޭނާގެ ހާރިޒީގެ މައްސަލައެއް ޓޫރިޒަމް މިނިސްޓްރީން ސަމާލު ކަމަށް ގެނައި ކަމާއި އެއް އަހަރު ދުވަހުގެ މުއްދަތުގައި 109 ދުވަހުގެ ތެރޭގައި 1213 މިނެޓް ގަޑި ޖެހިފައިވާ ކަމަށެވެ. އަހަރެއްގެ ތެރޭގައި 60 ދުވަހުގެ ތެރޭގައި 300 މިނެޓަށްވުރެ އިތުރަށް ގަޑި ޖެހިއްޖެނަމަ، އެއީ އެ މުވައްޒަފަކު ވަޒީފާއިން ވަކި ކުރެވިދާނެ ހާލަތެކެވެ.
އެހެންވެ، އާއިޝަތު އަލީ ވަޒީފާއިން ވަކި ކުރަން ނިންމީ އެ ކަމަށް ރިއާޔަތްކޮށް ކަމަށާއި އޭނާއަކީ އުމުރުން 55 އަހަރު ވެފައިވާ މުވައްޒަފެއް ކަމުން ކޮމިޝަނަށް ލިބޭ އިހްތިޔާރުގެ ދަށުން ވަޒީފާއިން މުސްކުޅިކޮށް ވަކިކުރީ ކަމަށެވެ. އުމުރުން 55 އަހަރުން ފެށިގެން މުވައްޒަފުން މުސްކުޅި ކުރެވިދާނެ ކަމަށް އޮންނައިރު، އެކަމުގެ ލާޒިމް އުމަރަކީ 65 އަހަރެވެ.
ނަމަވެސް، މި މައްސަލާގައި ސިވިލް ސާވިސް ކޮމިޝަނުން އަމަލު ކޮށްފައިވަނީ މައުޟޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމް ކުރެވިފައިނުވާ ކަމަށް ޓްރިބިއުނަލުން ނިންމި އެވެ. އެގޮތުން، އާއިޝަތު އަލީގެ އިތުރުން އެހެން ބައެއް ވެރިންގެ ހާޒިރީއަށް ބެލިއިރު ވެސް ގަޑިޖެހިފައި ހުރި ކަމާއި އެއީ، އެ މިނިސްޓްރީގައި ވަޒީފާއަށް ހާޒިރުވުމުގެ އާންމު ހަމަ ކަމަށް ފެންނަ ކަމަށެވެ. އެކަމަކު، އެހެން ފަރާތްތަކާމެދު ފިޔަވަޅު ނާޅާ ހަމައެކަނި އާއިޝަތު އަލީއަށް ފިޔަވަޅެއް އެޅުމުން އޭނާއާމެދު ތަފާތު ކުރުން ގެންގުޅުނީކަން ގަބޫލު ކުރެވޭ ކަމަށް ނިންމުމުގައިވެ އެވެ.
ނިންމުމުގައި ބުނީ، ގަޑިޖެހޭނަމަ، އިސްލާހުވުމުގެ ފުރުސަތު ދޭންވާނެ ކަމަށާއި އެންމެ ފުރަތަމަ ވެސް ވަޒީފާއިން ވަކިކުރުމަކީ އިޖުރާއަތްތައް އެންމެ ރަނގަޅަށް ކުރިއަށް ނުގެންދިޔުން ކަމަށެވެ. މި މައްސަލާގައި ގަޑި ޖެހޭ ޝަކުވާއާ ގުޅިގެން އާއިޝަތު އަލީއަށް އިންޒާރެއްދީ، އޭނާ އިސްލާހުވުމަށް ފުރުސަތު ދީފައިނެތްކަން ފާހަގަކުރި އެވެ.
އޭގެ އިތުރުން، އާއިޝަތު އަލީ މުސްކުޅިކޮށް އޭނާ ވަޒީފާއިން ވަކިކޮށްފައިވަނީ އެއްވެސް ވަރަކަށް އެކަމުގައި އޭނާގެ ބަހެއް ހޯދުމަކާ ވެސް ނުލާކަމުން، އެއީ އަދުލުވެރި ގޮތް ނޫން ކަމަށް ބުރަވެވޭ ކަމަށް ނިންމުމުގައިވެ އެވެ.
އެހެންވެ، ޓްރިބިއުނަލްގެ ނައިބު ރައީސް ހަސަން އިބްރާހިމް ނިންމެވި ނިންމުމުގައި ވަނީ އާއިޝަތު އަލީއަކީ އެއްވެސް ހާލަތެއްގައި ވަޒީފާއިން ވަކިވެފައިވާ މުވައްޒަފެއް ކަމަށް ނުބަލައި، އޭނާގެ ވަޒީފާ ރުޖޫއަކުރުމަށް އަދި، ވަޒީފާއިން ވަކިކުރި ތާރީހުން ފެށިގެން ލިބެންޖެހޭ މުސާރަ އާއި އިނާޔަތްތައް ދިނުމަށް އަންގަވާފަ އެވެ. އަދި، އޭނާއާމެދު ތަފާތުކުރުން ގެންގުޅުނުކަން ސާބިތުވާތީ ބަދަލުގެ ގޮތުގައި ތިން މަސް ދުވަހުގެ މުސާރަ އާއި އިނާޔަތަށްވާ ފައިސާ ދިނުމަށް އެންގެވި އެވެ.
އާއިޝަތު އަލީއަކީ ޓޫރިޒަމް މިނިސްޓްރީގައި 1983 ވަނަ އަހަރުން ފެށިގެން މަސައްކަތް ކުރަމުން ދިޔަ ފަރާތެކެވެ. އޭނާ ވަޒީފާއިން ވަކިކުރުމަށް މިނިސްޓްރީގެ ޕާމަނަންޓް ސެކްރެޓަރީ މަސައްކަތްކޮށްފައިވާ ކަމަށް އޭނާ ޓްރިބިއުނަލްގައި ތުހުމަތުކޮށްފައިވެ އެވެ.
އެގޮތުން، އޭނާ ވަޒީފާއިން އަމިއްލަށް ވަކިވުމަށް މަޖުބޫރުކޮށްފައިވާ ކަމާއި އަމިއްލައަށް ރިޓަޔާކުރުމަށް އެކި މުހުލަތުތައް ކަނޑައަޅައި، އެކަން ނުކޮށްފިނަމަ ވަޒީފާއިން ވަކި ކުރާނެ އިންޒާރު ދީފައިވާ ކަމަށް ޓްރިބިއުނަލްގައި އާއިޝަތު ބުނެފައިވެ އެވެ.
