ވެކްސިނޭޝަން ކެމްޕެއިންގެ ކާމިޔާބީއާ އެކު ޓޫރިޒަމް މަސައްކަތްތެރިންގެ ދުވަސްވީ ސުވާލަކަށް ޖަވާބު ދެވިއްޖެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް މިއަދު ވިދާޅުވެއްޖެ އެވެ.
"އައި އެމް ވެކްސިނޭޓެޑް" ކެމްޕޭން ފެށުމުގެ ރަސްމިއްޔާތުގައި މިނިސްޓަރު މައުސޫމް ވިދާޅުވީ ކޮވިޑުގެ-19 ގެ އުނދަގޫ ހާލަތުގައި ރިސޯޓް މުވައްޒަފުންވީ ވަރަށް ބޮޑު ގުރުބާނީއެއް ކަމަށެވެ. އާއިލާތަކާ ދުރުގައި ވަކިން ތިބެން ޖެހުމުން އެ މުވައްޒަފުންގެ ކަންބޮޑުވުންތަކެއް ހުރި ކަމަށް ވިދާޅުވި އެވެ.
"އެންމެ ގިނަ ފޯނު ކޯލު އަޅުގަނޑަށް އައީ އެ ބޭފުޅުންގެ ފަރާތުން، އަޅުގަނޑަށް ޖަވާބެއް ނުދެވުނު. މައުސޫމް ކޮންއިރަކުންހޭ ތިމަންނާމެންނަށް ފިރިދަރިންނަށް، އަނބިދަރިން ކައިރިއަށް ދެވޭނީ. އަޅުގަނޑު ބުނިން އިރާދަކުރެއްވިއްޔާ ވަރަށް އަވަހަށް ދެވޭނެއޭ،" މައުސޫމް ވިދާޅުވި އެވެ.
"އެހެން ކިޔަމުން ކިޔަމުން އައިސް އިރާދަކުރެވިއްޔާ މިއީ އެ ވާހަކަ ނިމުމަކަށް އައިސްފައި އޮތް ދުވަސް. އެ ބޭފުޅުންނަށް ކޮންމެވެސް އުފާވެރި ހަބަރެއް އަޅުގަނޑަށް ދެވިއްޖެ ކަމަށް އުއްމީދުކުރަން،"
ވެކްސިން ދެ ޑޯޒް ފުރިހަމަކުރާ މީހުންނަށް ކަރަންޓީނު ލުއިތައް ދޭން އެޗްޕީއޭއިން ނިންމުމާ ހަމައަށް، ރިސޯޓު މުވައްޒަފުންނަށް ކަރަންޓީނު ވުމަކާ ނުލާ ދަތުރެއް ނުކުރެވެ އެވެ. ޗުއްޓީ ދުވަސްތައް ހުންނަ ގޮތުން މިއީ މަދު ބަޔަކަށް ނޫނީ ކުރެވޭނެ ކަމަކަށް ނުވާތީ މިކަމާ ގިނަ ރިސޯޓް މަސައްކަތްތެރިން ކަންބޮޑުވުން ފާޅުކުރި އެވެ.
މައުސޫމް ވިދާޅުވި ގޮތުގައި ފަތުރުވެރިކަމުގެ ދާއިރާގެ މުވައްޒަފުންގެ ވެކްސިން ޕްރޮގްރާމް ވަރަށް ކާމިޔާބެވެ.
ފްރަންޓްލައިން މީހުންގެ ގޮތުގައި ބަލައިގެން ރާއްޖޭގައި އެންމެ ފުރަތަމަ ވެކްސިން ޖަހަން ފެށި މީހުންގެ ތެރޭގައި ރިސޯޓު މަސައްކަތްތެރިން ހިމެނެ އެވެ. މިއާ އެކު މިއަދާ ހަމައަށް ރިސޯޓުތަކުގައި މަސައްކަތްކުރާ 99 ޕަސެންޓު މީހުންނަށް ފުރަތަމަ ޑޯޒް ދީފި އެވެ. އަދި މިހާތަނަށް 8000 މީހަކު ދެވަނަ ޑޯޒް ފުރިހަމަކޮށްފި އެވެ.
އަހަރެން ވެކްސިން ޖަހައިފިން ކެމްޕެއިން: އަމާޒު ޓޫރިޒަމްގެ ސައްތައިން ސައްތަ އިމިއުނިޓީ
ޓޫރިޒަމް މިނިސްޓްރީ އަދި އެމްއެމްޕީއާރުސީ ގުޅިގެން މިއަދު އިފްތިތާހުކުރި "އައި އެމް ވެކްސިނޭޓަޑް" ކެމްޕެއިނަކީ ފަތުރުވެރިކަމުގެ ސިނާއަތުގައި ހަރަކާތްތެރިވާ އެންމެން ވެކްސިން ޖަހަން ބާރު އެޅުމުގެ ގޮތުން ހިންގާ ކެމްޕެއިނެކެވެ.
މިއީ ރާއްޖޭގެ ފަތުރުވެރިކަމުގެ ސިނާއަތަކީ ކޮވިޑުން ރައްކާތެރިވާން ޖަހާފައިވާ ވެކްސިންގެ ޑޯޒްތައް ފުރިހަމަކޮށް، 100 ޕަސެންޓު ރައްކާތެރިކަން ނުވަތަ އިމިއުނިޓީ ލިބިފައިވާ ފުރަތަމަ ގައުމަށް ހެދުމުގެ އަމާޒުގައި ހިންގާ ހަރަކާތެކެވެ. މި ހަރަކާތުގެ ތެރެއިން ވެކްސިން ދެ ޑޯޒް ފުރިހަމަކޮށްފައިވާ މީހުންނަށް ބެޖެއް ލިބޭނެ އެވެ.
